金屬邊框 ＋ 6.3mm 機身
Samsung 的 A 系列一向以輕薄外型作為主打，所以大家都可以預期 Galaxy A7 厚度唔會好厚。確實， Galaxy A7 厚度只有 6.3mm 而且重量只有 141g ! 當然，要令到手機可以咁輕薄都會有相應的代價啦，同 Galaxy A3 以及 Galaxy A5 一樣， Galaxy A7 都係用左不可換電設計。另一點比較可惜係 Galaxy A7 上手感無乜金屬感，三星雖然話 Galaxy A7 用上一體成型金屬機身，但背面唔係用金屬質感，同 HTC One M8 真係金屬一體成型型號，手感係有差別。為左令大家體會到 Galaxy A7 大小，今次揀左 Samsung 旗艦級的 Note 4 來同 Galaxy A7 做個比一比。可以睇到雖然 Note 4 的 5.7 吋芒比較大，但 Galaxy A7 的高度其實 Note 4 好接近，原因 Note 4 的上下邊框比較窄。而 Galaxy A7 係用上 5.5 吋芒的情況下，闊度都能夠維持係 76.2mm，雖然就比不上 LG G3 的瘋狂窄邊框（G3 寬度只有 74.6mm)，不過勝在厚度只有 6.3mm 。整體來講，以 5.5 吋機種來計，Galaxy A7 仍然係好揸手。
▲Galaxy A7 機身大小為 151 x 76.2 x 6.3 mm，重量是 141g。 第一次手握 Galaxy A7 時候，其輕薄感真係令人留下深刻印象。畢竟一般超薄機種好少做到 5.5 吋芒咁巨型，可能因為咁所以輕薄感相對強烈。
▲Galaxy A7 背蓋設計則跟 A3 同 A5 一致，不過 A7 鏡頭突出的頗為顯眼。另外可能因為機身輕，邊框也採同樣白色漆嘅關係，真機上手，金屬質感並不明顯。
▲音量鍵安排在機身左側。電源鍵和 SIM 卡、記憶卡插槽則在機身右側。
▲ Galaxy A7 係香港推出時會支持中港 3G 與 4G，也有雙卡雙待。大家都知道 Galaxy A3 同 Galaxy A5 係用左 Sim 卡以及 Micro SD 卡共用的設計，而 Galaxy A7 都唔例外。 左邊的卡槽 1 是 Nano SIM 專用，但右邊的卡槽 2 係 Nano SIM 卡與 MicroSD 記憶卡共用，即是如果插入第二張 SIM 卡的話，就無法用記憶卡。不過 Galaxy A7 就支援雙 4G 功能，當用家使用 4G SIM 卡時，可以插入任一 SIM 卡槽，當其一 SIM 卡槽選擇為 4G 網路，另一個 SIM 卡槽就會設定為支援 2G GSM 語音 。
▲ Note 4 擁有大屏幕再加窄邊框 (右) Galaxy A7 一樣有 (左) ，所以將兩部機拍埋一齊時候，好似高階機對高階機感覺。
▲兩部機係邊框部份都做左俗稱鑽石切割的工藝處理，順帶一提，A7 的前鏡頭像素係比 Note 4 高，有 500 萬像素！
▲疊埋一齊睇就知道，A7 真係好薄 (下)！不過鏡頭個火山口設計都相對比較突出。
▲係屏幕方面，Galaxy A7 的對比度、飽和度都相當不錯。自從 Galaxy S5 之後，三星的 S-AMOLED 屏幕色準已經有明顯進步，而 Galaxy A7 的屏幕係低角度下亦未見有暗位反白情況。
▲再補上一張 Galaxy A7（左）和 Note 4（右）的屏幕細緻度比較。老實講，Full HD 解像度在5.5 吋以下的機種表現仍然不錯，同 Note 4 的 2K 芒相比實在難以睇出分別。
Qualcomm S615 + 2GB RAM Galaxy A7 效能測試
