▲ LG G4 韓國水貨先到港，是 Olleh O，即係 KT Telcom 版本，有繁體中文介面。版主試過 csl. 嘅 4G SIM 卡，係成功接通4G LTE 網絡上到網。韓國版有兩個版本，皮革版係今午 2/5 已掃清 (不過店主話好快會有貨)，賣 $6880。而版主試嘅係膠背版，賣 $6680。好貴？第一水係咁架啦，先唔先入手，大家想想吧。
設計小改變
要講近呢大半年嘅真正 Android 機皇，一定係 LG G3，總要包括埋水貨市場。LG G3 出名平、靚、正，雖然外型、功能都未必最完美，但高性價比，同樣可以令網友容忍好多缺點！最新一代 LG G4 上手了，感覺又如何呢？今日係 5 月 2 日，版主嘅假期，無奈黃昏六點才去借機，皮革背版本就無了，只餘下膠版本，而相片部份亦不好，請見諒。版主剛剛有部白色版 LG G3 Dual 在手，兩款機都係膠味十足，跟 Sony 與 Samsung S6 嘅玻璃物料與 HTC One M8、M9 嘅全金屬一體成型，LG G4 上手缺乏高貴嘅感覺。不過，若果你覺得 LG G3 設計已無大問題，LG G4 也沒有令你失望。事實上，試玩的塑膠機機背版 G4，都睇得出 LG 設計嘅用心。我部 LG G3 機背是髮絲花紋，而 G4 則玩凌角。機正面都有小小玩意，屏幕之上，會見到格仔紋理，令整個設計都不會悶。LG 強週 G4 有超薄弧邊設計，機身是微曲的，但實際上手唔覺佢曲，亦唔覺得佢係超薄，整體而言是 LG G3 小改進設計。
▲ 膠背版係咪唔靚？版主還覺得可以，很欣賞 LG 在膠機背的心思，凌角紋睇上來也很特別。
▲ 呢個 F1.8 大光圈 1600 萬像素相機略為突起，但唔算太過份。機底照舊有揚聲器。
▲ 機底有 MicroUSB 頭及 3.5mm 耳機，位置跟 G3 一樣嘅。
▲ LG G4 跟 LG G3 設計無大分別，只是 G4 (左) 比較方角，而 G3 （右) 用上圓角。
▲ LG G4 (上) 機身有微彎設計，但其實不起眼，要好細心才見得到。
▲ 跟機送 Quadbeat 3 耳機。Quadbeat 耳機系列，一向好評。因為今次是速試，音質係點我就唔知，但設計就真係一流，好靚呢。
▲ LG G4 跟 LG G3 都係用上 2K 屏幕。版主用同一張相作比較，發覺 LG G4 (上) 與 G3 (下) 屏幕都十分優，顏色都是鮮豔類。兩個 2K 芒係有少少分別，G3 會係白少少，偏冷，但跟 G4 差距好少。G4 與 G3 屏幕質素，只係極少差異，相信網友也不會介意。
F.18 大光圈相機夜攝考驗
LG 今次再強調 G4 嘅相機功能，不過唔係跑高像素，是跑成像質素。LG G4 只採用 1600 萬像素後置鏡頭，不過它有 F1.8 大光圈，係手機相機來說是很不錯。大光圈有助在暗黑環境下吸收更多光，再加上第二代 OIS 光學防手震，強調夜攝係強項。版主今次找了 LG G4 與 LG G3 作比對，先來比比 G4 與 G3 嘅影相感覺。在影相時已係晚上七點幾，夜晚了。LG G4 在夜攝時的速度感覺比 G3 好得多。雖然之前 G3 已說支援 Laser Auto Focus 鐳射自動對焦，但夜攝一張相，G3 速度還是慢，而 G4 就快好多。
▲ LG G3 嘅自動拍攝模式，其實跟 G3 差唔無幾，都係簡單易用為主。但若果你想專業拍，就可以叫出右面嘅專業模式，就有不少參數可由用家自行調教。
▲ 左面一組是 LG G4 拍嘅照片，右面一組是 LG G3 拍攝效果。LG G4 雖然有著 F1.8 大光圈，但不會過份吸光。在自動模式下，G3 拍出來的相片，會感覺光亮一點。但只要把相片放大，會發覺 G4 拍出來嘅相片顏色比較豐富，成像更加實在。LG G4 嘅拍攝效果的確唔錯。
效能上等級數
有別其他旗艦用上 Qualcomm Snapdragon 810 八核心處理器，今次 LG 為 G4 用上 S808 版本。Snapdragon 808 只有六核心，跑分出來性能跟上一代 S801 相差無幾，但用來測試 3D 遊戲效果嘅 Basemark ES 2.0 見到有接近 60fps 嘅分數，表示雖然總分未必最高，但似乎遊戲效能也不會差。另外，跑了幾次分，版主也感覺不到熱爆嘅感覺，好事來。但無論版主或店主，都覺得 G3 年代嘅介面 Lag Lag 地嘅感覺，係 G4 似乎沒有改善，可見 LG 係 UI 介面上，依然要下一點苦功。
▲ 本來 AnTuTu 測到有四萬七千嘅成績，但不幸 Screen shot 部份出了意外，再跑過就只有四萬三千分。從比較睇來，S808 處理器嘅效能，就是比 S801 好一點而已。不過咁，其實 S801 都好夠用，而 S810 亦要降頻減溫，所以兩者分別，在實際使用上唔會好大。
▲ Basemark 2.0 ES 是用來測試 3D 遊戲效果，爆燈分數為 60fps，家陣 LG G4 做出 59.37，好好了!
▲ LG G4 介面說是 UX 4.0，實際使用都係有點 Lag。
小結：期待皮革版本
試完機，版主把 LG G4 還給店主，店主居然主動問我覺唔覺 LG G4 跟 G3 太似樣。係喎，真係好似樣！不過 HTC One M9 都似 M8，Sony Xperia Z4 都似 Z3，今年旗艦都係咁架啦。No No No ，版主你未睇過皮革背版真身喎。又係喎！之前版主 Eddie 爆料話香港只出皮革背版本，相信不同物料，會令 G4 有更大新鮮感。LG G4 主打相機，試拍幾張，都覺得效果好好，版主超 Like 拍攝速度嘅提升，而影相再配合 G4 本身超規嘅 2K 芒，影相再睇相，是一種享受來的。LG G4 發佈會相關文章：
F1.8 大光圈+ 3000 mAh 可換電！ LG G4 正式發佈鬥 Galaxy S6三大必衝原因：真皮革、高規格、體驗正！LG G4 真機機上手圖賞！
LG G4 五月登場確認！機皇比鬥 M9 、Z4 、S6 你撐邊部？
在文章發佈的時侯， LG G4 仍未公佈於香港的行貨定價，按此看詳細規格和最新賣價。
鳴謝及查詢：三禾電氣 23740618 （旺角） 23740718 （銅鑼灣）
