光速開箱！
手上的 Nokia 800 Tough 是完封港行，性能規格上此機完全無優勢，你以爲佢會用高通 S865 處理器？ 唔好意思，只係 Qualcomm 205 處理器，512MB RAM + 4GB ROM，最高支持 32GB microSD 卡，唔少朋友聽到呢度都會搖頭離開~
但唔好忘記，作爲 Feature Phone 定位的 Nokia 800 Tough 運行超輕量 KaiOS，擁有 IP68 防水防塵認證，另有 1.8 米防撞設計和 MIL-STD-810G 軍規防護規格！ 支持三選二 4G+3G 卡槽和內置 2100mAh 超大電（Feature Phone 黎講係大架啦），號稱最高達 43 天待機時間！
▲ 外盒簡潔不話花巧，機樣+ 型號就係咁多。
▲ 側面話比你聽有雙卡設計。
▲ 盒背列出各種功能特點，例如跌撞 1.8 米高的保護設計、IP68 級別防水防塵認證、支持 VoLTE 功能（當然要睇網絡商的支援）。
▲ 噔噔！ 簡單的說明指指示，建議大家睇左佢。
▲ 配件一覽： 有 3.5mm 耳機、有 micro-usb 數據充電線、火牛、卡針和說明書。
▲ 如果加 10 蚊可以有 USB-C 接口，我願意加，好彩電量夠應該唔需要經常抽插~
▲ 火牛輸出 5V/1A，細電流設計但實際充電速度不太慢。
▲ 提醒用戶唔好自己用螺絲拆機。
造工堅硬、按鍵無敵！
呢部 Nokia 800 Tough 上手嘩嘩聲，造工質感非常好，令人感到堅固、可靠、打不死，而反饋感極佳的防水按鍵，完全令人撳上癮！ 本 YK 一路玩一路撳，得閒又撳下佢，感覺好似玩緊舒緩壓力的「啪啪機」一樣。
▲ 我手上呢部係黑色，遺憾上手的版本不是本 YK 最愛的沙漠迷彩色。。。
▲ 懷舊的九宮格設計，呢堆防水按鍵觸感真心爽，呢幾年都未撳過咁爽的手機； 收音位不在底部、更靠近嘴巴可以收得更清晰； 而放下仲有一個掛繩位，做到咁粗真係好難得，跳上跳落都唔怕甩！
▲ 上方是內放喇叭，比起現代智能手機，Nokia 800 Tough 的漏音問題不明顯；而 2.4 吋的 QVGA 屏幕（出土文物級）是有 AIR GAP 空氣層，戶外的視覺卻依然可以接受 。
▲ 機身左側是卡槽，需要打開防水軟膠蓋。
▲ 裡面是三選二卡槽設計，nano-sim 配 micro-sd 卡（最高只支持 32GB 容量）；但抽出卡槽是需要卡針，如果你有經常抽插的需要，卡針必須隨身喔。
▲ 機身左側沒有電源鍵（因為係正面），但音量鍵都無？ 正確，稍後會告知佢係邊。
▲ 機身頂部有另一條防水軟膠， 以及一個能夠射出 198 流明的小電筒。
▲ 打開軟膠就是 micro-usb 數據充電孔和 3.5mm 耳機孔。
▲ 機背採用高強度防滑物料，令 161g 重的 Nokia 800 Tough 揸上手又爽又舒服。
▲ 高達 200 萬像素的單鏡頭，左邊配備一顆 LED 補光燈，右邊就係外放喇叭；睇住滿滿的螺絲外露，又粗又獷符合本 YK 的風格。
相機測試：懷舊畫質！
呢個年代的手機拍攝像素要求，千萬等級已經滿足唔到千萬用戶，開始步入億像素的時代。但 Nokia 800 Tough 只有 200 萬像素懷舊畫質，自動對焦都無（好似係叫做全對焦）。但玩足一個下午，實體按鍵係街上係咁撳，似玩緊 SnapShot 街拍，係又撳唔係又撳。但部機無前鏡頭，自拍就要翻轉盲拍了。
呃，Nokia 800 Tough 在拍攝方面真係好原始，好似玩傻瓜菲林機咁乜都無得你調整，撳個快門就係了。 而且無自動旋轉，預設係打直出，你自己打橫左都唔會幫你旋轉。所以上面的圖係本 YK 手動轉~
畫質就肯定差，但縮圖看色澤卻有一種說不出的味道，童年玩手機的回憶翻緊黎。Nokia 800 Tough 呢種感光元件性能差的拍攝效果，非一般旗艦手機可以模擬得到。呢種鬆、郁、矇有種說不出的懷舊風~
實測操作試玩
總結
一部三防 KaiOS 手機（其實姐係 Feature Phone ~），又可以玩 Whatsapp 和龜速 Facebook，給你的是話音、續航力、紮實的造工，再送上貪食蛇和打飛機遊戲。你問我係咪可以取代現役的乜乜手機，肯定唔肯係。Nokia 800 Tough 做 WiFi 蛋或許係一個不錯的功能，本 YK 打算用佢做通話的 WiFi 蛋。
有人話用 Feature Phone 可以改善「智能手機中毒」的情況，但我上手玩過 Nokia 800 Tough 卻難以自拔放不低，變成「低智能手機中毒」！ 呢部 Nokia 我玩左成個下午，雖然唔知自己玩乜：撳佢堆按鍵會稍微舒服少少，迷你 2.4 吋芒 + 拆聲大喇叭睇動畫又唔厭倦，用 200 萬像素的鏡頭影出畫質差的相片，又感覺自己好似翻左去菲林年代，或許過去的日子總是令人懷念。
