免費用 ChatGPT 嘅方法
出面成日講 ChatGPT，但其實香港係「正式」地用唔到 ChatGPT。當然，網上好多教學，教你點樣申請，點樣裝 VPN，點樣免費得到 VPN，甚至點樣課金，ePrice 都出唔少文講過，例如好平咁開個 VPN，大家都知知時局變幻無常，一個 VPN 都係不時之需，你可以 Click 呢度申請埋。我想講，若果你要用 AI 寫求職信，或者叫 AI 做嘢，有一個免費方法，就係申請 POE 服務，若果你識玩 ChatGPT 正版，以下講嘅嘢，都一様咁用。乜嘢叫 POE 服務，ePrice 之前講咗好多，大家可以 Click 呢度去了解。簡單咁講，POE 裡面已包括咗 ChatGPT 服務，你選用 AI 工具嗰陣，揀 ChatGPT 就得。
▲ 可以用電話號碼、Email 或者 Apple ID 登記，除咗 Android 同 iOS，網頁版都有了。最重要係乜，唔駛 VPN 同埋免費用呀！
▲ 入面有好多 AI，最多人用，當然係 ChatGPT，因為都係免費嘅。
叫 AI 做嘢，重點是問一個好指示
ChatGPT 其實係生成式 AI (Generative AI) 重點是你要俾一個指示佢，佢先可以做嘢。即係「佢聽咗你嘅指示，生成一個答案俾你」。以今次嘅任務為例，你想 AI 幫你寫「求職信」就要淸楚話俾 AI （即係 ChatGPT）知，你想要呢份求職信，有乜嘢內容。簡單嚟講，你去揾工之前，唔該想淸楚你嘅長處，你嘅優點，你之前工作經驗等等，呢啲你唔去想，其實用唔用 AI 你都好難搵工。
錯誤指令示範
好似上面咁講，你開咗 Poe，揀咗 ChatGPT 之後，若果你好簡單咁佢「幫我寫封求職信」，或者叻少少，加埋職位名「幫我寫封應徵編輯的求職信」，無錯，ChatGPT 都會有求必應，俾到一封信你，例如我哋示範如下：
▲ 一個近乎神一般萬能嘅 AI，一樣可以畀到一封求職信你，但出嚟嘅結果係「好行」，我係老闆都唔想聯絡佢。
詳細指令又會點
畀 AI 嘅指令，你唔唔可以「行貨」，佢無讀心術，你要 AI 做嘢，指令要詳細。以下是我改了另一個指令：「我即將應徵 ePrice 科技網站編輯職位，我有 8 年編輯工作經驗，曾於蘋果日報擔任編輯一職，畢業於樹仁大學新聞系，對手機、平板等科技產品有強烈的觸覺，幫我寫封詳細、有說服力的求職信。」結果如下：
▲ 我寫出來嘅指令 ( ChatGPT 類生成式 AI 嘅術語叫做 Prompt) 未必一定最好，你學識咗，或者可以寫到比我更加好嘅 Prompt，但使用 ChatGPT 其中一個重點係：你愈提供到愈多嘅背景資料畀佢，佢就愈畀到更加適合「個人化」嘅答案畀你，而唔係交行貨：「我對工作充滿熱誠」，一堆阿媽係女人嘅答案，我係老細都唔請你。
另一個重點係，比較好係加入一啲描述，例如你想要一篇點樣嘅求職信，可能係「有說服力」，可能係「煽情」，可能係「專業」，或者「詳細 / 簡潔」，視乎你嘅需要。Prompt 問得合適，ChatGPT 都可以幫到你，去生成一啲關鍵字。
最後祝大家搵到新工，有得加人工！