S7 edge 貨量增加價錢下調，大鋪終於有減價
之前都講過好幾之， Samsung S7 同 S7 edge 最抵玩的時間就係首日預售果陣，因為 S7 egde 足足減到 $600，係正式開賣之後卻反高潮地全城唔夠貨，（版主聽說是 Samsung 方面都估計失誤，以為金色會係最搶手機種，最後卻係黑、銀二色最受歡迎），到上星期貨量增加後大鋪亦無再減價，性價比方面同 LG G5 比當然比較輸蝕。不過來到今個星期，衛訊、豐澤、百老匯等大鋪除左返齊貨之外，亦再次有減價了！當中以衛訊同豐澤減得多少少，賣價係 $5698，即係減左 $300。而百老匯大家就要留意了，表面上佢哋都係減緊 $300，但版主問過，其實可以再減多 $100 ，即係賣價 $5598。不過，同之前一樣，入手 S7 edge 只會送張芒貼同公司贈品。
但講到減價多，不得不提 Samsung 專門店。之前有網友提過， Samsung 專門店仍然有「即減 $600」優惠，版主去查問時，得到的答案就係三色同價，價錢即減 $400，但係用現金或者 EPS 就可以平多 $100，即係可以做到 $5498，至於現階段值唔值得入手？版主就覺得短期內再下調的空間還是有的。如果純以淨機價錢來講，其實 csl 仍然係比較抵玩的選擇，因為佢哋而家仍然未有將 S7 edge 價錢調高，一樣係 $5398。不過版主問過仍然係無貨的。
▲ 而家 S7 edge 係大鋪最多只係減 $300 ，比起 S7 還要少，同預訂情況截然不同。
▲ 雖然 csl 方面未有更改 S7 edge 的淨機價，但就一直沒有現貨。
▲想唔到，最抵玩會係 Samsung 專門店，即減 $400 之餘，用現金或者 eps 再平多 $100 ，而且三色同價！
HTC One A9 32GB 版本大鋪再減價
HTC 新旗艦 10 推出，係香港方面肩負重任的 One A9 看來都有空間可以再減價。如果要數返 One A9 對上一次最低價，應該就係 3HK 搞的限量 50 部排隊優惠，價錢兩千有找。 Smartone 網上商店開張時，都推出過「超級優惠」，將 A9 劈至 $2249 ，仲送埋 Quick Charge 2.0 充電器。不過而家 3HK 都唔會再推優惠，而且 Smartone 已經無再賣 32GB 版 A9 ，想要入手的朋友唯有留意返大鋪了。近日衛訊就將 One A9「即減 $1100」，賣 $3398 。價錢雖然有減，但之前電訊商劈價劈得咁激，大家仲會唔會係三千樓上呢個價位入手 One A9 呢？留言講講吧！
▲HTC One A9 32GB 版本賣價如果跌至 $3000 有找，相信會有不少捧場客？
在文章發佈時， Samsung Galaxy S7 edge 淨機最平賣價為 $5398 ，按此看手機規格及最新賣價。
在文章發佈時， HTC One A9 (32GB) 大鋪賣價為 $3398，按此看手機規格及最新賣價。