開箱 + 外觀
睇翻版主的開賣情報，Nokia G20 建議零售價係 1798 元，港行備有藍色和白色兩款選擇。 但要留意，Nokia G20 係一款 4G LTE 手機，並不支持 5G 網絡； 所以從價格定位上黎睇，明顯係一部副機 / 入門定位。
▲ Nokia 一貫的白底 + 機身圖樣外盒。
▲ 官方覺得重要的賣點都清楚咁列出係盒上： 四鏡頭都係賣點？ 其實呢部 G20 鏡頭無蔡司加持，但影出黎的效果卻相當令人滿意； 而真正獲得本 YK 認可的優點，其實係真三卡、純淨系統、以及超大電池！
▲ 官方保證最少有兩年的系統升級，亦代表 Android 12 係肯定會提供得到比用戶； 另外會加多一年的安全性更新，市場上如果要追得咁貼的更新，又要係比較純淨、簡潔的系統，真係得 Nokia 一家。
▲ 盒內配件係完美地齊全，你一開盒就要乜有乜，除了說明書、火牛、充電數據線外，甚至包括原裝開模的清水膠套、3.5mm 通話耳機。
▲ 入門機邊度會有快充，Nokia G20 原裝提供 5V/2A 的 USB 火牛。
▲ 機身背部無花巧設計，純塑膠物料製成；機身亦通過 IPX2 防水 ~ 滴的認證，有好過無喇 ~
仔細察看會發現，塑膠表面加入凹凸坑紋，防指紋抗油污功能之餘，亦能起到強化背蓋結構的作用；所以成部 G20 揸上手係相當紮實無虛位。
▲ 背面分別有 4800 萬像素 f/1.79 大光圈鏡頭、500 萬像素超廣角鏡頭、200 萬像素景深鏡頭和 200 萬像素微距鏡頭。
▲ 機身頂部保留 3.5mm 耳機孔，旁邊的收音孔亦支持 Nokia 獨家 OZO 音效。
▲ 機身底部自然有外放喇叭、USB-C 充電接口及另一個收音孔。機身右側是音量鍵和電源鍵，而電源鍵亦兼任指紋識別器的功能。底部一如既往加入 Nokia 的標誌，而虛擬條可以改爲虛擬三天王。
▲ 機身左側是獨立 Google Assistant 專用按鍵，卡槽具備獨立三卡功能，可以同時安裝 2 張 nanoSIM 和 1 張 microSD 卡，支持最高 512GB 擴充容量。
▲ 黎到機身正面，一塊 6.5 吋 20:9 比例的 HD+ LCD 屏幕，出廠預先亦貼好一塊保護膜。
▲ 水滴屏設計的前鏡頭是 800 萬像素；屏幕最高亮度一般，抗反光能力亦相對弱，烈日下正面勉強看得到畫面顯示的內容，如果側少少就會受到反光影響。
▲ 有兩款機身顏色。
規格 + 性能實測
▲ 預載系統相當乾淨，更加無任何廣告； 值得留意係 G20 亦內置通話電子降噪功能。
▲ 而 NFC、Casting 功能、甚至 Android Auto 都沒有因爲入門級緣故而被 CUT 走； 一開機就已經見到 4 月的安全更新包及改良系統體驗的更新包。
▲ 港行 G20 採用 MTK G35 八核心處理器，由於 8 個都係 A53 核心，所以速度上唔好有太大期望； 內建 4GB RAM 和 128GB ROM 對入門機黎講相當充足。
▲ 運行 Geekbench 5 性能測試，單核心得分 169 分、多核心得分 949 分；呢組分數絕對係入門到無得再入門的性能，因爲隔離高通 4 系性能都會飛天，相比之下發哥入門級處理器確實比較弱。
▲ 至於 Androbench 測試亦顯示，最關鍵的隨機讀寫速度分別只有 44MB/s 和 16MB/s； 而由於不是採用 UFS 制式，所以 G20 同步運行好多程式時，系統運作會明顯變慢。但日常單一應用運作速度依然相當流暢。
▲ 內建 5050mAh 電量的 Nokia G20 在 Geekbench 4 續航力測試中跑出長達 15 小時的 7772 分，以五千電的續航分數黎講已經超越唔少對手。
相機表現 有驚喜
Nokia G20 並沒有蔡司認證，本來對相機實拍表現都無太大期望，但實際拍攝出來的效果又相當有驚喜，成像相當結實，色準平衡表現穩定，更重要係有夜景模式加持，實拍效果都相當好。 超廣角受制於像素少的先天性因素，出黎的效果確實不如主鏡頭好，但色準表現亦不錯，極少出現錯色的情況。而微距鏡頭像素得 200 萬像素，但影出黎效果卻相當不錯，但就有黑角加持，好似天生加左 filter 濾鏡咁，玩味成份十足。
▲ 主鏡頭 4800 萬像素影出黎的效果相當不錯，色彩不會過份濃郁，發色自然順眼。
▲ 換上微距鏡，系統會提示保持 4cm 距離，影出黎效果色彩對比圖相當高，但畫質就相對鬆散，有少少似 Lomo 相機風格。
▲ 超廣角拍攝下的色溫也獲得正確偵測。
▲ 陰天下複雜的色彩場景，檢測色溫亦相當準確，現場還原度高。
▲ 4800 萬像素加持下，畫面線條紋理基本上都唔會化，都係相當清晰明確。
▲ 超級黑暗的環境中，放大後會見到雜訊比較明顯，但色溫依然相當準確，亦清楚見到「SUS304」字眼。
▲ 只要開啓神奇的「夜景模式」，雜訊立刻變少，而且銳利度更高，甚至連「斑馬繩」都清晰見到間隔細節！
總結
Nokia G20 優點係相當明確，真三卡、超大電、LCD 屏幕，乾淨系統，絕對係一部相當正的入門機，完全擔當得起副機角色。 比較令人驚喜係相繼雖然無蔡司加持，但影出黎的相片卻色準自然。 如果係喜歡「聽馬」的長輩，佢亦保留 FM 收音機功能。
但 Nokia G20 有一個明顯的缺點，要用落去先知，就係不支持 5G，唔係講 5G 數據網絡，而係講緊雙頻 WiFi 制式：Nokia G20 只支持 2.4GHz 制式而不支持 5GHz 制式。 對於本 YK 呢種家居全升 5G WiFi 時代的用戶黎講，要想辦法開翻支持舊制式的功能，或者一路長開用數據上網。
