今次呢組圖片來自名為 Verus 的配件廠商，佢地就話呢啲保護配件係按照一款「相當受矚目」的新產品的實際尺寸所測量製作的（指的當然就是 Galaxy S6），如果 Verus 所言不假，看來 Samsung Galaxy S6 的外型，大致上就係呢個樣啦。從呢組圖片可以發現，Galaxy S6 機背用上突起鏡頭的設計，帶有幾分 A 系列的影子（ Galaxy A7 正正就有突出的「火山口鏡頭」），而機身四角就保留左 S 系列從 Galaxy S3 以來一貫的圓弧流線 Style。
心水清的朋友都會估到，要用到突起的鏡頭設計某程度上都意味住機身會相當薄（好似 Galaxy A7 同 Oppo R5） Galaxy S6 都不例外，有傳 Galaxy S6 的機身尺寸為 143 x 70.8 x 6.91mm 。至於能否換電，目前都都未有定論。當然，各位 ePrice 讀者咁醒目都會明白 Galaxy S6 係 3 月 1 號正式發表之前會有大把傳聞出現，大家以平常心看待就可以啦。
資料來源：GSMARENA