LG G4 單卡／雙卡版價錢一樣，但細節有不同
係分享 G4 的表現時，版主首先回應大家對 G4 的疑問先，大家都知道 G4 係分為單卡以及雙卡版本的，而當中只有雙卡版可以做到中港 4G 。其實兩者分別並唔止呢點的，首先單卡版的 G4 係 FDD－LTE 的支援頻段上遠較雙卡版多，有齊 Band 1 (2100)、Band 3 (1800)、Band 4 (1700/2100 AWS)、Band 5 (850) Band 7 (2600)、Band 8 (900)、Band 17 (700) 、Band 28 (700 APT) 。所以呢部機係韓國、台灣、美國及歐洲不同地區，都可以收到所有頻段。係香港，對本地 SmarTone 的用家而言，因為 SmarTone 已將 Band 8 (900) 的頻段升級支援 4G LTE， Band 8 呢個頻段有助加強室內覆蓋，也能用到 SmarTone 上網更快的 900 + 1800 (CA) LTE，同時收晒兩個頻，最快造到 135Mbps 網速，比起 1800 一個頻最快得 75Mbps，理論上會好 D 。而更重要的一點係單卡版的 G4 係支援 csl. 嘅 Cat 6 300 速，但雙卡版就只有 Cat.4 。係雙卡版的 G4 方面，大家要留意的就係相當可惜地， G4 雙卡版只係做到 4G / 3G / 2G + 2G 雙卡雙待，換句話講 Sim 卡槽 2 只能夠用到 2G ，用家有需要人手轉換 SIM 卡。不過，單卡或雙卡版本，都做到 VoLTE，享用高清話音。
▲ 其實 G4 的單雙卡版之別是頗令有意入手的朋友頭痛的，理論上有雙卡版價錢又一樣就當然係買雙卡啦。但單卡的 FDD LTE 支援較為完善，到外地旅行都較方便（如果想玩 Cat.6 300 速的朋友都只可用單卡版）。所以版主就覺得如果單卡版的 G4 能做到 S6 Edge 一樣網絡支援性咁強就好啦！
2K 解像度＋ Quantum 量子屏幕！ G4 屏幕鬥 M9 、 S6 Edge
講完支援頻段就講下屏幕啦，今次 LG G4 係屏幕上用上左 Quantum 量子屏幕， LG 強調量子屏幕係色彩重現、光度以及對比度三方面都有不少的提升。咁實際上 G4 的屏幕又係咪真係咁靚呢？版主就覺得其實 G4 的屏幕都係唔錯嘅，但坦白講去到目前呢個階段不少旗艦的屏幕都去到 2K 解像度的時候，其實每部機之間的差距都愈來愈少。比較值得一提就係 G4 的量子屏幕係顯示紅色方面係比起 Galaxy S6 同埋 One M9 更鮮艷的。不過是在室內將 G4 調至最光而的情況下，版主就覺得 G4 的紅色係有點刺眼，所以 G4 的屏幕是否討好其實都幾睇個人喜好的。 
▲ 當三部機都調至最光的情況下（左起， One M9 、 G4 、 S6 Edge），可以見到 S6 Edge 的光度仍係最光的，而係顏色方面 G4 相比下則明顯偏向洋紅色的，同時係光度上即使 G4 已經有 25% 的進度，但係仍然係比 One M9 同埋S6 Edge 暗。
▲ 係呢張人像相比較上，（左起 S6 Edge 、 G4 、 One M9）大家可以見到 G4 的紅色顯示上係更加鮮艷的。
再試 G4 感覺並唔 Lag ！但安兔兔仍未有五萬分
提完屏幕方面就到效能部份啦！同今年的主流旗艦不同， LG G4 今次改用左次一級的 Qualcomm S808 六核處理器。上次版主 Keith 為韓水版 G4 開箱的時候 G4 所得出的成績當然係令人失望啦。今次版主再試玩 G4 時係跑分方面就進步左唔少，不過同用上 S810 的 One M9 同埋 S6 Edge 相比起來， G4 的跑分成績始終係有所不及的。好多時大家都認為跑分不代表一切，所以版主就再分享下 G4 初步的使用感覺啦。 G4 係效能上比較值得高興係初步拎上手玩時 G4 的介面暫時沒有 Lag 的感覺，呢點對用家來講相信更重要啦。
