開箱！
Nokia HMD 在香港復出 Android 手機先有 Nokia 6，後續加入 Nokia 5 及 8，但本 YK 當時上手試玩的體驗是非常差，不論是工藝或設計都與大陸二線手機廠無異。但今年發布的 Nokia6.1 及 Nokia 7 Plus 似乎有轉機，以 7 Plus 的初步上手觀感，本 YK 認為是很好，脫離 ODM 代工機的感覺，能夠有資格跟一眾大廠中階機一決高下！
▲ 具備 Nokia 風格的包裝，表明係 Nokia 7 Plus，亦指明有 Android One 加持。意思姐係話：我係私生子！
▲ 賣點一目了然，本 YK 某前輩朋友最愛的藍旗「ZEISS」都有埋 LOGO 係度，係咪好想入手呢？ 但為何 IP54 生活防水唔寫出黎做賣點呢？
▲ 無特別的包裝，機身用薄膜膠套住，另一半就係配件盒。
▲ 一條 3.5mm 耳機，款式就「好唔 Nokia」，反而似早期大陸機公模耳機。
▲ 一條 Type C 充電線，屬於硬身塑膠線，這種硬膠壽命一般都不耐用。
▲ 隨機附送的三腳充電器，支持 5V - 2.5A、9V - 2A、12V - 1.5A 三種充電模式。
▲ Nokia 7 Plus 真身登場！本 YK 手上的是黑銅版，個人認為非常有型。
外觀設計
閱覽本文前，再次強調最好睇左版主坤哥篇簡單介紹文，睇完再過翻黎，好多野我都費事重複。Nokia 7 Plus 全金屬機身，背部噴上磨砂塗層，大幅度增加觸感及減低金屬所帶來的刺激性冰感。我最怕大陸流行的「拉絲金屬」油膩又黏身，又或者係容易破碎的玻璃身。
▲ 「Nokia」印在面板右上角， 留意屏幕亦採用圓角顯示設計，弧度配合手機邊框弧度，睇落對稱十足感覺和諧；前鏡頭 1600 萬像素，像素超越主鏡頭，可惜本 YK 不喜自拍。
▲ 底部 usb type-C 接口、喇叭、收音孔、以及訊號天線；噢對了，Nokia 7 Plus 採用 2.5D 弧面 Corning Gorilla Glass 3 玻璃。
▲ 機身右側電源鍵及音量鍵，未見有凹凸紋設計，而最令我不滿的是銅色邊框竟然是光面！ 也就是說刮花一定睇到，而且睇得好清楚！ 而且光面框和磨砂背，感覺格格不入。
▲ Nokia 7 plus 擁有三選二卡槽設計，支持 micro-sd 擴充，總好過連選擇都無掛？
▲ 保留傳統的 3.5mm 耳機孔，或許能捕獲不少網友歡心呢～
▲ 指紋擺放在雙鏡頭模組下方，猶記得坤哥話 7 Plus 的 ZEISS 雙鏡頭邊框不刮手，他確實是對的；因為刮手的部分卻是出現在邊框與面板、背蓋的接位，越握緊手機，刮手感越明顯。
▲ 私生子的印記！ Android One 加持的手機，一般會擁有比較準時的安全性更新。
▲ 虛擬三天王，18：9 下 6 吋屏幕框邊視覺上睇落好窄，但如果計算埋金屬邊框的厚度，其實都有一定寬度。
各項性能測試
Nokia 7 Plus 採用高通 S660 八核心處理器，LPDDR4 4GB RAM + 64GB eMMC 5.1，預載 Android 8.0 系統，完全屬於中階機配置。加上有藍牙 5.0、NFC、3800mAh 大電池、雙蔡司光學鏡頭等，一直都有唔少網友都係咁 inbox 問本 YK 呢部機是否值得入手。
▲ 當你新買返黎，其實已經有 8.1 Oreo OTA 升級檔可以安裝；精簡輕巧的原生向系統順滑無比，如果可以刪除埋 Play 系列就更理想！
▲ 安兔兔跑分 139678分，Geekbench 單核 1642分、多核 5956 分；呢個分數已經追打緊舊代 S820 / S821 處理器喇！ 尤其係八核心架構加持，效能可以話係緊貼現役旗艦。
▲ 比埋對照圖大家睇，就知道 Nokia 7 Plus 效能去到乜水平。
▲ 非 8 系列高通處理器過往為人詬病係，圖像 GPU 性能不成比例地差，今次 S660 跑 Basemark ES 2.0 Taiji 都有 59.84fps，普通小遊戲都不成問題。
▲ 再睇多埋 3DMark 測試結果，舊代旗艦都比打壓，但同最新的 S845 比較 GPU 理所當然輸成條街。
▲ 官方清楚講明係 eMMC 5.1，速度自然同 UFS 制式無得比，但令人矚目係連續寫入速度驚人地達到 212.79MB/s，這是部分 UFS 機的速度！
續航力測試數據
Nokia 7 Plus 電量達到 3800mAh，在市場上已經屬於高電量類別，咁到底續航力可以有幾耐呢？我就做左一個 Geekbench 4 電池續航測試，有嗮客觀數據比大家參考：充滿電後打開飛行模式，屏幕亮度推到最光，本 YK 就走去訓覺，等二日早上收割成果。
▲ 呢個測試你都可以自己係屋企玩，但有一定危險性！ 危險在於第二日返工返學你部手機會無嗮電。。。
▲ 5327 分算高架啦，吊打呢排新出「神獸U」手機，果部都係得四千零分咋！
▲ Nokia 7 Plus 自己係度 100% work 左 9 個小時先無電，但注意從剩餘 10% 電量開始就變成 70% work。
▲ 續航力方面 Nokia 7 Plus 可以話係超越嗮上榜的旗艦機， 如果佢都唔夠你玩，咁都應該無幾多手機滿足到你～
相機表現大躍進！
還記得 Nokia 8 一出，唔少網友慕名蔡司鏡頭的加持，均心感中伏但求助無門。當時本 YK 輕輕留下一句：「told you」，今次部 Nokia 7 Plus 又如何呢？ 有非常大的進步！彩色雙蔡司 1200 + 1300 萬像素鏡頭，分別有 f/1.7 與 f/2.6 大光圈，最起碼部機終於可以作靠得住的日常記錄。一齊睇睇實拍係點～
Nokia 7 Plus 日拍的清晰度很高，保留足夠的細節如燈柱標示和輪胎細字，都是清晰可見。而且在陰晴不定的下午拍攝，最怕是現場色溫無法準確地偵測和表達，但 Nokia 7 Plus 仍能準確地完成任務。唯光度不足的室內環境，可以看到此機力不從心，如塗鴉和室內假花，你未放大都不難發現油畫感很重，放大後見到線條唔夠實淨。但總體上雖然未有超班表現，但已遠比上代好得多，質素足夠收貨。
總結
其實我寫呢篇文係因為唔少網友都糾結於呢個問題：到底買 HTC U11 Eyes 好，還是 Nokia 7 Plus 好？其實仲有一部三星 A8+，不過價錢貴太多，實際上應不屬同價位考慮之列（大家亦可以參考埋呢篇 U11 Eyes 對比 A8+）。 從 ePriceHK 的規格對照可以清楚睇到三者差異，細微規格差異就睇你自己個人需求，但我個人分析如下：要求聽歌、相機好就 U11 Eyes；升級快、性能好就 Nokia 7 Plus；要多 RAM、八達通就 A8+，完。
