Nokia XR20 大舖 $2700 有找，平過特賣場
呢篇文章主角講緊嘅係 Nokia XR20，呢部手機其實剛剛推出嘅時候，定價我都覺得係偏高，一粒 4 系 U 賣到四千幾蚊，雖然話性能唔算差，可以拍得上一啲 6 系 U，但始終 4 系就係 4 系，價錢去到四千幾係離地咗少少，不過而家衛訊就減到 $2698，相比起豐澤網店價 $2999 仲要平。好笑嘅係，今日去豐澤特賣場，見到 XR20 陳列機，居然都要 $2798，仲貴過全新價錢，真係估佢唔到......
Nokia XR20 硬件規格
規格方面，Nokia XR20 採用咗 6.67 吋 LCD 屏幕，解像度為 2400 x 1080，屏幕用上 Gorilla Glass Victus，更加增添其堅硬程度，配備 Qualcomm Snapdragon 480 處理器，雖然係 4 系 U，但呢粒 U 具有中階級數嘅效能，一般日常使用依然夠用，同樣用上呢粒 U 嘅手機，係 Nokia X20 同埋 Nokia X10。手機具有 6GB RAM 以及 128GB UFS 2.1 ROM，內置 4630mAh 電池，支持 15W Qi 無線充電。相機只有雙鏡頭，分別為 48MP 標準以及 13MP 超廣角鏡頭，而前置鏡頭則為 8MP。另外，Nokia XR20 係一部 5G 手機。同價位三防手機比拼
至於呢個價錢，同價嚟講有無咩其他三防手機選擇？都唔係無，之前 Honor 推出嗰部版主測試用嚟劈木板都唔爛嘅 X9b，都係一樣賣緊 $2698，採用咗 6.78 吋 AMOLED 屏幕，解像度為 2652 x 1200，以堅固嘅外觀作為賣點之一，擁有全球首個獲得瑞士 SGS 五星全角度跌落防護認證，並提供五級護眼功能。另外，Honor X9b 配備咗 Qualcomm Snapdragon 6 Gen 1 2.2GHz 處理器，內置 12GB RAM 以及 256GB ROM，電池容量為 5800mAh，相比市面大部分品牌嘅手機都要大，並支持 35W HONOR SuperCharge 快速充電。相機部分，Honor X9b 用上咗 1 億 800 萬像素廣角 + 500 萬像素超廣角連景深鏡頭以及 200 萬像素微距鏡頭，前置鏡頭則為 1600 萬像素。
最後，按呢度或者按下圖，可以進入 E 派手機比拼系統，比較一下 Nokia XR20 同埋 Honor X9b 嘅詳細規格。
