跌破 7 千蚊！ Samsung Galaxy Note Edge 減得最多！
今次 Samsung 眾旗艦減價版主見唔少大鋪都做緊，所以大家都唔使擔心買唔到，而幾部旗艦之中 Galaxy Edge 雖然定價仍然係最高，但就減得比較多。 Galaxy Note Edge 憑住個曲面屏幕一推出時定價高達 $7498 ，相信都嚇退左唔少貪新鮮的朋友。而家大鋪就將 Note Edge 減到 $6998 ，終於都跌到落六字頭，唔知想入手試玩曲面屏幕的朋友又是否覺得係可接受水平呢？再講講 Note Edge 的規格，以 2014 年旗艦來講實在屬於頂級水平。既支援中港 4G 而且屏幕又係 5.7 吋 2560 x 1440 解像度 S-AMOLED ，處理器方面就用上上年頂級的 Qualcomm S805 2.7GHz 四核心處理器配上 3GB RAM 同 32GB 內置容量。相機方面也有 1600 萬像素主鏡頭和 370 萬像素前鏡頭。最緊要係有得插卡同埋 3220mAh 的電池係可以更換呀！
▲ 見到 Note Edge 目前售價，版主其實都唔多相信即將推出的 S6 Edge 會平得去邊啦。。。
Galaxy Note 4 減得最少但 32GB 單卡版跌至 5 字頭！
覺得 Galaxy Note Edge 仍然係貴到離譜的朋友亦可以考慮下少左個曲面屏幕的 Galaxy Note 4 。規格上 Galaxy Note 4 同 Note Edge 一樣相近，兩機同樣係 2K 芒加 1600 萬像素相機，只係單卡版的 Note 4 用上自家的 Exynos 5433 八核處理器搭 32GB 內置容量，而用返 Qualcomm S805 2.7GHz 四核心處理器的就係只得 16GB 內置容量而定價都較低的雙卡版 Note 4 。以價錢來講今次無論係單卡版還是雙卡版減價都未算多，單卡版 Galaxy Note 4 由 $6298 跌至 $5998 ，算係到返五字頭呢個比較易令人接受的價位，而雙卡版 Galaxy Note 4 同樣係減兩百蚊，由 $5998 減至 $5798 。喜歡大芒旗艦機的朋友可以留意。
▲ Galaxy Note 4 版主都仲用緊，雖然個人覺得支筆無乜用但都算係部無乜伏嘅手機來。
減左三百蚊， Galaxy S5 吸引力大唔大？
如果嫌 Galaxy Note 系列屏幕太大又或者想用 Android 5.0 的朋友就可以考慮下 Galaxy S5 。雖然版主 Eddie 都講過呢部機係一眾 2014 Android 旗艦之中最貴，唯一一部仍然要價過四千的手機，但今次減價都比 Galaxy Note 4 多嘅，由 $4498 減做 $4198 。呢部始終企硬係四字頭雖然規格比起 Galaxy Note 4 同 Note Edge 差少少，只係得 FHD 屏幕同埋 Qualcomm S801 2.5GHz 四核配 2GB RAM 同 16GB 內置容量，但係新一代 Galaxy S6 所欠缺的防水可插卡同可換電 Galaxy S5 都有齊晒，對於想買 Samsung 5.1 吋可換電插卡旗艦的朋友來講，可能 Galaxy S5 係較適合的選擇了。
▲ 雖然價就減左，但價錢仍然要四千幾蚊，仍然係一眾 2014 大牌子旗艦之中最貴的。
坦白講，係 Galaxy S6 同 S6 Edge 即將到港的情況下版主覺得 Samsung 實在可以減多少少吸引買家，單純以減幅來講減得最多的係 Galaxy Note Edge ，但係價錢最貴又係佢。。。唔知今次 Samsung 旗艦減價又能否滿足大家呢？不妨留言講下啦。
在文章刊登時，Samsung Galaxy Note Edge 賣價為 $6998，按這裡有詳細規格及最新賣價。
在文章刊登時，Samsung Galaxy Note 4 賣價為 $5998，按這裡有詳細規格及最新賣價。
在文章刊登時，Samsung Galaxy Note 4 Dual SIM 賣價為 $5798，按這裡有詳細規格及最新賣價。
在文章刊登時，Samsung Galaxy S5 賣價為 $4198，按這裡有詳細規格及最新賣價。
