▲ 先來版主的 Hands-on 短短地四分鐘，把文字唔係好表達到的功能，Show 俾大家睇
試手機，試電話 : WinPhone 改善不算大
Nokia Lumia 525 重 124 克，配合四吋屏幕，大細是 OK，因為版主 Keith 用開也是 HTC One，不是巨型手機，很快已習慣得到。入門手機，難免採用塑膠材質，今次借到白色版本，望上去好靚，手感很不錯，沒有玩具的感覺。版主睇住 Windows Phone 7 出身，亦由 WP7 開始玩起 (反而因為版主 Eddie 加入了 ePrice，他本來是 Lumia Fans，打後我玩少了好多)，對於怎樣設定手機，打電話、setup 戶口也沒有難度。不過，以最基本的電話來說，最不滿依然是，點解鈴聲與播歌的音量是不能分開，即係當我在 Spotfiy 聽畢音樂，若忘了把手機調至最大鈴聲音量，Miss Call 隨時發生。此外，Windows Phone 8 依然無 Smart Dailing (在撥電的數字鍵盤對應的英文字母，鍵入對方名字找電話)，找電話號碼很不方便。Lumia 525 鈴聲不算大聲，震度是合格，而話音清晰，尤其耳筒音量也大，保持 Nokia 手機話音應有的水準。
▲ Nokia Lumia 525 的白色版本，熊貓色機身，厚度 9.9mm 叫做合格。
▲ 機側有 Windows Phone 必有的按鍵，由右至左：音量鍵、開關鍵及相機鍵。有人說 Windows Phone 好合老人家用。在按鍵安排可見一班，有實睇體相機鍵，老人家影相不同睇住個 Screen，方便好多架。
▲ 機頂有 3.5mm 耳筒鍵，機底有 mircoUSB 埠。
▲ HTC One vs Lumia 525 與 iPhone 5 vs Lumia 525，都是單手可以操作的手機，大細好 Good Fit。
WhatsApp、LINE、Facebook 再加 Spotify : 好大改進空間
要做版主一號機，有幾個 App 是必須有：WhatsApp、LINE、Facebook、Spotify 與 Feedly。當然少不得一個好用的 Browser (網頁瀏覽器) Feedly 沒有 Windows Phone 版，不過 Nokia 有一個自家 Browser 叫 Nokia Xpress，Nokia 說用佢上網會慳 Data，係咪我無詳細試，反正速度跟 Windows Phone 內置的 IE 差不多。不過，裡面有一個叫「雜誌化」的功能，若果網站，如 ePrice.com.hk 一樣，有自家 RSS Feed，Nokia Xpress 可以讀出 RSS 內容，顯示方式有點似 Feedly，分別係你要再自行多加一次你睇開網站的 RSS Feed 囉。講講經驗，WhatsApp，Line 及 Facebook，在 Lumia 525 中運作，可以用有喜有驚來形容。Facebook 是喜，因為它遶過了 Facebook 最近的優化，即係 Facebook 自作主張，幫你揀你想睇的 Status。Windows Phone 的 Facebook，是每一個 Fanspage，你每一個朋友的更新，也見得到，你變相睇得更多。缺點有無？有！當你點入 Facebook alert 時，不是直接進入該項更新，是進入 Facebook App 已而，想睇即時更新，又要 load 一陣.....。
WhatsApp 與 LINE，用法跟 Android 有點分別，始終係不同平台系統呀，但上手唔難，一天適應到。但最大問題是：LINE、Facebook 與 Whatsapp 的 alert 聲響全部是一樣的，分唔清楚，好混亂。LINE 的 alert 更是問題，版主好常遇到 Alert 出現的訊息，進入了 LINE app 後不會立即顯示，此外，更會耐不耐就會 Miss 了朋友的呼召，這亦是我後期禁止了版主 Eddie 返工使用 Windows Phone 的原因，因為我們公司內部，用 LINE 作為溝通工具架!
至於 Spotify 呢？最後我是 Spotify 的付費用家，所以用得晒功能，但若果你是免費用戶，Windows Phone 未有 Spotify 免費版的。我日常用數碼通限速 Plan，串流聽歌好順無窒，而 Lumia 525 本身輸出的音量算大，音質我覺得很不錯的，抵讚。
最後講講 Google Services！用開 Android 手機，最慘就係沒有 Google 不可能。在 Windows Phone 裡，Gmail 已變得不能即時同步，最多設定每 15 分鐘收電郵一次。不過，沒有 Google Map，可以用 Nokia HERE Maps 代替，感覺也是好用。至於 YouTube，網頁版也夠我用，裝唔裝 App 也一樣。若果你是 Google Search Fans，記得係 Market 下載 Google Search 的 Apps，我真係覺得 BING 的找尋結果，唔多到位!
▲ 以最基本電話功能來看，Windows Phone 係好好用的，主要係你可以把進入電話介面的 Icon 大大個設定在畫面，撥電位置十分巨型。要彈的，就係找尋電話號碼時，不太智能。
▲ Windows Phone 的字體，是可以調教的，但只限 Windows Phone 系統裡的 Apps，如短訊、用 Peoples Hub 睇 Facebook 更新等等。當轉成 Faecbook App，文字一樣細細粒。
▲Nokia Lumia 手機跟機有很多 Nokia 自家 App，版主不會像說明書式介紹，我個人推介 HERE Maps 與這個 Nokiai Xpress 瀏覽器。比起 Windows Phone 的 IE，Nokia Xpress 有比較圖像化的 Bookmark 介面，亦有 RSS Reader，他們叫作雜誌介面。但 Nokia 說用 Xpress 會慳 Data，加快上網速度，我又好唔覺。此外，SmarTone 的限速 Plan 用家，用唔到 Nokia Xpress 的....
▲ Nokia Lumia 525 有一個五百萬像素相機，跟機本身預設了好難用的 Windows Phone 相機 App。你可以在「市集」免費下載 Nokia Camera。上圖顯示出來，係咪好似 Lumia 1020 呢？係喎，就算一部千幾蚊的 Lumia 手機，也體驗到 1020 的拍攝玩法，記住是玩法，用法：如自行調教 White Balance、ISO 等等。但當然效果一定不是 1020 那個了。
▲ 以上是版主 Keith 七日試用拍出來的照片。Lumia 525 的 IPS 屏幕效果不錯的，加上屏幕解像度連 HD 都無，用手機睇相，真係靚架。不過 Port 了出來，效果真係麻麻。
總結：入門智能手機，都好 OK
入門智能手機，大家想起紅米。我當然用過紅米，性價比無與倫比，無得比。若你有方法買到，可以捱 PCCW 的月費，以下不用再睇。相比紅米以外的選擇，Nokia Lumia 525 手機運行速度是可以的，不過，WhatsApp、Line 及 Facebook 的反應會慢少少，但唔會出現開得多 App 整慢部機的情況。相機部份，做到影出來，在屏幕睇相已好靚的效果，整體來說，可以一試架。
鳴謝 Expansys 借出產品測試。產品網址及查詢：請按入 Expansys HK、或致電 24166700
Nokia Lumia 525 在文章刊登時，行貨賣 $1388、Expansys HK 水貨價為 $1199。按這裡有規格及最新報價。
