外型大改變：前後雙玻璃設計＋超薄機身
今次 Samsung 推出的 Galaxy S6 同埋 Galaxy S6 Edge 以「設計」、「相機」同埋「電源管理」作為主要賣點。係外型設計上面，Galaxy S6 、 Galaxy S6 Edge 的外型設計一改過去的類金屬、類皮革材質組合。今次 Samsung 係機身邊框上直接用上金屬材質，同時一向用開的可拆式背蓋設計，亦都改成 Galaxy S 系列機種首次見到的前後雙玻璃設計。 Samsung 的前後雙玻璃設計並不簡單，因為 Galaxy S6 、 Galaxy S6 Edge 的玻璃內層其實加入左增光片，令手機係各種視角下都能呈現出不同層次的光澤感。另外 Samsung 係 Galaxy S6 、 Galaxy S6 Edge 加入左超窄邊框設計，二者厚度都控制在 7mm 左右，其中 Galaxy S6 的 6.8 mm 超薄機身以旗艦機種可算係相當薄。兩部機的機身尺寸分別只有 143.4 x 70.5 x 6.8mm （ Galaxy S6 ）以及 142.1 x 70.1 x 7.0mm （ Galaxy S6 Edge ）。
畫質全面提升：主鏡頭 1600 萬像素 OIS 光學防手震＋ 500 萬像素前鏡即時 HDR
除左外型設計，相機亦都係 Galaxy S6 同 Galaxy S6 Edge 的主打賣點， Samsung 就話今次兩部機唔單止做到影得快，畫質亦都唔會差咁話！事實上 Galaxy S6 同 Galaxy S6 Edge 的前、後鏡頭都有所提升，不但前後鏡都配備 F1.9 大光圈。兩部機的 1,600 萬像素主相機更加加入左 OIS 光學防手震、追蹤對焦同 0.7 秒快速啟動功能，並且係相機介面中加入快 / 慢動作錄影模式、全視角實拍等新模式。另外，提升至 500 萬像素的前鏡頭就同主鏡頭一樣，加入左即時 HDR 的光反差平衡功能，令自拍相都可以呈現出好似親眼所見咁樣的效果。
續航力 Level UP ！換電不再但支援快速無線充電
Galaxy S6、Galaxy S6 Edge 雖然輕薄而且唔似得以往的 Galaxy S 系列旗艦可以換電 ，不過就用上左支援 WPC、 PMA 標準的無線充電功能。唔少朋友都知道無線充電雖然好型但係充電的速度就真係唔多掂，不過今次 Samsung 聲稱 Galaxy S6 同 Galaxy S6 Edge 所加入的無線充電功能係能夠做到快速充電的效果！Samsung 更加話兩部機只要充電 10 分鐘，佢地的電力就足夠連續播放兩小時 HD 影片，而且要將電池叉夠 100% 亦只需花費 80 分鐘！不但如此，Galaxy S6 同 Galaxy S6 Edge 所搭載的 14 nm製程的 Exynos 7420 功耗比以往所用的處理器低，加上內建的超省電模式亦都令 Galaxy S6、Galaxy S6 Edge 的電源管理表現成為佢的主打賣點之一，至於實際表現係點？當然要留意 ePrice 的評測啦！好啦好啦，講完 Samsung Galaxy S6 同 S6 Edge 三大功能特色，大家又點睇先，快啲講下意見啦！讚同彈都可以，版主就覺得從外型上不論好睇與否 Samsung 真係睇得出有放到心機落去，大家又讚唔讚成呢？
