是否中伏 001 ：外型造工 不用想太多
自小米推出千元中規手機，大家對手機嘅造工，都有點期望。Alcatel Pixi 4 真機上手，大家唔會有小米那種手機嘅質感，換上來是就是很廉價的塑膠。至於屏幕，雖然官方規格說是 IPS 屏幕，而的確效果係不錯，但似乎唔係用 Gloria Glass，都係好似一塊膠貼在機面上面，不用再說什麼 2.5D 玻璃、全貼合。
▲ alcatel 標誌，而係今年轉了，但亦寫得好清楚 Powered by TCL。
▲ 跟機有 micro USB 線，簡單嘅耳機，亦有一個 5V / 1A 充電器。要充滿 Alcatel Pixi 4 嘅 2580mAH 電池，都要三小時左右。
▲ 採用熱感式按鍵，機背有八百萬像素鏡頭。
▲ 機底有 MicroUSB 埠；機背則有揚聲器。
▲ MicroSIM 雙卡雙待，亦有獨立 microSD 插槽。
是否中伏? 買手機，都一定會試機，手感呢件事，上手一分鐘已 Feel 到，接受到就買，接受唔到就唔買。平價六吋大芒本身就係屈機，呢個價，你搵到第二部才算，再者，小米手機最紅個陣，咪又係呢 D 質地。
是否中伏 002 ：屏幕大比拼
Alcatel 手機最出名什麼：屏幕。六吋手機版主手頭上暫時無機，但有部用 Super AMOLED 1080p 5.5 吋嘅 OnePlus 3，可以用來作比拼。Alcatel 官方說，Pixi 4 (6 吋) 版本是用上 IPS 屏幕，但注意只有 720p 1280 x 720 解像度，預期畫質會比 OnePlus 3 差的，但差幾多呢？以下比較圖片說真相。
▲ 上面為 OnePlus 3 5.5 吋 AMOLED Full 屏幕，下圖為 Pixi 4 6吋 IPS HD 屏幕 ，AMOLED 屏幕再加上 Full HD 解像度，令圖中嘅小貓顏色比較豐富一些。Pixi 4 色彩來得淡一點。
▲再比較一下細緻度。
▲ 左面為 Pixi ４嘅側視效果，都 Keep 到應有嘅白色。而右面的 OnePlus 3 雖然比較光亮，但顏色顯得暖一點。
▲ 再比較一下，顯示白色情況，上面為 OnePlus 3 下圖為 Alcatel Pixi 4 (六吋)。
是否中伏? 6 吋配 720p 芒，圖片顯示細緻度會比較輸蝕是預期之內，反而色準與色溫準確才是重點! 係呢方面，Alcatel Pixi 4 (6吋) 做得 OK 唔錯。
是否中伏 003 ：連 720p 片都播唔到?
