叫得做「香蕉仔」，Nokia 8110 的外型真係成條蕉咁，長得黎仲要係彎彎的，再加上黃色的機身，仲唔係同條蕉好類似？版主上手玩過部手機，其實覺得感覺相當不錯，手感好之餘，個樣又靚。推開屏幕下方的滑蓋，會見到有經典的數字鍵，而因為係越南水貨，所以見到鍵盤上會有些奇怪、睇唔明的符號。比較抵讚的是，Nokia 8110 具有 Wi-Fi 熱點功能，就算佢唔係智能手機，好多功能都用唔到，但至少還有一點的作用。
不過，有一點教版主感到疑惑的是，官方表示 Nokia 8110 內置 Facebook，仲支持 Google Map，但版主花了好多時間，搵哂成部機都唔見有 Facebook、Google Map 等，就連內置的官方市集，亦都沒有。是因為越南版不支持，抑或是要等未來系統更新才會有呢？你點睇呢？
▲ Nokia 8110 具有兩種顏色：黃色同黑色。
▲ 配有 2.4 吋細芒，推開屏幕下方滑蓋，會見到有傳統的數字鍵，不過因為是越南版，鍵盤上會見到看不明的符號，應該都是越南文吧？順帶一提，Nokia 8110 是用上 KaiOS。
▲ Nokia 8110 機背會見到有 200 萬像素的主鏡頭，有閃光燈，而下方則有 NOKIA 的字樣。
▲ 側面睇確實會見到彎彎地的。另外，開關鍵亦設於機身的右側。
▲ 拆開機背，會見到 Nokia 8110 係支持真三卡，能夠同時插入兩張 SIM 以及一張 microSD 卡。
▲ 支持 Wi-Fi 連接。
▲ 同時亦支持 Wi-Fi 熱點功能，可以讓 Nokia 8110 化身成 Wi-Fi 蛋。
▲ 當然唔少得是其經典的貪食蛇遊戲。
▲ FM 收音機都有，算是多一個實用的功能。
▲ 內置 4GB ROM。上圖為開機後儲存容量資料。
▲ 然而，成部機反轉哂，都找不到有 Facebook、Google Map 等，以為在官方市集內就會有，但都係搵唔到。(順帶一提，在市集內的「工具」中，得 Weather 一個應用程式可以下載)
說好的 Facebook、Google Map 呢？如果沒有這兩個功能，但可以聽收音機 + 做 Wi-Fi 蛋，你又會否買佢呢？
▲ 版主 Keith 曾經批評過，新版 Nokia 3310 音量太細，俾老人家用都唔適合，咁 Nokia 8110 (2018) 又如何？版主就試下將鈴聲音量調到最大聲，睇下音量夠唔夠大。音量尚算可以接受，又未至於非常大聲，在不算太嘈雜的環境下，放在褲袋裡都依然聽得到的，如果嘈雜的環境下，就可能會有點兒勉強。
Nokia 8110 (2018) 在文章發表時，水貨賣價約 $1000 - $1100，按這裡有詳細規格及最新賣價。
查詢及鳴謝：三禾電氣23740618 （旺角） 23740718 （銅鑼灣）
