重要消息！串流音樂平台 KKBOX 香港將推出 HiFi + Hi Res 音質

左定坤 (Cho Ting Kwan) 2021-04-22 18:24 | Apps

唔知平時大家有無用手機聽開歌，用開邊個串流音樂平台㗎呢？版主我呢，平時就多數用 MOOV，自 5G 服務推出之後，而家仲支持 24 bit FLAC 無損音樂播放！至於佢嘅對手之一 KKBOX，老實講我都幾鐘意呢個平台，但音質相較 MOOV 太低了，推出咁耐都仲係得 320K，對於對音質有要求嘅人嚟講，就未必會考慮佢。然而，好消息係，KKBOX 終於開竅，會推出 HiFi 以及 Hi Res 音質！想知詳情，睇下文啦！



事實上，KKBOX 並唔係無高質素嘅音質，去年已推出過 HiFi FLAC 16 bit 音樂播放，但可惜香港遲遲都無推出，只能睇住其他地區嘅用家，可以享受高音質體驗。而今日，KKBOX 亦宣佈喺台灣推出號稱超越 CD 音質嘅 Hi Res 24 bit 音樂格式，諗諗下，香港到而家連上年嘅 HiFi FLAC 都未有，估計呢個 Hi Res 香港應該都無了吧？



不過，版主都係唔死心，就稍為八一八香港嘅情況，而據消息指出，KKBOX 香港都會推出 Hi Res 音樂格式，而且會連隨之前嘅 HiFi FLAC 音樂格式一同推出，不過實際幾時會有，暫時未有定案，據了解佢哋正在努力當中，希望能夠成功喺下星期推出得到。對於平時鍾意用 KKBOX 嘅用家嚟講，唔知呢個消息對你嚟講，係咪一個好消息呢？留言討論下啦！