Alcatel Pixi 4 (6 吋) 從規格資料上看，都嚇死不少網友，因為佢用上 Qualcomm Snapdragon 210 處理器，並只配 1.5GB RAM。呢個組合，無錯係 AnTuTu 跑分上面，由 CPU 效能去到 GPU 速度，都會包尾，但唔代表部機用唔到。有網友問，係咪會連 720p 片都播唔到？其實 Qualcomm 說明書寫得好清楚 S210 支援最高八百萬像素相機 + 720p 視訊解碼！版主亦做過實測，YouTube 會自動最高給你 720p 解像度，只要網速夠快，一樣播得到。而主流嘅視頻 app，如 myTV、ViuTV、樂視影視、LeSports HK 都全部睇到，仲要好順。所以用 Pixi 4 (6 吋) 睇視頻，係完全無問題。順帶一提，Alcatel Pixi 4 (6 吋) 支援播放 FLAC，版主嘅 Hi-Res 24 bit 音樂，一樣可以透過 Pixi 4 播放，當然，可以播放，與係咪輸出高清音效，又係兩回事，但只要配合一隻比較好耳機，音質還是可以接受，唔會好差。▲ YouTube 播放 720p 效果。
▲ 可以用到 ViuTV、LeSports 及 MyTV 等香港視頻 App。
是否中伏？6 吋大芒機，用來睇片、睇相，係播放影片部份，應該無投訴。
是否中伏 004 ：捉。精。靈
以版主觀察，選擇千幾蚊手機嘅人，多數係無乜 Budget 嘅主婦或世伯，佢地玩嘅 Game，唔會要求好重 3D 效果。我用Pokemon Go 做測試，呢部機係唔可以啟動 AR，即係你唔可以與精靈合照，但一樣照捉精靈，照上「道場」開戰，但可以叫做順。例如，版主見到一隻少見嘅精靈，但發覺自己嘅 Pokemon Bag 已滿座，要選擇賣走邊隻精靈嗰陣，反應就有點慢。▲ 用 Alcatel Pixi 4 玩 Pokenmon Go 嘅情況。
是否中伏？捉精靈，玩 Pokemon Go 是 OK 的，但心態只能旨在參予，若果你捉少一隻，都會好唔開心嘅話，就唔好用呢部機去玩了。
日常使用後感
市面上太多中上規格，外型又差唔多嘅手機、或者高規格但加入跟本唔實用嘅超高科技功能，示範話佢好勁，但實際你又唔會用解鎖技術，試了笑一笑就算。所以我才挑戰呢部網友極嫌棄型號。我用了呢部 Alcatel Pixi 4 (6 吋) 大約一星期。ePrice.HK 之前都講過好多次 Android 6.0 係好重要，係一個重要嘅升級，而 Pixi 4 都叫運用得 Android 6 好好，我哋見到 Alcatel 嘅 UI 係好「Stock」近乎 Android 6.0 原生，有App Drawer 之餘亦唔算加太多花款；手機本身只有 16GB ROM，但居然用到 Adaptive Storage，即係你可以用把記憶卡變為內置記憶體，已增大儲 App、儲 WhatsApp 資料嘅容量，唔一定硬要搵 64GB ROM 版本。手機運作順暢嗎? 我有裝 Kill Apps 嘅 App，即係 HTC Boosts 會令手機運作比較正常。但始終我用慣了 Flagship 會嫌打中文字反應有點遲緩，App 與 App 之間轉換有點慢，但使用感受都唔會太差，日常使用 OK 無問題。
▲ 採用近乎 Stock 嘅介面。
▲ 手機己有 OneTouch 加速，用來 Kill 走不用的 RAM。不過我還愛用 HTC Boost+ 其智慧加速功能，會自動把唔用嘅 RAM Kill 走，加快手機速度，所以 1.5GB RAM 用落也沒有特别慢。
▲入門機也支援 Adaptive Storage。而手機 ROM Size 不過是 6GB 左右，16GB ROM，也有 10GB 容量及用家裝 App、儲相。此外，呢部手機係 Geekbench 3 電池測試做到 9 小時三十分成績，電池效能好過其他 S820 CPU 手機呢！
▲ 手機相機嘅功能如上，提一提呢部機嘅前置鏡頭，都有補光燈，入門機少見。
▲ 上面有四張試相。
小結：大芒是屈機
千三蚊，可以係小米官網，買一部比 Alcatel Pixi 4 (6 吋) 規格更好，使用更流暢嘅手機。呢部機存在價值，就係屈機：原價 $1399 已找不到六吋大芒，又係知名品牌嘅選擇。而係屏幕部份，Alcatel Pixi 4 (6 吋) 亦父足功課，睇片 Easy，效果合格之上。最得人驚，版主見過細舖仲可以賣到 $999，一千有找！你話佢差，但其實無 Replacement，佢已 Win 晒。
Alcatel Pixi 4 (六吋) 係文章刊登時，大舖賣價為 $1399，按這裡有更詳細規格及最新賣價。
