真機外觀
香港行貨推出的顏色都相當豐富，分別是灰、紫、淺綠、白四種顏色，係 6 月 25 日就已經開賣左。 本 YK 到手的是灰色，由於是提早到手的緣故，所以無箱可開，只有港行真機一部。
▲ 機身採用 6.6 吋 FHD+ LCD 屏幕，支持 90Hz 流暢刷新率，碌網頁會覺得畫面更順暢。
▲ 磨砂玻璃背蓋質感相當好，在光線照射下亦會顯現出不同的折射效果。
▲ 磨砂設計亦可以儘量減少殘留指紋的痕跡；一部入門定價的手機黎講，A22 5G 的質感相當之高。
▲ 三星安排的 3 鏡頭方案：主鏡頭是 f/1.8 大光圈 4800 萬像素，另配 500 萬像素超廣角鏡和 200 萬像素景深鏡頭；稍後會有實拍樣本。
▲ 三星稱爲 Infinity-V 設計的水滴屏中，具有一顆 800 萬像素 f/2.0 光圈的前鏡頭。
▲ 機身底部除了 USB-C 口外，亦保留 3.5mm 耳機口； 另備一個外放喇叭。
▲ 機身右側有整合式指紋識別電源鍵、音量鍵。 按鍵感清晰、反饋亦相當明顯，更重要係整合式指紋識別器邊沿切割工整，並無出現其他手機刮手嚴重的問題。
▲ 至於機身左側就是三卡槽，支持雙卡雙待外，亦支持最高 1TB 容量的 microSD 卡！
性能實測
三星出品呢部 Galaxy A22 5G，用料上都相當不錯：預載 Android 11 系統，並採用發哥 MTK 的天璣 700 MT6833V 八核心處理器，配 6GB RAM + 128GB ROM 儲存空間。 功能上加入 Dolby Atmos 音效，仲有埋 Dual Messenger 方便你一部機開兩個相同的即時通信軟件。 可惜係，雖然 A22 5G 提供 NFC 硬件，但就無下放高階型號的 Samsung Pay 功能。至於其他硬件例如 5GHz WiFi、藍牙 5.0、四定位系統等都有齊。
▲ 安兔兔性能測試獲得 307427 分，略高於其他同樣採用天璣 700 處理器的手機。
▲ 在 Androbench 讀寫測試中，A22 5G 分別獲得 299MB/s 和 187MB/s 連續讀寫速度； 至於最能體驗日常操作流暢度的隨機讀寫項目，無法讀寫皆破百，分別是 109MB/s 和 70MB/s 速度； 但在一般操作中並無反應遲滯的情況，流暢度和反應速度都相當不錯。
▲ 至於 Geekbench 5 測試中，單核心獲得 560 分、多核心獲得 1732 分；
▲ 處理器的性能實際上可匹敵高通 7 系處理器！
▲ 擁有 5000mAh 大電池的 A22 5G 續航力自然備受期待，係 Geekbench 4 續航測試中，獲得 9960 分（好多同樣電量的手機都只係得 6XXX - 8XXX 分咋）！ 而且連續 16 小時的燒電測試中，完全沒有出現過任何負載不足！ 證明 A22 5G 的續航力相當強橫，完全可以放心用成日機喇！
相機實拍
入門機本來就唔應該期待相機有超好的表現，但照樣配上 4800 萬像素鏡頭之餘，亦加入人像、夜景模式，甚至專業模式都加埋落去。 咁到底實際影出黎效果又係點呢？
▲ 呢張相瓶身綠色的還原度相當準；高像素鏡頭的好處係放大後，依然會見到綠色標籤中的暗紋。
▲ 但本 YK 發現，A22 5G 會出現偏色的情況，例如上述鍵盤場景，會刻意推白本身偏黃的鍵帽； 但 A22 5G 內置專業手動模式，支持「半 Check White」的玩法，就可以輕鬆還原現場肉眼所見的色彩。
▲ 同樣的場景下，超廣角模式的色準程度亦比主鏡頭高； 慶幸三星並無加入「雞肋」長焦距鏡組，手機一般拍攝的情況下，超廣角實用性會更大更常用。 但超廣角的成像就相當鬆散，畫面內線條的細膩度不足。
▲ 如果你中意濃郁的色彩，A22 5G 預設影出黎的色彩濃度相當高，搶先一步幫你自動 PS 左圖就可以上得 IG 見人喇 ~
▲ 透過景深鏡頭生成的散景相，大家不妨放大張相睇睇，對比埋另一張主鏡頭拍攝的相片，A22 5G 的人像模式虛化過渡亦相當自然，睇唔到有明顯的區域分割痕跡。
▲ 上圖是主鏡頭一般模式下拍攝的 Elmo 杯，肯定係雜訊多、油畫強架喇。 因爲現場係一個無開燈的廁所，單靠走廊黯淡的吸頂燈，根本無辦法睇得清楚。
▲ 但個夜景模式...... 真係就唔好有太高期望。畫面亮度係提高不少，雜訊亦減少，長達 4 秒的數碼對焦算法亦明顯提高相片內物件的清晰度，但油畫化問題更加嚴重，夜景模式的驚喜感不足，差異之細出乎我意料之外。
結論
如果你等緊消費券第一期 2000 蚊到手買手機，三星 Galaxy A22 5G 剛剛好可以一炮過食晒佢。 本 YK 相當喜愛呢部平價 5G 新機，原因係佢優點缺點都相當明顯。 市場上要一部 5000mAh 電量 + 真三卡的手機已經寥寥可數，更何況 A22 5G 提供 90Hz LCD 屏幕和下放 Dual Messenger 功能。 要尋找一部國際大品牌的千元機工作用副機，你會發現 A22 5G 係「THE CHOSEN ONE」。
你可能話「A22 5G 相機表現好一般咋！」 朋友，你睇緊的是「千元級」手機，邊度有手機會係完美呢？ 更何況 A22 5G 亦不失爲一部小朋友 / 長輩機之選，提供刪除 App Drawer 的選項，亦具備 「SOS 短信」求救功能等實用功能。 所以，呢部三星出部 A22 5G 真係殲滅中國品牌 Cheap 機的大殺器。 最起碼，我玩到愛不釋手先啦 ~
