早前 Nokia 指定國家推出 Nokia Circular 手機訂閱服務，英國係其中一個，只需要一個小小嘅價錢就可以享用一部 Nokia 嘅手機，而且後續維修保養等等都係由 HMD Global 提供，唔小心玩到壞咗甚至唔見電話，只需要上網 request 嘅，最快24小時內會送返部新機畀你，月費只係 12.5 鎊起（約 113 港幣）。留意返，目前 Nokia Circular 只在英國及德國推出，香港嘅網友可能要等一等先會知，目前只有 Nokia G60 5G 手機、Nokia XR20 手機及 Nokia T10 平板電腦可供訂閱。
▲ 只需要上到 Nokia Circular 網站就入到呢個畫面，簡單快捷就可以選擇到想訂閱嘅電話。
▲ 我選擇咗新推出嘅 Nokia G60 5G 嚟玩，家陣唔喺香港唔方便搵版主 Keith 借電話，唯有呢到玩住先，另外見到 Nokia 都會跟返個「清水套」畀你，始終有個套喺手電話無咁易花，無咁多保養嘅成本。
▲第一次需要畀 42.5 英鎊（約港幣 386 元），當中包括咗 30 英鎊（約港幣 272 元）首次設定費用，其後每個月都會自動從你指定信用卡收到 12.5 英鎊（約 113 港幣）嘅訂閱費用，記得要確保信用卡係過到數，否則會收到 Late payment 費用。
▲轉個眼幾分鐘就已經成功訂閱，你見到我係 9 月 2 日星期五晚上過咗 Office hour 去落 Order，從官網嘅 FAQs 講明，如果你係平日 5 點前成功訂閱，會即晚就送貨，第二日會送到你屋企，如果係週末或 Bank Holiday 就要等到工作日先執行，所以我係要等到佢哋星期一即是 9 月 6 日先會處理我嘅訂單。
▲我喺星期一夜晚已經收到 DHL 嘅 Email 同我講有一件貨件從 HMD 寄出。
▲去到今日，即是 9 月 6 日星期二我已經收到 Nokia 電話，開箱後如新一樣（可能剛發佈，都係新機），日後有機會係翻新機。
如果你要電話卡都可以跟佢哋訂，家陣 Nokia 喺英國有推出 MVNO 嘅電訊商，叫 HMD Mobile，跟佢哋訂就大約 10 英鎊（約港幣 91 元）一個月有 10GB 5G 上網，上網係同英國電訊商 EE 合作，速度同覆蓋都可靠，但 HMD Mobile 用落係點我就唔知了。
我都有上網睇過唔同問題，例如唔見咗電話，要同 Nokia 報告返，佢哋會立即寄部新機並搖距咁鎖機同刪除資料，之後會向保險公司 Claim 錢，成功嘅只係收返用家嘅速遞費用及保險嘅費用，如果唔成功／唔見咗超過兩次，就會收返換機嘅費用，但未有好明確嘅價錢。
如果你用完第一部機夠 3 個月就可以換其他機，而且都會收取換機費用，而第二年換機費用只係一半，第三年就免費，即係你上咗會留得愈耐嘅，換電話嘅成本就下降，不過都係講緊 30 英鎊（約港幣 272 元）嘅價錢。
成本方面，我家陣上網訂部 Nokia G60 5G 需要 269.99 英鎊（約港幣 2454 元），但如果我只係玩一年就換機，一直都係用緊 Nokia 嘅電話，條數就可以幾好玩，但同樣地你直接買部新機返嚟肯花時間做 trade 咗部機，你都有轉會嘅選擇權。喺我眼中佢用嚟一部長用嘅電話未必係最抵嘅選擇，只係我有個選擇去周不時玩到新嘅電話，當中嘅樂趣又好似填補到。
此外留意返，如果你係最近先到英國嘅網友，未必有機會用到呢個服務，佢哋會審視你嘅信用分數去決定，有機會因為未建立好個人信用報告未被拒絕，但都可以試吓得唔得，再留言話畀我知。
想知 Nokia G60 呢部手機好唔好用，可以 Click 呢度睇 Review。