▲ 同版主 Keith 上次的上手試相比，今次港版係安兔兔跑分上有明顯的進步，但係都未破五萬。
▲ 係 Vellamo 上面 G4 的得分其實都不錯，但同目前跑分最好的 Galaxy S6 相比 G4 仍然係差一啲。
（ Galaxy S6 在 Vellamo 上的分數為 HTML 5 5530 分、多核 3249 分、單核 2596 分）
▲ 在 Basemark 2.0 上 G4 的成績為 60.17FPS ，打 3D 遊戲唔會有問題吧。
手動模式有驚喜，G4 F1.8 大光圈室內環境鬥 S6 Edge ！
係相機部份，係睇相之前版主覺得 G4 的手動模式 ( M Mode )真係要講一講，猶記得係 G4 全球發佈會時 LG 特別強調 G4 的手動模式有幾全面。想不到原來同其他旗艦相比真係有不同，除左連快門都可以調較之外更重要係能夠即時從屏幕顯示到效果，令人滿意。至於係室內拍攝方面， G4 的對焦速度都係相當唔錯的，同 S6 Edge 差不多。
▲ LG 在全球發佈會時除左刻意提到 M Mode 外仲有意無意地拿另一韓國廠牌手機做比較，老實講同樣係手動模式下， G4 的選項真係全面得多。對於喜歡用手機拍攝的朋友來講相信很有幫助。
▲ G4 同 S6 Edge 同樣係用上 1600 萬像素的主鏡頭，而 G4 的光圈就更大，達到 F1.8 。上圖左邊就係 LG G4 的相而右邊就係 S6 Edge（睇緊 ePrice.HK 手機版本嘅網友，上面係 G4 而下面係 S6 Edge）。 係整體表現來講版主就覺得兩者真係好相近，畫質兩者沒有明顯的分別，而顏色方面個人會比較偏好 G4 ，簡單一句兩部手機的相機表現都在同級水平，難分高下。
更多 LG G4 相片試拍
▲ 再來一張前鏡自拍。
電池有 3000mAh 又可以換電，但快充充電器要另外買
G4 其中一個吸引到大家的地方相信係可以換電，當 Samsung 的旗艦都唔再能夠換電的情況下其實消費者的選擇就更少了。但係電池方面大家有樣野係要留意的， LG G4 係支援 Qualcomm Quick Charge 2.0 (QC2.0) 快速充電技術，不過入手 G4 時所附有的充電器是沒有快充功能的。咁用 G Flex 2 果個充電器又是否 OK 呢？雖然 G Flex 2 都支援 Quick Charge 2.0，但其實原裝叉機，係加入了 LG 技術，而非 Qualcomm 的 QC2.0，所以 G4 即使用左 G Flex 2 的充電器但係速度都不會做到 QC2.0 的速度，亦唔會有 G Flex 2 嘅充電速度。所以如果想為 G4 做到快速充電的話，大家就唯有用其他Qualcomm Quick Charge 2.0 的充電器啦！
▲ 有點諷刺的是，係 G4 本身不會附送 QC2.0 快速充電器的情況下， HTC 出品嘅 Quick Charge 2.0 快速充電插頭才是 G4 的好朋友。(不過，HTC One M9 本身都無送架喎
) 總結：合符大眾的期望，只是價錢上吸引力未算十分大
簡單來講，版主相信 G4 係外型上雖然未算係人見人愛，但總算俾到新鮮感大家。而係硬件方面除左係 S808 六核處理器可能有點輸蝕外，基本上都好難有挑剔，特別是相機方面同 S6 Edge 更加係不相伯仲，版主相信大家試用過 G4 後是會滿意的。不過， $5698 呢個價錢你問版主值唔值的話，版主就覺得 $5698 呢個定位沒有問題，只係根據以往 LG 手機跌價的驕人往績⋯⋯等一排再入手都未遲。如果大家想係開賣前試玩 LG G4 的話就真係要參加 csl. 同 ePrice 的網友搶先體驗日啦！在文章發佈的時侯， LG G4 單卡與雙卡版本，於香港的定價為 $5698，按此看詳細規格和最新賣價。
