開賣日期 4 月 15 日！ LG G5 「模組跟機價」首次曝光！
先講左開賣日期，正如版主之前提到， LG G5 官方公佈幾將會係 4 月 15 號開賣，但係 4 月 6 號到 4 月 14 號期間，將會係指定零售商開放預訂，銀、黑、金、粉四色都會有齊。之前版主都提過，係台灣方面， LG G5 都有首賣活動，係 4 月 30 號前買機都會送一個 CAM Plus 模組，咁香港又會唔會跟呢？根據 LG 今次官方資料，「凡成功預訂LG G5之顧客，即可獲贈 LG G5 原廠透明保護底殼乙個 (建議零售價為港幣198元)」，無錯， LG 將會大方地送出一個珍貴的透明保護殻，真係充滿驚喜啊！
▲一眾模組雖然看來幾有趣，但定價會唔會叫人少左入手意慾？
模組跟機買最多平 $999！你會唔會買？
可以見到，預訂期間 LG 係不會送出 CAM Plus 模組的，咁之前同大家分享的 LG G5 模組獨立定價，又會唔會有優惠呢？今次 LG 官方都提到，如果與 G5 同時購買的話，模組價錢將會有優惠的。從下面的列表可以見到，原本定價要 $1998 的 B&O PLAY模組，跟機買的話就係 $999 ，足足平一半。不過， CAM Plus 相機模組跟機都只係平得 $200，看來吸引力都未必係咁大，唯有指望之後 LG 劈價落力一點吧！唔知大家又點睇今次 LG G5 的預售細節以及一眾模組的「跟機價」呢？留言講講吧！
▲ 可以見到，以 Hi-Fi 模組價錢減最多，而 LG 360 兩個配件減完價後都貼近兩千。
在文章發佈時， LG G5 定於 4 月 15 日上市，定價為 $5698，按此看手機詳細規格及最新賣價。
