可換電池手機回歸? 二千中入手三星三防手機 XCover 5

左定坤 (Cho Ting Kwan) 2021-04-13 12:50 | Samsung

提到三防手機，好多時網友都係第一時間諗起 CAT 或者 Ulefone，前者就一般價錢偏高，後者就 sell 平但性能麻麻，比較常用 MTK U。若果唔想要 MTK U，又想用國際品牌手機，市面有無咁嘅手機呢? 有! 三星 今日宣佈推出三防手機 XCover 5，除咗有防水防塵防撞等規格，更值得一提嘅係佢居然係用上可換電池設計! 想知賣幾錢，睇下文啦!



三星 今日發出新聞稿，宣佈正式在香港推出 XCover 5，建議零售價為 $2498，2021 年 4 月 14 日起正式在各大零售商開賣。二千中就買得到呢部手機，價錢唔算高。

至於個餡係點？三星 XCover 5 採用了 5.3 吋 TFT 屏幕，解像度為 1480 x 720，配備 Exynos 850 八核心處理器，內置 4GB RAM 以及 64GB ROM，電池容量為 3000mAh，支持 15W 有線快速充電，並且採用可換電池設計，平時帶定幾舊電出街，唔使驚唔夠電用。相機採用 16MP 主鏡頭，而前置鏡頭則為 5MP。另外，手機支持 1.5 米防震、IP68 防水防塵、 MIL-STD-810H 軍規防撞規格，並支持手套觸控，就算去到好凍地區戴住手套，都可以控制得到手機，而手機亦有三卡槽，並支持 NFC。