磨砂機背！Nokia X20 開箱評測
開箱之前，同大家講下 Nokia X20 外觀係點先，佢係一部用上 6.67 吋芒嘅手機，解像度為 2400 x 1080，計返比例即係 20:9。不過我都講過，我手細，呢部 Nokia X20 6.67 吋，對我嚟講都係有少少大部，但都係舒服嘅。另外，近期好多手機都轉用磨砂材質，Nokia X20 都唔例外，摸上手滑淨之餘又唔易痴指膜，呢點我係幾 Buy 嘅！而我今次借到返嚟嘅，係銅色嘅 Nokia X20，實機外觀係點？睇下面開箱就會知道：
▲ 普普通通嘅 Nokia 包裝盒。
▲ Nokia 手機賣點之一，有 3 年 Android 更新，而 X20 呢部手機更有 2 年保！
▲ 包裝盒背面有簡單 Specs 資料。
▲ 打開入面會見到有保護殼、USB Type C 線、耳機，而本來話因為環保唔送嘅火牛，但香港版依然有，輸出功率最高 18W。
▲ 值得一提嘅係，今次跟機嘅保護殼係一個用環保物料製成嘅保護殼，即係好似 iPhone 果種咁，可以堆肥回收。
▲ 6.67 吋穿窿芒，下巴會有 NOKIA 字樣。
▲ 今次借得嘅係銅色嘅 Nokia X20。
▲ 圓形設計嘅蔡司四鏡頭模組。
▲ 鏡頭並唔會好凸。
▲ 右側有音量鍵 + 結合指紋辨識嘅電源鍵。
▲ 左側有 SIM 卡槽 + Google Assistant 快捷鍵。
▲ 重要嘅係，機底會有 3.5mm 耳機孔，有 3.5mm 耳機孔，有 3.5mm 耳機孔，好重要講三次。
4 系 U 就代表廢同慢？S480 U 拍得住 6 系 7 系 中階 U！
規格部分，Nokia X20 就配備咗 Qualcomm Snapdragon 480 處理器，內置 8GB RAM 以及 128GB ROM，電池容量有 4470mAh。記憶體、儲存容量、電量都無乜問題，正正常常，反而唔少人最 concern 嘅，係到底 $3000 買呢粒 4 系 U，值唔值，畢竟 4 系 U 喺唔少人眼中，都係入門級數。但事實上，佢性能上並不比 6 系 7 系 U 差。以下我哋都係會透過 AnTuTu 評測、AndroBench 5 應用程式，將 Nokia X20 嘅 CPU、GPU 性能具體化，等大家可以參考一下，呢粒 S480 U 係咩 Level。
▲ 安兔兔跑分結果係 324183 分，呢個分數邊度係入門級數？擺到明係中階級數但掛住 4 系 U 嘅名吧？根據我哋 ePrice 資料庫顯示，呢個總分比起用 S765G 處理器嘅小米 10 Lite 還要高 (小米 10 Lite：322825)，不過 CPU 同 GPU 細分就比小米 10 Lite 略低，當中嘅 CPU 成績為 95254 分，而 GPU 成績則為 85187 分，但整體嚟講唔差得遠。
▲ 至於 AndroBench 5，Nokia X20 連續讀取以及連續寫入速度分別為 519.67 MB/s 以及 468.4 MB/s，由此可見應該係用上 UFS 2.2，因為 UFS 2.2 對比起 UFS 2.1 嘅提升，主要就係喺連續寫入速度會快咗，而如果對比同樣 UFS 2.2 嘅小米 POCO M3，似乎 Nokia X20 先係真正符合 UFS 2.2 嘅速度標準，睇返 POCO M3，連續寫入速度都只係 262.64 MB/s，真係沒有比較，沒有傷害，一有比較，就發現原來 POCO M3 都唔係好達標。
而影響使用體驗嘅隨機讀取及隨機寫入，則分別為 179.15 MB/s 以及 160.33 MB/s，無乜特別，理論上使用都會幾順暢。
好了，暫時分享就係咁多先，本來想分享埋 GeekBench 4 Battery Test，但點知 Run 到 20% 就自動 Kill 咗 App，白白浪廢咗十幾個鐘時間，又要重新叉滿電再 Run 多次試試，唯有之後再喺呢篇文章補充返啦！
見到 S480 處理器有 S765G 嘅級數，咁賣 $2998 又係咪都係合理價呢？留言討論一下啦！
Nokia X20 在文章發表時，建議零售價為 $2998，按這裡有詳細規格及最新賣價。
