V10 大舖減一舊，送少舊電 = 變相加價?
大約四月頭果陣，版主 Lawrence 就同大家提過，無論係衛訊抑或百老匯，都將 V10 減至 $4198，而且仲有電池、32GB 記憶卡、保護貼以及機套送。但今日經過大舖，版主發現 V10 個價再偷偷減多 $100，即 $4098，諗住減少少好過無得減啦! 不過，雖然在數字上係細左，但其實變相加左價。
原來，而家 $4098 呢個價錢，就送少左舊電池，想要多舊電就要另外加 $198，計落似乎之前仲抵玩。不過，版主發現在銅鑼灣時代廣場的蘇寧，有更扺玩的價錢，賣緊 $3998，但就少左張 32GB 記憶卡，以一張 16GB 卡代替，另外會送保護貼、機套以及 4000mAh 外置叉電器。不過要注意的是，淨係呢間蘇寧先有架咋! 其他蘇寧的分店一般都係做緊 $4098 呢個價錢，所以要去蘇寧出機的話，就真係要問清楚。
▲ V10 今個星期基本上各大舖都減至 $4098 呢個價位。
▲ 蘇寧要特別留意的是，佢標出黎個價錢已經係好舊的價錢，成日都唔更新，要自己問先得。但問題是，間間蘇寧問到的價錢又唔同，好似銅鑼灣果間，版主就問到 $3998 呢個價，相當貼近細舖的 $3980。
LG 旗艦大舖行貨，獨家細減，禮品可以賺番哂嗎?
前排就同大家提到 CMHK 的限時優惠，上台出 LG G5，淨機減近二千，但要簽 2 年約。雖則唔少網友未必能夠忍受，俾網絡商綁死 2 年，不過亦都說明，G5 係有減價的空間嘅。一般豐澤、衛訊、百老匯標緊個價係 $4998，送保護貼、Type-C 轉頭以及 32GB 記憶卡，而今日在銅鑼灣蘇寧卻問到 $4898 呢個價錢，而且亦送同 V10 一樣的禮品，無 32GB 記憶卡但都有 16GB。同 V10 的情況一樣，淨係得佢呢間有咁嘅價錢。相信大家都有個疑惑，點解銅鑼灣呢間賣得特別平，版主都有咁嘅疑問，原來係佢地自己做緊限定優惠，所以其他舖就無得減。呢個價錢，會唔會更抵玩呢?
▲ 問到有蘇寧做緊 $4898 呢個價錢，有好多禮品送，計起上黎似乎抵玩過細舖喎! 你覺得呢?
LG V10 在文章發表時，大舖最平售價為 $3998，按這裡有詳細規格及最新賣價。
LG G5 在文章發表時，大舖最平售價為 $4898，按這裡有詳細規格及最新賣價。
