三星「On 7 (2016)」明日開賣，呢個價貴定平？
補充一點，Samsung Galaxy On 7 (2016) 只係大陸先咁叫，睇黎 Samsung 都擔心，如果香港都叫 On 7 (2016)，又會俾網友笑，所以最後香港唔會叫 On 7 (2016)，而係叫 J7 Prime。Galaxy J7 Prime 明日起正式開賣，香港建議零售價為 $2398，有玫瑰金、金以及黑三種顏色。不過版主問過，有部份細舖今日已經有 J7 Prime 香港行貨開賣，大約比原價平多 $100 左右，呢個價，你會唔會揀佢呢？而佢另外有個細佬叫 J5 Prime，則會在一星期後，即 10 月 14 日正式開賣，建議零售價為 $1998，有玫瑰金、金兩種顏色。
▲ Samsung Galaxy J7 Prime 香港建議零售價為 $2398，而佢細佬 J5 Prime 則賣 $1998。
不要「On 7」，差不多價錢可以有甚麼選擇？
其實，Samsung Galaxy On 7...... 唔係，應該係 Galaxy J7 Prime (其實 On 7 好似順口啲～
)，賣價 $2398，有 Qualcomm S625 八核心處理器 (台灣版本係 Exynos U，買水貨的話要留意)、3GB RAM 以及 32GB ROM，其實算係合理價錢，直澄係打緊自己部 C7......C7 當初都咁好賣，J7 Prime 平啲又會唔會更好賣呢？不過，其實中階機又唔係得 Samsung 抵玩，差不多價錢，就又會唔會考慮 HTC 手機呢？同樣 3GB RAM + 32GB ROM 中階機，其實 HTC One X9 都係一個唔錯的選擇，唯一衰就衰在處理器，雖然都係八核心，但用上 MTK Helio X10。不過就性價比來說，X9 今時今日呢個價，都已經叫唔差。HTC X9 而家細舖已經跌到落 $2198，仲平過部 J7 Prime，你又點睇呢？如果唔想要 MTK U，都可以諗下 HTC One A9，用 Qualcomm S617，樣似 iPhone，但就得 2GB RAM。16GB 版本最新細舖價為 $2298，而 32GB 版本則賣 $2498。
▲ 在深水埗鴨記，HTC One X9 的細舖價已經跌至 $2198。
▲ 上圖只作參考。在深水埗細舖見到最平賣價約 $2298 (16GB) 以及 $2498 (32GB)。
加多幾舊水，唔要中階買舊代旗艦，你制唔制？
除左 HTC One X9 以及 A9，在差不多價錢的大前提下，其實你絕對係可以加多幾舊水，買到上代旗艦。講嘅係 LG G4，雖然規格放在今日來說，已經淪落到「中階」的配置，只有 Qualcomm S808 處理器 + 3GB RAM + 32GB ROM，不過對於版主呢啲喜歡影相的人，G4 具有 OIS 光學防震，其三軸防手震技術，能夠讓低光源拍攝時，保留清晰的影像，影相質素應該會比 Samsung J7 Prime、HTC One X9 好。LG G4 的最新細舖價為 $2880，亦即係話，如果你唔想要 J7 Prime，加多五百左右，就可以換到部旗艦機，大前提係，你唔怕佢隨時死底板 (不過死底板原廠都有得保嘅......好過爆
）。Samsung Galaxy J7 Prime、HTC One X9 / A9、LG G4，三部機當中，你會點選擇呢？
▲ LG G4 最新細舖價為 $2880，估計已經見底。
Samsung Galaxy J7 Prime 在文章發表時，賣價為 $2398，按這裡有詳細規格及最新賣價。
LG G4 在文章發表時，賣價為 $2998，按這裡有詳細規格及最新賣價。