Samsung Galaxy A7 用上支援 64Bit 的 Qualcomm S615 雙四核心處理器（1.5 GHz 四核 +1.0 GHz 四核）、2GB RAM 同埋16GB ROM （支援記憶卡）。比起 A3、A5 所採用的 S410 處理器係有明顯優勢的，不過 S615 只算係中檔次的處理器，表現同用上 S800 處理器的手機相比仍然會有一段距離。至於目前有甚麼手機係用緊 S615 處理器呢？除左 Desire 820 之外亦有最近發佈的 Blade S6 ，大家可以用來做個參考。「題外話：單卡版 Galaxy A7 係採用 Galaxy Alpha 果粒 20nm 製程的 Exynos 5430 （1.8 GHz 四核 +1.3 GHz 四核），其實兩粒 CPU 比較起來，Exynos 5430 係性能上強勁唔少，如果 Samsung 出埋單卡版 Galaxy A7 都唔錯呀。」
▲經安兔兔測試，Galaxy A7 成績為 30555，過到 30000，即係性能表現唔差，跑分結果符合高通 S615 的水準，亦比版主 Lawrence 上次所測試，行 Android 5.0 的 ZTE Blade S6 快 (Blade S6 仲要係 Full HD 芒)。
▲Basemark ES 2.0 的測試則是 35.96 FPS ，未算出色，但要玩 3D 遊戲理講上都可以應付到。
1300 ＋500 萬像素相機
Galaxy A7 採用 1300 萬像素主相機，拍照介面都進化成近期三星高階機種的風格，雖然 A7 缺少 Note 4 和 S5 才有的即時 HDR 功能，但該有拍照模式都好齊全，包含全景、美肌、連拍、夜景甚至製作 GIF 動畫一應俱全，而實際拍攝時的反應速度與成像表現皆不俗。Galaxy A7 前置相機能夠拍到 500 萬像素相片，不僅是前鏡頭像素比 Note 4 的 370 萬來得高，重點是內建的美肌模式可調整嘅深度，甚至比 Note 4 還高。
▲Galaxy A7 的1300 萬像素主相機反應速度與成像表現兩方面都唔錯。
▲Galaxy A7 最高可拍攝 1,300 萬像素靜態照片與 Full HD 影片，拍照設定介面同近期高階機種採相同風格，大家應該唔陌生，但係 Note 4 的即時 HDR 功能 Galaxy A7 就無啦。
▲Galaxy A7的 500 萬像素前鏡頭相當吸引，唔似等大部分機種只能設定美肌開關，甚至可以微調柔膚、瘦小臉、放大眼睛的程度，每個項目都有八段，仲可以調得非常誇張！（應該幾岩宮雪花用）
▲ 自拍的時候仲支援手勢快門，雖然前鏡頭表現係唔錯而且功能又多，但都係有弱點的，就係暗處拍攝的時候效果沒有 Note 4 好（畢竟 Note 4 前鏡頭有 f/1.9 大光圈嘛）。
Galaxy A7 主鏡頭拍照效果
▲以上實拍可點擊放大檢視。
結語：表現唔差嘅大屏幕手機
睇完呢篇評測，相信大家對 Galaxy A7 的表現都有個大慨了解。老實講佢嘅效能已經有一定水準，相對於旗艦機 Galaxy Note 4 其實就係冇 2K 屏幕同埋更高速既 S805 處理器而已。以三千中價位黎講，買到一部有金屬感既 FHD 手機，都有一定程度的性價比。不過有留意開手機發展既網友都知道，同樣採用 FHD 屏幕的 Samsung Galaxy Note 3 仍然市場有得賣，要講大屏幕 FHD 手機既話其實亦有愈來愈平價既跡象（主要因為入門級的魅藍 Note 都用到 FHD 了…），要講到 Samsung Galaxy A7 的賣點大概就係金屬機身同埋中港 4G LTE ，然而只有 2600mAh 電池和雙卡是 4G + 2G 的組合真是有點兒令人卻步，網友們又點睇呢？留言講講吧！
在文章發佈的時侯， Samsung Galaxy A7 在香港的定價 $3,698，按此看詳細規格和最新賣價。
