韓水 LG V10 版主開箱試！手感一流！
當之前 G4 到港時，版主都表示過其外型設計有新意之餘手感都相當唔錯，不過有用 G4 的朋友都會明白 G4 的問題在於皮制手機背蓋耗損其實頗快，如果粗用的話好快就會有破損。 V10 係外型上保留左 LG 手機獨特的 Rear Key 設計，但同 G4 相比就有不少分別，係邊框上係用上金屬材質，再加上其弧度，令手感相當不錯。機背上 V10 再沒有用上皮革材質而用回塑膠物料，表面看來會係退步但實際上其實沒有予人「 Cheap 」的感覺，反而帶有凹凸圓點令用家無咁易跣手。整體來講跟 G4 相比版主係更喜歡 V10 設計的。另外用左塑膠背蓋同時 V10 繼續用上可換式背設計，仍可以比用家換電插卡。對於堅持要用可換電手機的朋友來講相信係個好消息吧！
▲ 話明開箱試當然要有箱，韓版 V10 的包裝盒個人覺得跟 Note 5 的很相似呢。
▲ 韓水版 V10 跟機有充電器、 USB 以及 Quad Beat 3 耳機，跟 G4 一樣。
▲個人覺得藍色版 V10 外型真的令人眼前一亮，既有韓系機感覺同時手感也很正！
▲ 機背上可以見到 V10 一樣有 Rear Key 設計，而電源鍵所用的材質跟音量鍵是不同的，有助用來識別。
▲機面底部有個明顯的 LG Logo ，可以見到其實機面的塑膠係有磨沙質感的，個人覺得呢種質感很舒服。
▲V10 用左可換式背蓋設計，可以換電看來是 LG 手機一大賣點。
▲再來比大家看看金屬邊框，同 Note 5 相比更為圓潤，同時沒有刮手之感。
▲再講講 V10 的雙屏幕，係著 mon 的情況下副屏幕其實係 V10 的捷徑欄，可以快速選取之前用過的 apps 。
▲ 兩部機拍埋來看，加左副屏幕的 V10 比起 Note 5 更大部。
▲其實 Note 5 同之前版主所用的 S6 edge 相比，手感已大有進步，但係外形上 V10 手感就更好，同時不會有「指模收集器」呢個問題。
▲係試用時版主留意到比起 Note 5 ，V10 的屏幕調到最光看起來都係有所不及的，但呢個有可能是受到電量不足所影響。（但 V10 確認過並沒有啟用省電模式）
可用 RAM ＋內置容量相當足夠，跑分表現你滿意嗎？
效能應該都係大家好關心的一環吧！話晒今次 V10 重點之一就係在 S808 六核處理器的基礎上再配上 4GB RAM 以及 64GB 內置容量，相信大家都會期望 V10 會帶來比起 G4 甚至係 Galaxy S6 edge 等旗艦更出色的表現。以今次韓版的 V10 來講，有 64GB 容量的 V10 仍然有近 50GB 空間可以使用，一般用家應該夠用有餘。而係 RAM 管理方面，因為時間相當緊逼所以只能睇下在一般情況下 V10 表現係點，係一般情況下 V10 有 1.9GB RAM 剩餘，由此估計 4GB RAM 對 V10 應該夠用有突吧。到跑分的環節，呢個部份可能就會令大家失望了，因為版主試左兩次，都只係得 4 萬左右的分數，沒有比起 G4 好多少之餘甚至可能係更差。但版主都要帶返個頭盔先，試機時 V10 電量並不太足夠，系統有可能因此而限制左效能，從安兔兔歷史中版主見到最高有 46000 左右的成績，大家都可作一個參考。
▲ 64GB 內置容量實際可用為 49.62GB ，系統不算很大食。
▲一般情況下有 1.9GB RAM 。
▲跑分為 41985 ，同 G4 分別不算大，但用起上來還是很暢順的。
▲ 可能有網友會對於 V10 的成績感到不可思議，版主係安兔兔歷史中見到曾經有 46520 呢個分數，相信低電量情況實有影響的。
小結：新機外型、手感一流，有可能成為下半年網友首選？
因為時間不許可的關係， V10 有相當多的環節今次未能夠試到的，好似係相機表現等等。初步看來 V10 係一部能夠比到用家新鮮感的旗艦，呢到都不得不讚 LG 可以係一年做出兩款不同風格的旗艦出來。而實際操作上雖然 V10 的跑分並不出色（甚至稱不上好）但係用落都係相當順暢嘅，同時雙屏幕呢個設計個人而言覺得也是一個幾實用的功能，相信會有助手機節省電量。要挑剔的地方就係在屏幕亮度方面看來比起 Note 5 係有所不及，但呢個有可能係因為電量不足的緣故，有待下次 V10 港版實機登場時再試。最後 V10 韓版而家有三色可選，除左版主試的藍色之外還有杏色和白色，現時賣價要 $5980 ，不過下一批貨星期一到港時有機會再平。不知大家又點睇 LG 今次的新機 V10 呢？留言講講吧！
LG V10 在文章發表時，香港上市日期及賣價未定，按這𥚃有詳細規格及最新賣價。
