雙屏幕 + 堅固耐用機身
▲ 首先當然從大家最關心嘅外型方面講起啦! LG V10 將會在香港推出 20K 鍍金色系（白、米色）、精鋼色系（黑色）以及 20K 鍍金真皮版（黑色）。
▲ 配備了 5.7 吋 Quad HD IPS Quantum 量子屏幕，機身體積為 159.6 x 79.3 x 8.6 mm，重量為 192g。老實講，版主覺得呢部機拎上手嘅時候有啲重。
▲ 機背採用左堅韌但柔軟嘅 Dura Skin，能夠有助抗刮痕同埋磨損，能夠進一步保護機身。你可以見到佢嘅機背好似一粒粒咁，摸上手會小小「諧」。不過版主我個人就唔係咁中意佢呢個格仔嘅 Pattern，但整體上尚算不錯。
▲ LG 採用左堅固、SAE 級 316L 不銹鋼嘅 Dura Guard 邊框設計，除左能夠緊貼屏幕抗撞之外，版主覺得佢亦都可以增加呢部機嘅手感，拎上手果陣時就覺得好舒服。Dura Skin 與 Dura Guard 的配合，能夠為你部 V10 作雙重保護，令產品更耐用。LG V10 亦符合 MIL-STD-810G 軍用防撞規格，能夠在 48 吋嘅高度下，以不同嘅角度跌部手機都唔會咁容易爛。
▲ 機嘅底部會有 3.5 mm 耳機孔以及充電插槽。
▲ 睇番機嘅前面，你可以見到左上角果個位會有個 500 萬像素雙自拍鏡頭，令你自拍嘅時候可以影到更加靚嘅相。另外，唔知大家有無留意到，佢嘅前面同其他智能手機有咩唔同? 答案就係......佢喺主屏幕上方其實隱藏住一個 160 x 1040 解像度嘅 IPS Quantum 量子副屏幕（即係寫住 V10 果個位置），到底呢個功能有咩好呢? 版主之後會再同大家講解。
▲ 而佢嘅背後你可以見到有個 1600 萬像素光學防手震 OIS 2.0 F/1.8 大光圈鏡頭，左邊有個閃光燈，而右邊有個 Laser。咁鏡頭嘅下方你可以見到有三個按鍵，第一同第三個唔洗點解釋啦，就係佢嘅音量按鍵，而中間果個按鍵呢，其實係佢嘅指紋解鎖器，只要你設定左你嘅指紋，咁你下次開畫面嘅時候就可以按一按個按鍵解鎖，又方便又快捷。
LG V10 跑分測試
LG V10 採用了 Qualcomm Snapdragon 808 1.8 GHz 六核心處理器，好多人都覺得 LG V10 唯一的失敗之處在於佢呢粒 CPU，如果將來 LG 可以推出更好處理器的版本，相信呢部機可以話完美。版主就用一系列嘅跑分測試軟件為呢部 LG V10 進行跑分測試，而在 64-bit 模式下，V10 得出的跑分為 49745 分，接近 5 萬分嘅成績，但比 LG G4 還是低少少。不過以 S808 處理器黎講，呢個水準算係差不多。
▲ AnTuTu 跑分為 49745 分，係用上 S808 CPU 嘅手機裡面，叫做唔錯。排行方面僅次於 LG G4，但比 ASUS ZenFone 2 以及 Samsung Galaxy Note 4 高。內存方面，V10 配備了 4GB RAM 以及 64GB ROM，對於版主黎講夠哂用。
▲ Basemark ES 2.0 用來測試手機運作 3D 遊戲嘅效能，有 60fps 叫十分好。得出 60.45 分代表打 3D 遊戲，應該會不錯嘅效果。這亦係用 Qualcomm 高效 CPU 好處之一。
▲ Vellamo 跑分分為Chrome 瀏覽器、多核與金屬。Chorme 瀏覽器代表用 Chorme 上網嘅流暢度。V10 分數有 3568 分，算係好好嘅成績，代表用來上網 browsing 感覺會好好。而多核、金屬用來測試手機整體效能。多核是多核心 CPU 運作情況，V10 分數都係相對好，僅次於 Samsung Galaxy S6。
屏幕大比拼：LG V10 VS Samsung Note 5
咁岩岩我就簡單為大家介紹過呢部 V10 嘅外型同埋部份特點，咁而家就同大家講下屏幕方面。咁喺差不多價錢嘅機裏面，版主就揀左 Samsung Galaxy Note 5 黎做對比，睇下會唔會有啲咩野大不同。首先版主我就各自於 LG V10 以及 Samsung Note 5 上挑選左一張一樣嘅美女圖，然後將兩部手機的光度調到最高，方便做個比較。
▲ 美女現身! 咁首先左邊就係 LG V10，而右邊就是 Samsung Galaxy Note 5，咁你會發現啦，Note 5 的屏幕會相對地光啲，而 LG V10 就相對地偏藍較冷，而 Note 5 顯示嘅白色出得更白。
▲ 咁我側少少影落去，發覺 Note 5 嘅圖像開始愈來愈白，開始會有少少唔清，但都仲睇到，而 V10 依然能夠保持佢嘅清晰度。
▲ 好喇! 當我將角度再側啲影落去，就會發現 Note 5 屏幕嘅顏色開始唔掂，出現「偏色」嘅現象，反觀 LG V10，屏幕顏色依舊保持自然。
▲ 另外，如果我地將張圖片放到最大，會發覺 V10 放大得唔夠 Note 5 大，而且由於 Note 5 屏幕亮度較光，亦突顯出 Model 面部的層次感。
雙屏幕版主示範
LG V10 其中一個獨特的地方在於佢嘅雙屏幕，咁到底佢嘅副屏幕有啲咩野功用呢? 呢個副屏幕可以獨立運作之餘，仲可以設定做 Always-On 模式，意思就係，當你主屏幕關上嘅時候，佢嘅副屏幕都依然能夠繼續顯示一啲基本資訊，例如時間、電量、日期等，咁你有時行行下街或者做做下野想知道時間嘅話，只要拎部手機出黎，咩都唔洗做，淨係望住個副屏幕，就能夠見到時間。不過唯一缺陷係，佢個副屏幕嘅亮度係無得自行調較，但一般在普通室內嘅環境都能夠睇得清楚。
對於平時中意用手機打開機或者睇片嘅朋友，呢個副屏幕對你地黎講都有好處。有時當你使用全屏幕享受電影或者遊戲嘅時候，副屏幕會顯示來電及其他通知，唔會阻擋主屏幕嘅畫面，你可以暫時唔理果啲提示，等你打完機睇完片先睇番，咁你打機睇片嘅時候都可以進行得舒暢一啲!
▲ 首先左上角寫住 Wilson Li 果個位就係果個副屏幕，而簽名檔你係可以自行在設定更換的。
▲ 用手指從右向左撥，你可以見到仲有其他資訊可以顯示到。
、
▲ 例如最近使用的軟件。
▲ 常用聯絡人。
▲ 音樂播放設定，你可以按播放、下一首及上一首。
▲ 亦可以記下一些重要事件。
▲ 最後當然是軟件的快捷鍵。
▲ 你可以看到，就算主屏幕關上了，但依然能夠清楚見到時間、日期。
▲ 你可以自行在設定，選擇你想要顯示嘅資訊內容。
音質好正! 支持 32bit Hi-Fi DAC
LG V10 仲有一個好正嘅地方就係，佢本身內部係配備左一個獨立嘅 ESS DAC 音訊解碼晶片以及 AMP 隨身耳擴功能，是市面上少見能夠支持 32-bit Hi-Fi DAC 的手機，而且仲可以兼容高抗阻耳機，讓音質可以媲美數碼音樂播放器 (DAP)。當你開啟 32 位元 HiFi DAC 呢個功能，LG V10 可以將你嘅音樂自動轉換成 32bit 高解析度音訊，讓你可以聽到好正嘅音質。同時，佢可以針對耳機嘅抗阻值，調校手機嘅輸出功率，能夠提供最佳嘅聽覺體驗。版主在現場用以下嘅耳機親身試過，使用高阻抗耳機，發覺如果唔開啟 32 位元 HiFi DAC，就會比較細聲同埋唔清。但相反如果你開左嘅話，咁就會大聲左，音色靚左好多好多!
▲ 設定入面會有一個 32 位元 HiFi DAC 嘅選項，右圖為如果你插入普通嘅耳機，咁佢就會顯示「正常音訊裝置」，咁如果你係插入一啲高阻抗嘅耳機，咁佢就會顯示高阻抗裝置。
根據版主嘅初期實測，跑分、屏幕、音效都 LG V10 都唔算太差，雖然跑分上比 G4 低少許，而且用上了 S808 處理器，但係上手感覺版主覺得比市面上好多嘅智能手機還要好。關於 LG V10 都仲有地方可以試，例如相機、前置鏡頭。留意版主或網友之後嘅實測啦。呢部 V10 將於 10 月30 日正式公開發售，建議零售價為港幣 $5698 元，唔知大家會唔會有興趣入番部，定係又等佢跌價呢? 留言講下啦!
在文章發佈時， LG V10 定價為 $5698 ，按此看手機詳細規格及最新賣價。
LG V10 發佈會相關文章
LG V10 版主上手! 跑分、屏幕、音質、雙屏幕立即試!
LG V10 相機強項要認識! 即時 PK Note 5 結果你要知
LG V10 香港定價已出，配備有好大驚喜
你問，我答! 16 個你想知嘅 LG V10 Q & A!
