ZTE Blade S6 外型：「仿金屬」機身手感不錯
係首發前有關 Blade S6 的傳聞多數都係話佢「致敬」左 iPhone 6 的設計同埋又玩金屬邊框乜乜乜。不過版主試玩時就發現銀色版的 Blade S6 雖然係外觀上的確同 iPhone 6 非常相似，但不論係銀色版定係粉紅色版， Blade S6 的背蓋連邊框都係用左塑膠質料！而且版主所用試玩的粉紅色版外觀其實同一樣用左膠殻的 iPhone 5C 更為相似，期待平玩金屬手機的朋友今次就可能失望了。係外型同厚度上，版主其實係幾滿意的，7.7mm 雖然唔算好薄，但配合 5 吋芒來講單手操作都仍然算勉強可以的（但唔係話完全可單手操控啊），機身雖然無用上金屬質料但所用的塑膠質料拎上手使用時都算舒服。值得留意係，今次的 Blade S6 雖然無用一體成形的金屬設計，但一樣係不能換電的，所以只得 2400mAh 的電量又不能換電兼且 ZTE 並無提到 Blade S6 有快速充電功能。對電量有要求的朋友入手前就要留意啦。
▲ 兩種顏色的機背比人感覺都好唔同，銀色係有金屬 feel 的膠機，粉紅色係有膠感的膠機。
▲ 厚度來講 7.7mm 不算很薄，但手感是可以的，對比 Galaxy Note 4 當然比較薄啦。
▲ Blade S6 用上熱感式按鍵，雖然外觀上有簡潔的感覺，但一開始用時就令人分不清究竟邊個係 back 邊個係多工按鍵。（左邊係 back ，右邊係多工）
支援 4G + 2G 雙卡但不支援大陸 4G 頻段，HD 屏幕質素不錯
同好多國產手機一樣， Blade S6 都係有雙卡功能。而當中將兩個 SIM 卡槽同 SD 卡槽分開版主覺得係抵讚的(事實上呢種 SIM 卡同 SD 卡共用設計版主成日都好懷疑咁算唔算得上係真正的雙卡
）但要留意並唔係兩個卡槽都可以用到 4G 的，只有 SIM 卡槽 1 可以，而另一個只有 GSM 。另外，可能因為今次 ZTE 目標係外國市場的緣故， Blade S6 係唔支援大陸 4G 頻段的，對中港 4G 有要求的朋友就可以無視呢部機了。係屏幕方面， Blade S6 用上左 5 吋的 720p 高清屏幕，以今日標準來講 HD 屏幕真係算唔上出色，但版主試用時就都相信 Blade S6 的屏幕仍然係足以令大家滿意的，係可視角度同銳利度兩方面來講都唔算差。
▲ 兩個卡槽都置於手機的左邊， Micro SD 卡最大支援 64GB 。而 SIM 卡槽係有 1,2 號之分，只有 1 號卡槽可以用到 4G 。
▲ 以可視角度來講，版主覺得 Blade S6 係做得唔錯的，同 Galaxy Note 4 比分別不大。
▲ 係銳利度上，Blade S6 都算做得出色，仔細睇字體同 icon 都無唔清楚的情況。
ZTE Blade S6 跑分測試！與 Desire 820 、 Oppo R5 相比未算出色
如果話今次 Balde S6 的問題係邊，版主相信係硬件效能上，唔係話 Blade S6 差，只係可能會令人失望。雖然 ZTE 以全球首部 S615 處理器配上 Android 5.0 作為 Blade S6 賣點，不過相信大家都知道 Qualcomm S615 即使號稱係 64bit 八核心，亦只不過係一款中檔效能的處理器。可能因為咁， Blade S6 係上左 Andorid 5.0 之後跑分成績方面除左 Basemark 2.0 ，其餘同一樣用上 Qualcomm S615 的手機例如 HTC Desire 820 以及 Oppo R5 相比真係算不上出色。當然，有一定程度上今次跑分成績都受到部份測試效能 app 未更新所影響，所以大家都係參考下就好。至於實際使用上，版主覺得 Blade S6 大致係暢順的，但係同時運行數個 apps 時就會有輕微 lag 的情況出現。
▲ 可能係 Quadrant Standard 都有一段時間未有 update ，未能完整對應 Andorid 5.0 的關係，Blade S6 只得三千分，仲低過 HTC One X ！所以都幾難以作準。 而安兔兔上版主試過幾次都無一次可以上到三萬分的水平，同 Desire 820 相近而稍低於同樣用上 S615 並且得到三萬分以上的 OPPO R5。
▲ 係 Vellamo 上面，係 Browser 方面 Blade S6 2425 分，算係不錯。但係多核同硬件速度兩個項目上都達唔到四位數字，而多核分數上分數甚至比 Galaxy S3 低，實在令人驚訝。
▲ 係 Basemark 2.0 上面 Blade S6 就相當不錯了， 59.70 呢個分數比 Desire 820 同 Oppo R5 都要出色。玩 3D 遊戲理論上係無乜難度的。
預載大量自家特別功能但實用性。。。
係 Blade S6 屏幕同處理器規格都未算標青的情況下，佢又有乜嘢特別的賣點呢？就落左係一系列「獨特」的自家功能身上啦！係相機方面，除左本身用上 Sony IMX214 感光元件的 1300 萬像素主鏡頭之外，仲有 Pro Mode Camera 模式同埋 Full Screen Shutter 模式。前者其實好多牌子都有類似功能，就係讓用家自訂 ISO 等數值，而後者就係將整個屏幕都變做快門，版主個人就覺得以上功能都唔太吸引啦，反而前置鏡頭有 80 度廣角可能會有用一點（但又比不上 Galaxy A5 的 106 度廣角自拍）。另外 Blade S6 賣點就係幾種 Air Gesture 功能例如按住 volume ＋ 掣再將手機做過 V型動作可以啟動相機。雖然頗有創意，但實用性就。。。大家自行定奪啦。
▲ 一張圖大概可以總括到 Blade S6 的特色功能，分別係相機上的 Pro Camera mode ，Hi-Fi 音響功能同埋 Air gesture 手勢功能，版主相信 Hi-Fi 音響功能會比較多人用。
總結：整體不過不失，性價比未算頂級
其實 Blade Z6 俾版主的印象就係一部定位頗為尷尬的手機，簡單來講就係比人一種兩頭唔到岸的感覺。有 4G 又兼雙卡固然好，但有雙卡而無中港 4G 亦令人唔知點算好。處理器上用 S615 係唔錯但升左上 5.0 後反而係效能上略為遜色左。有唔少華麗又頗特別的功能但實用性又成疑。最後，純以性價比計，雖然 Blade S6 硬件唔係頂級水平但以 $1999 呢個售價來講版主覺得都算係可以接受的（如果唔將大陸牌子手機售價打個折的話）。ZTE Blade S6 在文章刊登時，售價為 $1999，按此看詳細規格和最新賣價。
