三星 Galaxy Fold 上手第一感覺 + 實機外觀分享
用得太多唔同廠商嘅手機，部部手機設計都一式一樣，好難可以畀到版主新鮮感，而三星 Galaxy Fold，就係近期難得一部有興趣玩下嘅手機。先唔講有無好多實用性功能，第一感覺就係：特別！想玩！試諗下，當你揸住部 Galaxy Fold，然後喺巴士 / 地鐵揭開、合埋、揭開、合埋，周圍身邊嘅人個個都好奇咁望住你手上嘅 Galaxy Fold - 畢竟，設計咁特別，好易一眼認出，再加上呢部手機本身貨量就唔多，唔會太多人擁有，係威嘅~
再來講下對外觀上嘅感覺。摺埋果陣佢嘅機身體積係 160.9 x 62.8 x 17.1mm，係有啲厚身，但本身部機比較窄，所以整體都幾好揸手。但有一點我係有疑問，明明身長有 160.9mm，但表面個 Super AMOLED 屏幕，就只有 4.6 吋，令到屏幕上下嘅空間，感覺用唔盡咁，呢個位個人認為有少少浪費咗。如果，呢個細屏幕可以保留好似現今大部份手機般嘅全屏幕，最多係鏡頭部份加個「打孔屏」(三星嘅 Infinity-O 設計)，相信會更為吸引。
至於由細芒揭開變成大芒之後，屏幕尺寸就變成了 7.3 吋，唔係用 Super AMOLED，而係 Dynamic AMOLED。大家都係 AMOLED，咁兩者最大差別係咩呢？最大嘅分別就係 Dynamic AMOLED 係擁有 HDR10+ 認證，細節相對更多，色彩範圍亦更寬廣。而由細芒變大芒嘅過程，其實係好 smooth，版主轉頭再同大家講。
合上屏幕時 4.6 吋，右上有一個 10MP 前置鏡頭
打開屏幕時 7.3 吋
三鏡頭主相機
打開後都見到有雙前置鏡頭
虛擬鍵設於屏幕右邊，方便用家右手操作
機身右側有開關鍵、音量鍵及指紋鍵
左側則有 SIM 卡插槽，香港版只支持單卡。
機底有喇叭及 Type C 插槽。
▲ 拍埋落 Galaxy Note10 隔離，Galaxy Fold 摺埋之後嘅厚度大約係 Note10 嘅一倍。
三星 Galaxy Fold 個芒有得摺，有乜咁好？
其實點解三星 Galaxy Fold 要有「摺」呢個設計呢？其實最主要嘅目的，就係想令到一個裝置，手機 / 平板兩用。摺埋當手機，打開變平板，唔使再分開一部手機一部平板咁麻煩。而初玩 Galaxy Fold，版主認為佢有兩個幾實用嘅特別功能：1) 細芒畫面「無差別」變大芒 --> 「無差別」即係點？唔係你近呢幾個月聽得多嘅「無差別」嘅解釋，而係指，例如你細芒開住相機 / Google Map 之類，一打開變成大芒，顯示嘅畫面依然係 Google Map，只不過係變成「放大版」，方便觀看。
2) 多工功能，可同步使用多達三個應用程式，支援一個大視窗以及兩個小視窗。
▲ 以上為關於摺芒特點嘅小示範。
三星 Galaxy Fold 效能速測
規格方面，三星 Galaxy Fold 配備了 Qualcomm Snapdragon 855 7nm 處理器，內置 12GB RAM 以及 512GB ROM，電池容量為 4380mAh。效能部份，我會用 AnTuTu 安兔兔跑分以及 AndroBench 5 進行測試，前者測試 CPU / GPU 效能，後者測試 ROM 的讀寫速度。
▲ 安兔兔跑分結果為 445902 分，以 S855 手機來說是合理成績，當中的 CPU 分數為 133945 分，而 GPU 的分數則為 174957 分。
▲ 至於 AndroBench 5，用來測試手機 ROM 的連續 / 隨機讀寫速度，連續讀寫速度分別為 1478.64 MB/s 和 401.76 MB/s，符合 UFS 3.0 的標準。而最影響到使用體驗的隨機讀寫速度，則分別為 150.09 MB/s 以及 32.96 MB/s，相比 Galaxy S10+ 略快。
小結
期待已久的三星 Galaxy Fold，今日終於得償所願上手試玩，造工非常精美有份量，確係無令我失望。講到年度最有特色嘅手機，絕對非佢莫屬，而雖然 Galaxy Fold 比起預期係遲咗好多推出，但其實我覺得都係一個合適時機，喺競敵未推到自家摺機之前，先嚟一個下馬威，搶一搶網友視線。不過，雖然我個人認為 $16000 唔算貴，而且係比我想像中平得多，但無可否認對於普通打工仔嚟講，其實未必捨得。但對於高端人士或者手機愛好者嚟講，呢部手機幾貴都應該值得考慮。網友又點睇呢？三星 Galaxy Fold 在文章發表時，建議零售價為 $15998，按這裡有詳細規格及最新賣價。
