三星 C5、C7 大賣，細舖仲有得平
Samsung Galaxy C5 與 C7 真係好屈機，用品牌嘅知名度力推無乜性格嘅手機設計，仲用多 RAM 多 ROM 做賣點。老實講，版主一早知好賣得，由樣都價都係好中 Point。所以大舖只係減幾百，一樣成為近來最好賣嘅手機之一。關於 Samsung Galaxy C5 與 C7 嘅大舖價，其實係預訂個陣已訂左，我地都已報過晒，分享文最低部份，包括我地嘅 C5 與 C7 嘅手機介紹，都有列明最新大舖賣價。若想更平，其實深水埗嘅細舖仲平少少，但不算有驚喜：C5 (32GB) 賣價為 $2398、C5 (64GB) 為 $2698。比較受大家留意嘅 5.7 吋芒 C7 (64GB) 賣價為 $3098。其實平舖一百左右。總結一句：三星手機，機價企得好硬。
▲ 64GB ROM 大容量，係賣點來架。。。
二千有找入手 5.5 吋 64GB ROM 手機
5.7 吋芒嘅 C7 最平都要三千! 但 C7 其實用 Snapdragon 625 處理器，效能只可以說是中階級別。其實 64GB ROM 手機，可以考慮 OnePlus 3。OnePlus 3 香港沒有正式零售點，都要你上佢地官網入手，若果你地好心急，深水埗福仁嘅舖頭，大陸水貨都係一樣價：$3098。其實，版主嘅試機，都係中國大陸版。OnePlus 手機嘅 ROM 一直可以任改，所以都係可以用上國際版嘅 OxygenOS ROM。OnePlus 3 用 Snapdragon 820 + 64GB ROM + 6GB RAM，呢個規格，當要賣得貴過 C7 啦。
▲ OnePlus 3 大陸版係深水埗 $3098 可以入手。
但講到最早用上 64GB ROM，一定要做 ASUS Zenfone 2 Deluxe。大家都知，第三代 Zenfone Deluxe 版，Zenfone 3 Deluxe 八月底左右推出，上一代版本，當然要減價。大舖已減到 $1999，二千有找，4GB RAM + 64GB ROM。當然，版主都要提醒大家，佢用嘅 Intel CPU，到今日都未能順利升級至 Android 6.0，都係用 Android 5 架咋，係電量效能部份，無用 Android 6 嘅 Zenfone 2 系列咁好。大家要買平機時， 要留意了。
▲ Zenfone 2 Deluxe 二千有找，你會入手嗎?
