小升級，貴幾舊！三星 C7 Pro 新 U 又新色，網友有興趣？

左定坤 (Cho Ting Kwan) 2017-02-09 21:45 | Samsung

記得年頭果陣，三星送左一份不錯的「禮物」俾大家，Galaxy C 系列減價，無論係 C5 還是 C7，都有得減。唔理減得多與少，總之一部本身性價比算係高嘅手機再有減價，點都係一件好事。不過一向賣價企硬嘅三星，會咁好死無啦啦減價？原來係因為知道有後繼機出！三星今日正式宣佈推出 C7 的後繼機種 C7 Pro，同 C7 相比，其實只係小升級，用左粒新嘅 U，粒 U 實際係點，版主都想知，比較受關注嘅係，呢部機又會賣幾錢？睇下文啦！



所謂三星 Galaxy C7 Pro，主要分別其實不過是處理器唔同左，C7 用上 Qualcomm S625 處理器，而 C7 Pro 則改用 S626，粒 U 實際性能，版主暫時未知，只知道佢係用上 14nm LPP 製程，並提供了 TruSignal 天線增強技術。另外就係前置相機由 800 萬像素升級至 1600 萬像素，當然像素大並不一定影得靚，實際拍攝效果如何，就版主有機會就試俾大家睇。其餘嘅嘢就同 C7 無乜分別，一樣係 4GB RAM + 64GB ROM，有 3300mAh 電池，顏色方面比較特別，除了金色同粉紅色之外，仲有 C7 上沒有的深藍色。



價錢方面，C7 Pro 將於 2 月 17 日開賣，建議零售價為 $3398，按照過去 C7 的經驗，估計大舖好大機會一出唔會減，比現時 C7 嘅 $2998 貴四舊，唔知係咪，估姐嘛～ C7 剛出果陣，引來的迴響都幾大，唔知呢部 C7 Pro 又吸唔吸引到你呢？

Samsung Galaxy C7 Pro 在文章發表時，將於 2 月 17 日上市，建議零售價為 $3398，按這裡有詳細規格及最新賣價。