S7 / S7 edge 正式開賣！沒有再平⋯⋯只有更貴？
由香港發佈到而家等左一個星期， Galaxy S7 同 S7 edge 今日終於開賣啦！因為係預售期間大鋪同埋電訊商已經推出左即減優惠，令兩部本來定價已經比上一代平的旗艦價錢更加抵，反應看來相當唔錯。不過，價錢方面如果大家好似版主一樣，以為開賣就再減價，就大錯特錯了！事實上，以大鋪來講，間間都「開賣即加價」，只係睇下加得多定少咁解，版主就問過幾間大鋪，以下就係結果！先講左 Galaxy S7 先，雖然版主之前曾聽聞 S7 先係 Samsung 力谷旗艦，但大芒機才是港人最愛， S7 的吸引力明顯不及 S7 edge ，所以 S7 價錢並未有升好多，由「即減 $500」變成「即減 $400」，價錢賣緊 $4798。不過， Galaxy S7 的情況其實已經比較好了，起碼金、白兩色都有足夠的現貨買到。
▲ Galaxy S7 賣價雖然比起預售階段升左，但對比起 S7 edge 其實唔算嚴重了，係因為無 S7 edge 咁受歡迎嗎？
S7 edge 黑／銀二色全城斷貨！發生乜嘢事？
其實大鋪賣價回升，原因好多時只有一個，就係唔夠貨！而呢個情況係 S7 edge 方面就相當嚴重了，現時大鋪 S7 edge 的銀色以及黑色兩個版本已經無貨。而之前主打預訂送 VR 眼鏡的 csl 係旺角更加係三色都無貨。到到都無貨係咪因為 S7 edge 實在太抵買，所以賣斷市？版主都有打聽過，但看來同反應太好無乜關係，因為聽聞 S7 edge 的黑色同銀色本身貨量已經好少，根本唔夠供應，而反應無咁熱烈的金色相較之下貨量卻相當足夠，所以大鋪價錢就即時升返了！另外， S7 edge 係賣價上，而家都幾浮動，版主問過好幾間大鋪，價錢都唔太一致。正如上面提到，因為黑／銀二色全城缺貨，所以價錢都比較貴，當中以「即減 $300」賣 $5698 的衛訊較為平少少，但都難以同頭一日預訂時「即減 $600」相比，而豐澤、百老匯等都會貴 $100 賣 $5798 。係金色方面，價錢較為「正常」，一般都係維持返「即減 $500」左右。根據以往經驗，相信過左呢個星期， S7 edge 三色應該會返齊貨，但係黑／銀兩色比較貴的情況下，現時最平的入手方案又係乜呢？版主就覺得⋯⋯現時真係無，但可以留意， csl 係 S7 edge 方面，淨機價一律都係 $5398 ，只係無貨咁解，如果之後大鋪同 csl 都返齊貨，後者係平幾舊的情況下，有機會成為最平入手方案呢！（但留意，而家在 csl 上台出機已經無再送 Gear VR ，無咁抵了）
▲ S7 edge 黑色同銀色到港貨量相當少，版主問過差不多差不多十間大鋪，都無貨！而且價錢最貴更回升至 $5798 ，實在誇張。
▲ 有賣淨機的 csl 未有改變 S7 edge 的賣價，可惜版主係旺角區查問時卻係三色都無現貨的。（聽說係銅鑼灣還有金色版）
▲ 唔知會唔會有網友想知 S7 edge 炒唔炒得起，版主都有問過， S7 edge 頂盡都係收緊五千四左右，無炒起到。
在文章發佈時， Samsung Galaxy S7 Edge 大鋪最平賣價為 $5698 ，按此看手機規格及最新賣價。
在文章發佈時， Samsung Galaxy S7 大鋪最平賣價為 $4798 ，按此看手機規格及最新賣價。
