不過同時版主又發現原來不止 Samsung 旗艦機平左，連中低價手機一樣有減，講緊嘅就係你 2014 年尾推出的 Galaxy A 系手機 A3 同 A5 啦！呢兩部機唔單止係外型上一改以往 Samsung 膠機風格，而且仲支援雙卡兼中港 4G ，更重要係減價後 Galaxy A3 分分鐘係目前最平價的金屬機身行貨機！唔知今次又會否吸引啲呢？
金屬機身＋五模十七頻，Galaxy A3 、 A5 齊減兩百！
今次主角兩部雙卡中價機 Galaxy A5 同 Galaxy A3 只不過係 2014 年 12 月中推出，想唔到咁快就有減價。兩部機較突出的賣點就係主打的金屬機身＋雙卡雙待兼且支援中港 4G 。其中規格比較強的 Galaxy A5 係規格上擁有 5 吋 720 x 1280 解像度的 Super AMOLED 屏幕，處理器方面就用上支援 64bit 的 Qualcomm S410 1.2GHz 四核心處理器配上 2GB RAM 同埋內置 16GB 內置容量。相機方面就有 1300 萬像素主鏡頭和 500 萬像素前鏡頭，而電池容量有 2300mAh 但就唔可以換電。而 Galaxy A3 定價較低但係規格都略遜 Galaxy A5 一籌，屏幕方面用左 4.5 吋 S-AMOLED 540 x 960 屏幕而處理器就同樣用左 Qualcomm S410 四核心 1.2GHz 處理器但只得 1GB RAM 同埋 8GB 內置容量。相機方面係 800 萬像素主鏡頭同 500 萬像素前鏡頭搭配而電池容量則是 1900mAh 電池而同樣不能換電。Galaxy A5 同 Galaxy A3 兩部都屬於五模十七頻手機，中港 4G 頻段都齊全，所以即使唔少網友都覺得性格比不算高但仍然頗受注目。其中較多人留意的 Galaxy A5 今次減價由本身定價 $3298 下調至 $3098 ，而 Galaxy A3 就由本身定價 $2498 減至 $2298 。可能因為推出日子不算耐的關係，兩機減價都不算多，只係兩百蚊。
▲ 唔似得 Galaxy Note 4 ，Galaxy A3 同 A5 出左三個月就減價啦，不過一樣唔減得多。
預算唔多又想玩 Samsung 手機？二千樓下 Galaxy Grand Prime 一樣有減！
對於本身預算不太多又想買 Samsung 手機的朋友又有無更吸引的選擇呢？都有，因為定價更低而又推出左唔算耐的 Galaxy Grand Prime 都有減價！雖然就無左纖薄機身金屬邊框，但 Galaxy Grand Prime 就一樣支援中港 4G 同雙卡雙待，規格方面同 Galaxy A3 分別其實不大。同樣用上 qHD 解像度屏幕（但有 5 吋），而且處理器同 Galaxy A3 一樣係 Qualcomm S410 1.2GHz 四核心配上 1GB RAM 同 8GB 內置容量以及支援最大 32GB MicroSD 卡。而相機就有 800 萬像素主鏡頭同 500 萬像素前鏡頭以及有 2600mAh 的可換電池。價錢方面本身呢部 Galaxy Grand Prime 定價唔過 $1998 兩千有找，而家減至 ＄1798 ，同樣只係減左兩百蚊。
▲ Grand Prime 可以話係少數規格未致於太差而又係二千樓下的 Samsung 行貨機選擇。
減價後成最平金屬行貨機！Galaxy A3 能否吸引到你？
今次 Samsung 兩部金屬雙卡機 Galaxy A3 同 Galaxy A5 同一眾旗艦一樣減幅都相當少，只係兩百蚊。但係減完價後 Galaxy A3 $2298 呢個價錢又會否係目前市面上最平可以玩到金屬機身的行貨機呢？若果只以大牌子兼唔計大陸牌子的話的確好有可能係嘅。（Click 入下圖可睇手機比拼）不過若從性價比來睇，今次三部 Samsung 手機減完之後又能否吸引到大家呢？快啲留言講下啦！
在文章發佈的時侯， Samsung Galaxy A3 賣價 $2,298 ，按此看詳細規格與最新賣價。
在文章發佈的時侯， Samsung Galaxy A5 賣價 $3,098 ，按此看詳細規格與最新賣價。
在文章發佈的時侯， Samsung Galaxy Grand Prime 賣價 $1,798 ，按此看詳細規格與最新賣價。
在文章發佈的時侯，魅族 MX4 賣價 $2,298 ，按此看詳細規格與最新賣價。
在文章發佈的時侯，華為 Ascend G7 賣價 $2,680 ，按此看詳細規格與最新賣價。
