前代旗艦大清貨! Z5P、Note 5 大舖減價，最多劈二千六!

左定坤 (Cho Ting Kwan) 2016-04-27 20:47 | Samsung

相信大家都知道，大舖同網絡商一直都鬥得好犀利，特別是 csl. 的「淨機超激價」，大舖減完 csl. 減，csl. 減完又輪到大舖減。大約 4 月中果陣，版主 Lawrence 就同大家提到 csl. 又再出招，將一眾大舖旗艦機劈價劈到平過大舖。正當大舖又再準備反擊之制，數碼通忽然亂入加入劈價戰團，而且仲將 Samsung 旗艦劈價最多二千六，大舖、csl. 即刻要行埋一邊。想知邊部機有得減，睇下文啦!



數碼通亂入減價戰! 三星前代旗艦怒劈二千!
Samsung 旗艦手機 S7 都已經推出左差不多個半月，可以見到舊代旗艦都陸續在大舖、細舖減價，可惜始終減的篇幅並不大，不過偶然都會有意外收獲。而繼 CMHK 「手機特賣場」早前將 S6 Edge+ 進行瘋狂大減價之後，數碼通日前亦都有樣學樣，將 Samsung 前代旗艦大幅減價，S6 Edge 最多減左二千六。根據 SmarTone 的網上商店顯示，白色版本的 S6 Edge (32GB) 現售 $3698 (原價 $5698)，而綠色特別版 (64GB) 則售 $3898 (原價 $6498)。事實上 S6 Edge 在百老匯已經無得賣了，最後賣價都係劈左二千，不過係陳列品，而家同樣價錢可以買到全新的行貨機，大家係時候入手了吧?


▲ 白色版本售價 $3698。

▲ 綠色特別版則售 $3898，相比原價平左成 $2600!

減價戰不斷! 大舖 Z5P、Note 5 劈價打 csl.
講完數碼通的「亂入」之後，係時候講番大舖與 csl. 之間的減價戰。csl. 的「淨機超激價」就在月頭再出動，將 V10、Z5P、Note 5 價格調低，平過大舖搶生意，大舖不甘落後，近日再偷偷將部份旗艦劈價，除左 V10 減到 $4098 (仲係比 csl. 貴) 之外，Z5P、Note 5 都有減。

睇番 csl. 的「淨機超激價」，擁有 4K 芒的 Sony 旗艦 Z5P 賣緊 $4698，而 Samsung 旗艦 Note 5 的 32GB 版本就 $4488。再望望大舖，之前兩部機分別做緊「即減 $1600」以及「即減 $1100」。不過 csl. 劈價，逼使大舖都要劈，比之前減多一舊，同 csl. 同價。

不過，即使大舖同 csl. 係咁鬥減價，但依然係唔夠細舖抵，如果你想平少少入手 Z5P 或者 Note 5 的話，Z5P 細舖而家做緊 $4380，而 Note 5 則賣 $4398。


▲ 大舖近日都將 Note 5 劈價至 $4488，同 csl. 持平。


▲ 至於 Z5P，大舖就做緊「即減 $1700」，即 $4698，亦跟左 csl 個價。


▲ 細舖方面，Note 5 賣緊 $4398。


▲ 而 Z5P 則做緊 $4380 呢個價錢。

Sony Z5 Premium 在文章發表時，大舖售價為 $4698，按這裡有詳細規格及最新賣價。
Samsung Galaxy S6 Edge 在文章發表時，大舖售價為 $4498，按這裡有詳細規格及最新賣價。
Samsung Note 5 在文章發表時，大舖售價為 $4488，按這裡有詳細規格及最新賣價。