CloudSIM 手機國際版
CloudSIM 即係代表可以透過雲端改變手機透過 SIM 卡，進入及連入邊一個手機網絡商而獲取服務。以往一張 SIM 卡只能對應一個主網絡商，而 CloudSIM 即可以隨時改變 SIM 卡宿主。ePrice 版主介紹過的 AirSIM （按此有介紹）及遊雲寶 GSIM （按此有介紹) 都係 Cloud SIM，不過以實體型式出現，即係你都要有一張實體 SIM 卡。不過，CloudSIM 亦可以用另一個方式存在，就係收埋係手機裡面。之前介紹過的 GlocalMe WorldPhone 手機就係了。
事實上，類似 GlocalMe 嘅手機，係中國大陸大把！小米、華為中國 ROM 其實都啟動呢個服務，但要有大陸戶口先用到！但 TCL 卻把內建 CloudSIM 技術的手機，輸出中國之外，去到以外銷為主嘅 Alcatel 品牌裡，今次介紹 Alcatel 3V 就係其中一款，而 TCL 通訊跟版主表示，另一款更平嘅 Alcatel A3 XL，價錢最平千元有找，一樣用到 Cloud SIM，成為最平價 Cloud SIM 手機。
▲ (左) Alcatel 3V、(右) Alcatel A3 XL
最新平價 18：9 屏幕手機
Alcatel 3V 本身係一部入門級 18：9 FULL HD+ 屏幕 Android 8.0 智能手機。採用入門級嘅 MTK9735AS 四核心處理器，3GB RAM 及 32GB ROM。真三卡，包括兩個 SIM 槽加獨立 MicroSD 插槽是賣點。佢仲有 1600 萬 ＋200 萬雙鏡頭 （雙主相機)、臉部及指紋功能。呢d 入門級手機，本來無乜好講，但版主試玩嗰陣發現了手機內內置了「寰宇通」呢個 App，再查番資料，原來 Alcatel 與 CloudSIM 漫遊數據公司 knowroaming 簽了合作協議，Alcatel 係今年開始推出手機，全部導入了CloudSIM，手機可以係無實體 SIM 情況下，用到 knowroaming 全球上網服務。
▲ Alcatel 3V 是一部入門級 18：9 屏幕手機。
▲ 擁有雙主鏡頭設計，但二鏡頭只用來作景深量度之用。此外，Alcatel 3V 亦有指紋及面孔解鎖功能。
▲ AnTuTu 跑分得四萬分，是入門 Android 手機類。
▲ 開啟景深拍攝後，可作事後景深調教。
▲ 呢兩張是調整照深對焦點後的拍攝效果。
▲ 其他拍攝效果。
加拿大漫遊數據公司
咁 knowroaming 又係乜東東？knowroaming 是一間加拿大通訊公司，透過賣漫遊數據 SIM 及 SIM 貼，再以日費數據方式收費賺錢。老實說，knowroaming 係佢地網頁顯示嘅收費唔平，唔講佢地張實體漫遊 SIM 幾錢，佢地網站刊登數據漫遊日費，大約港幣七十幾蚊起跳，可全球多國上網。但一個人，一日去得幾多個國家？香港網友都有重視過 knowroaming，因為之前佢地做緊無限 WhatsApp 任用推廣，有佢地 SIM 卡，就算唔開 Plan，都有無限 WhatsApp。不過，呢個推廣已完，家陣係 Alcatel 手機裡面，收費唔同咗，日費全球一個地區收費三蚊美金，大約 HK$24 用廿四小時上網，逐日計嘅方法，加埋唔駛換 SIM 卡嘅好處，令 Alcatel 手機嘅 knowroaming 服務吸引好多！
以 Alcatel 3V 為例，要用到 CloudSIM 外遊上網服務，首先你係手機找「enjoy.now」呢個 App，先申請「Alcatel」戶口。無嘅，呢個類似用 Sony、Samsung、HTC 手機咁，都有佢地專門服務，不過 Alcatel 嘅「enjoy,now」本身就無乜用，今次為例，今次純為用來啟動 knowroaming 而用。
開啟了 Alcatel 戶口，就可以係揾「 RoamNow！」或中文叫「寰宇通」呢個 App，並以 Alcatel 戶口登入。登入後，你就見到 RoamNow 或寰宇通，都是由 Alcatel 聯合 knowroaming 提供服務。進入後，你便可以啟動knowroaming 服務。要注意嘅係 knowroaming 啟動後，會佔據你其中一張 SIM 卡位置，但係 SIM1 定 SIM2 你可以自己揀。因為呢部機係 4G + 2G 或 2G + 4G 嘅雙卡雙待，而因為knowroaming 用來上網，當連入 knowroaming 服務後，你自己 SIM 卡，變為只接收 2G，用來話音及收海外認證 SMS 還是可以的。
係 knowroaming 網絡，你可以先買 Package，方便去到目的地立即著機啟動服務上網。版主睇過都有七十多地區選擇，包括熱門嘅東南亞國家如日本、南韓、台灣等，西歐、東歐、南美、中東地區都包括在內。Alcatel 嘅 knowroaming 收費好簡單，除左中國大陸要每廿四小時收美金 ＄3.99 全部地方都是美金 $3，即係大約 HK$32 及 HK$24 日費，無限上網，首 100MB 不限速，之後速度為 128kbps。
呢個價錢抵唔抵？我哋介紹過咁多漫遊卡，呢個價錢，當然唔抵！尤其係東南亞熱門地區。100MB 不限速之後 128kbps 都未必滿足到香港人嘅需要，只合基本 Facebook、WhatsApp 之用。不過，因為價錢劃一，地方越冷門，大家選擇唔多，knowroaming 變得比較方便選項！而因為跟住手機走，對於 Short Trip 或快閃外遊工幹網友來講，都叫做方便。
▲ 要啟用 Alcatel 3V 裡面嘅 knowroaming 服務，首先要進入呢個「enjoy,now」app 申請 Alcatel 戶口。
▲ 開啟 RoamNow! 或「寰宇通」呢個 App，以 Alcatel 戶口登入，就可以進入 knowroaming 介面。
▲ 除了中國，大部份地區日費都係 3 蚊美金。寫明 100MB 不限速，之後最高速度為 128kbps。
▲ 以香港為例，4G 用 csl 網絡，3G 為 3HK。速度合理，但 Ping 就相當高。
▲ 我哋試過，不支援 Tethering 把數據分享使用。
▲ 手機的通知欄，會寫明有一個 SIM slot 已被使用，但你只要 Click 一下，就可以用番個張 SIM 卡。
▲ knowroaming app 話到俾你知 daypass 使用時間，以申請一刻，廿四小時計算。
Alcatel 3V 於文章刊登時，售價為 $1598，按這裡有詳細規格及最新賣價
