你話清貨就又好，乜都好，平價「正貨」、「行貨」總有人追捧，包括版主 Keith 自己。之前已介紹過豐澤會突然攪網上特價清舊款手機、相機、平板等等。舊款未必唔好，好似今次就包括大家都好想買嘅 LG G3。豐澤網上特價場，把 LG G3 減到 $2999，終於唔駛三千蚊。不過咁，呢批 LG G3 係出面大店見唔到 16GB 單卡版本。係文章發佈個一刻，見到豐澤網上特價場，有白色與黑色選擇。老實一句，LG G3 早前已係細店做到三千蚊左右，仲係 32GB 單雙卡版本都有，16GB 版都要 $2998，未必係最抵，但大店出機有的是心安理得。若果出事，投訴都容易D。點揀，大家想想，不過唔好想咁耐，相信貨唔多。
▲ Sony Xperia T3 得 7mm 咁薄，加上 Sony 手機設計嘅 DNA，千六蚊入手，正!
你問版主覺得最抵係邊部，應該都係 Sony Xperia T3。Sony 機嘅設計，好多人 Buy，連中檔機都好靚仔，尤其 T 系列，比起更低檔嘅 M 系，更保留高檔 Z 系嘅感覺。呢部 Xperia T3，有 5.3 吋大芒，但只有 7mm 咁薄，好合大家想要大芒嘅需要求。不過，只有 HD 解像度，行 S400 CPU、8GB ROM、1GB RAM。真係玩機的，就要考慮埋呢點，若果想平平地，用部靚仔嘅 Sony 手機，又有 Exmor RS 嘅八百萬像素鏡頭，T3 賣 $1598，考慮得過。提提你，Sony Xperia T3 唔支援防水嘅。
▲ 今次特價都有 HTC Butterfly 2 及 E8，可惜兩部機定價都唔抵。B2 其實大店都做到 $3198，E8 比起大店標價平 $200。
▲ 今次豐澤仲有其他優惠，最抵的版主都講左，其他的自已睇。仲有，豐澤 eShop 用特價買機，要入推廣碼的，要睇清楚點做呀。
豐澤 eShop 優惠詳請，請 Click 呢到
