點解要買中國水貨
首先，最主要原因應該係好多中國品牌嘅手機，係香港要推國際版。要加一個 Google 嘅服務，又要再係原本嘅中國特色嘅 ROM 改一個合乎國際標準嘅 ROM，點會快得到！若果你要搶先其他香港人，玩到最優質嘅國產手機，當然最快就係買正宗中國行貨啦！而部份品牌，香港根本無代理入貨兼負責保養及客戶服務，例如：中興、魅族、Nubia、iQoo 等，跟你講係行貨的店主，都一定係呃你。但真係無行貨呀，你要玩呢類型品牌嘅手機，只有焗住買中國版。最後，就係一個字：「窮」，但明明自己係窮人又要玩好機嘅朋友，中國版本，不少都比香港版平，精打細算嘅香港人，點會唔識揀。
外掛 Google 有兼容問題
中國大陸上市嘅行貨手機，不會有 Google 服務。香港幾時無埋 Google 就要問「焗腸」，今時今日仲用到，手機無預載 Google 問題就大了。我知道，我知道，商家會用谷歌服務安裝器等 App 安裝服務框架之後，跟你講部機係用到 Google 服務，但係人都知，大大小小嘅兼容問題時有發生。不過，都有一個例外，就係華為。華為手機國際版 EMUI，最近升級至功能跟中國版用的 HarmonyOS 十分相近，香港版更可享用搶先版 HarmonyOS 大部份升級。但點都好，華為中國行貨，定係香港行貨，同樣無 Google 可用。好奇怪，中國版華為手機，十有九部是可安裝「谷歌認證和框架」嘅手機，相反，香港國際版行貨就未必部部得了。對於嗰啲追逐華為手機功能嘅手機玩家，又唔想享用 HarmonyOS 先進升級，中國行貨再安裝 Google 真是唯一出路呀！
以下是購買中國大陸「國行」手機用戶經常會遇到的幾個問題，整理如下：
- 頻段缺失：中國及香港使用的手機頻段及 CA 組合，亦有不同，5G 部份更加難攪。 係家陣 4G / 5G 用量都咁多，任何時間都係繁忙時間嘅香港，不完全對應香港網絡設定，上網越用越慢，只會令自己越用越唔開心。
- 內建APP及廣告：中國市場銷售版本手機 UI 通常預設好多中國當地的 App，佔據系統空間，層出不窮嘅廣告是一個問題。例如小米手機中國預載的「國家反詐中心」App 就聽起上來好有不安感，但又不能刪去，就算我支持國家反詐，但人係香港，無用嘅就應該有得 Del App 啦！
- 保養和升級：一旦手機有問題，只能自己概括承受，即使香港商家願意把手機代你送上中國維修，但比起香港行貨的客戶服務，做得差又可以瘋狂投訴，玩「國行」手機之前，要想清楚呀。韌體後續升級也是個問題，部分刷入國際版的 ROM ，更增加了後續得到系統定期更新的難度。
- 二手脫手難：Android 手機本身回收價都不會太高，仲要非香港行貨，你用到悶想去二區放售，要高價賣出會比較有難度。
- 其他小問題：Google 地圖時間軸無法使用、部分手機無法使用Google Pay、WhatsApp 無論如何設置都收不到通知等令人困擾小問題。
你有買過中國大陸的行貨手機嗎？你在香港使用時，有遇到不同的問題嗎？