開賣一個多月，S7 / S7 Edge 大舖賣價依然處於高位
如果你一直都有留意開 S7 系列的話，應該記得 S7 系列未正式開賣，正在接受預訂的時候，最多可以減 $600，S7 同 S7 Edge 的建議零售價分別為 $5198 以及 $5998，而當時的預售價就係 $4698 以及 $5398。叫唔叫做減得多呢? 版主覺得就話多唔多，話少唔少咁啦! 點知一開賣，就應驗左「早買早享受」呢句說話，大舖的賣價開始偷偷回升。直至而家，S7 雙機在大舖的售價依然未返到去預售價位，豐澤、衛訊、百老匯的目前售價都係一樣，S7 依然係賣緊 $4698，而 S7 Edge 則為 $5598，並沒有任何「暗價」可言。
▲ 衛訊 S7 寫住「即減 $500」，而 S7 Edge 寫住「即減 $400」，即係分別為 $4698 同埋 $5598。
▲ 豐澤同埋百老匯就直接寫現時售價出黎，同衛訊都一樣價錢。
▲ Samsung S7 系列目前仲係做緊官方的限時推廣優惠，只要於 2016 年 5 月 1 日 23 時 59 分前到特約零售商 (包括以上三間大舖) 購買 S7 系列手機，並上網登記，就可以免費獲得額外一年的保養期，即係總共 2 年，你會唔會把握呢個機會，在限期前買呢?
細舖跌價，低於大舖預售價! 是時候入手了嗎?
講完大舖，大家應該都知道，而家在大舖買 S7 / S7 Edge 未必係最佳時機，除非你貪佢有 2 年保養，咁會唔會有更便宜的選擇呢? 呢個正正是呢篇文章的重點所在! 話說，今日版主就去左深水埗行場，去左不同的細舖問價，留意到而家細舖的價錢，唔單止比大舖平，賣價仲比起當時「預售價」仲要低添! 首先講下 S7，S7 目前細舖的售價為 $4480，比起大舖當時的預售價仲要平超過兩舊水，至於 S7 Edge 又點呢? S7 Edge 就賣緊 $5280，比目前大舖的售價平成三舊水，講平，又唔算話平好多，而且比大舖買少左 1 年保，但係唔知呢個價錢，合唔合你心水呢?
其實版主唔單止在深水埗行過，番到去旺角的時候，亦都上左先達巡個圈，見到 S7 同 S7 Edge 的賣價都係咁上下，有先達店主就話，呢個價已經好平架喇，來貨價都要 $5200，實質賺得你 $80，你信唔信? 唔通 $5280 真係已經係極限? 講下題外話，HTC 10 香港開賣之日愈來愈接近，見到開始陸續有水貨接受預訂，估計到 HTC 10 抵港之後，大舖可能會將 S7 以及 S7 Edge 的售價再減，你會唔會等到果一日呢?
▲ S7 細舖的賣價為 $4480，比大舖當初的預售價仲要平。
▲ S7 Edge 就賣緊 $5280，比大舖目前售價仲要平 $300，你會點揀?
在文章發表時，Samsung S7 大舖賣價為 $4698，按這裡有詳細規格及最新賣價。
在文章發表時，Samsung S7 Edge 大舖賣價為 $5598，按這裡有詳細規格及最新賣價。
