Threads 推出三小時全球三百萬人搶住用
任何新嘅社交網絡應用程式，都需要時間先有增長，但全新推嘅 Threads，可以透過 Instagram 帳戶登錄登記 。基本上，Download App，按粒掣就用。版主 Keith 喺香港時間 7 月 6 日早上七點我起身，開著 Clubhouse （無錯，兩年前 ePrice 已進駐 Clubhouse 並長期透過呢個平台製作 Podcast 節目，你聽過未？未聽過 Click 呢度，或者去 Apple Podcast 聽下)，就見到有好多間房介紹緊 Threads。去到十一點嗰陣 IG 官方已經宣佈有三百萬人用緊，相信你睇緊呢篇文嗰陣，唔止呢個數。咁有乜人用緊？外國有歌手 Shakira、F1 車手 Lando Norris、地獄廚房嘅 Gordon Ramsay。華人歌手有 G.E.M ，香港有「姜濤不紅，天理不容」嘅姜 B ，仲有 Mirror 幾位成員，包括好愛 IT 玩意嘅 Edan 呂爵安！相信大把明星會 Join，追星嘅你，必玩。
▲ 果然係愛好科技玩意！Edan 一玩即 Post 相，仲問跟 IG Stories 有乜分別。
▲ 姜 B 真係 Just to say Hi
Threads 出現要多謝 Elon Musk
Threads 係 Meta 嘅一個新應用程式，呢間公司有 Facebook、Instagram 同 WhatsApp。Threads 由 Instagram 團隊設計並構建，被形容為一個「用於分享文字同埋參與公共對話嘅 App」聽落去好似幾熟悉？咁似 Twitter 嘅！啱呀！故事係咁嘅。因為 Elon Musk 入主咗 Twitter，以佢大口兼「想做就做」嘅老闆性格，攪到好多 Twitter 用戶非常唔 Like，例如 Elon Musk 話要尊重言論自由，但又居然要全體無 Follow 過佢嘅 Twitter 用戶，都要睇到佢出 Post，佢仲要係乜都亂發言。明明係保護知名人士嘅藍剔機制，變咗肯課金就有。不少知名 Twitter 用戶，好想揾地方「轉場」，所以 Facebook 母公司 Meta，完成咗呢班有「轉場」需求嘅人嘅願望，Threads, an app by Instagram 就出場啦！
今次出 Threads，Meta 都有少少醒目，唔係由 Facebook 團隊做出嚟，而係由更多年輕用戶群嘅 IG (Instagarm) 團隊開發。呢到有一個得意嘅 Side Story，就係 IG 其實係 2019 都推出個一係 IG 副 App，名字都係 Threads，但無乜人講，無乜人用，但呢個 App 名，就成為咗今日用嚟跟 Twitter 競爭嘅新社交媒體 App.
Threads 玩啲乜？唔係文字 Post 咁簡單
係 Threads 入面，你可以發佈最多 500 個字嘅訊息，呢個遠高於 Twitter 而家提供嘅 280 個字（除非你已經註冊t並課金咗 Twitter Blue）。除咗文字，你仲可以 Post 相片，最長五分鐘嘅影片同網頁 URL 網址。據知，一次過可可以 Post 十張相或短片。所以 Threads 唔止文字咁多簡單，一様可以貼相、貼 Video。一但你下載咗呢個 App，你就可以用你現有嘅 Instagram 帳戶登錄。你嘅用戶名會轉移到你嘅 Threads 帳戶。如果你有驗證，驗證都會用得番，你可以為你新嘅 Threads 帳戶自訂個人資料。然後，你可以揀自動 Follow 你喺 Instagram 上已經 Follow 咗嘅所有帳戶，同埋可以喺 Threads 應用程式中搵同加入新帳戶去 Follow。Threads 嘅 Feed，除咗你 Follow 咗嘅人動向，Meta 都會推薦內容俾你睇。所以你係新手，係 Threads 上面都唔會無朋友。
回應貼文同 Twitter 一様，你可以 Repost 其他人嘅 Post，係自己嘅 Feed 上面。你對其他 Post 嘅回應，都會係自己嘅 Feed 上面出現。
Threads 介面，回 Post 都會即時顯示
出文字 Post
可以加相，加 VideoThreads 用咗去中心代技術
對於成間 Meta 公司嚟講，Threads 係好特別。佢用咗一個去中心化嘅 Social Media 技術叫做 ActivityPub 。呢種係一種分散式社交網絡協議，可以畀社交網絡應用程式同用同樣協議嘅其他應用程式連接。用上 AcitivityPub 技術，最出名嘅係 Mastodon。Mastodon 本身係一班 IT 佬，或者 Twitter Hater 造出嚟嘅 Twitter Alternative，但用家要有一定 Tech 底先操控得到，所以一直都 Hit 唔到。
今次 Threads 會係好快嘅將來，支援 ActivityPub 技術，即係將兩個平台打通。例如，Mastodon 上嘅某個人可以要求關注你嘅 Threads 帳戶，你可以直接喺 Threads 中批准或拒絕呢個要求。然後，你可以喺 Threads 中嘅 Follow 及回應 Mastodon 帖子，而唔需要開 Mastodon 帳戶。雖然呢個功能而家仲未可以用，但 Meta 講明會向呢個方向發展。
點樣可以玩到 Threads
Threads 喺 2023 年 7 月 6 日喺超過 100 個國家及地區推出，包括香港。可以喺 Apple App Store 或者 Google Play Store 下載。最後，ePrice.HK 已進駐 Threads 大家記得 Follow 埋我哋。我哋係 Threads 會提供網站內容以外，不一様嘅內容，記得大家支持！
內容改編自：Pocket Lint