LG G6 韓水開箱評測！設計大改造，令人滿意！
LG G6 水貨就在剛剛已抵達旺角先達廣場，第一水賣價為 $6180，呢個價相比版主想像中的低，你又點睇呢？講番版主對 LG G6 的感覺先，剛上手拎起呢部 G6，雖然談不上是喜歡，但已經是讓版主相當滿意，至少在後面鏡頭部份，並沒有好似上代 G5 咁，凸哂出黎，要知道兩個鏡頭同時凸出黎，真係好難令人接受。LG G6 屏幕改為 18:9，在視覺上係唔係特別好呢？呢點版主並沒有太大的評論，不過如果從影相的角度來說，18:9 帶給版主的感覺是最好的，但係有伏點...... 關於相機部份的，版主下面再講，先睇下 G6 韓水跟機有啲乜配件，同望清楚個外型。
▲ LG G6 用上黑漆漆的包裝盒，頂部大大隻用銀色寫住「G6」。
▲ 旁邊可以見到 IMEI 碼等資料。
▲ 背後都有寫住 G6 同埋 Qualcomm Snapdragon，下面一堆韓文，版主唔識睇。
▲ 唔講咁多，立即開箱！開箱可以見到，除左 LG G6 主機之外，仲會有耳機、充電火牛、SIM 卡針、micro-USB to Type-C 轉插、Type-C OTG 以及 USB 線。
▲ G6 支持快速充電，跟機火牛最高支持 9V / 1.8A，即 16.2W 功率。
▲ LG G6 配備了 5.7 IPS 2K 屏幕，屏幕比例有 18:9，並支持 Dolby Vision 影像技術。
▲ 正面頂部會見到有 500 萬像素前置鏡頭。
▲ 版主上手的是黑色版本的 G6，機背俾版主感覺，好似 iPhone 咁，而且都容易會痴到手指膜，要不時清潔下佢。
▲ 機背頂部有 1300 萬像素的雙主鏡頭，支持 125 度廣角拍攝，並沒有好似 G5 咁，凸哂出黎，個人覺得呢個設計會比較美觀，網友又點睇呢？鏡頭下面，則是配備指紋辨識器的 HOME 鍵。
▲ 機背頂部同樣會有 G6 的字樣。
▲ 右側是 SIM 卡槽位置。
▲ 左側則為音量鍵。
▲ 頂部是 3.5mm 耳機孔。
▲ 而底部則為 USB Type-C 插槽以及喇叭位置。
▲ 拍埋 iPhone 7 Plus 度，LG G6 具有比 iPhone 7 Plus 更大的屏幕，但機身體積則比 iPhone 7 Plus 細不少，而且可以見到屏佔比都相對好高。
▲ 雙鏡頭同 iPhone 7 Plus 的感覺是完全不同的，iPhone 7 Plus 鏡頭都仲有少許凸出來，但 LG G6 的不會。
▲ 同 iPhone 7 Plus 相比，LG G6 厚度為 7.9mm，比 iPhone 7 略厚 0.6mm。
▲ G6 重量為 163g，並不會好重，而拎上手感覺其實都幾舒服，窄窄地，啱哂手細的版主。
S821 + 4GB RAM + 64GB ROM，跑分軟件試 LG G6 效能
講到 LG G6 的規格配置，好老實並不是現時最頂端，又唔係有 S835 處理器，只有 S821 處理器; 又唔係有 6GB RAM + 128GB ROM，只有 4GB RAM + 64GB ROM，不過版主個人覺得，並不是一個大問題。講儲存容量，G6 有得插 microSD 擴充，講記憶體容量，有幾多網友真係可以用得盡 4GB RAM 呢？我唔知，但至少對版主來說，係絕對夠用。時間關係，版主用上安兔兔等跑分軟件，測試一下 G6 的效能，即刻睇下:
▲ 根據安兔兔跑分軟件的成績，G6 的跑分為 133137 分，當中表現最傑出的是 3D 效能的表現，達 51102 分，相信運行 3D 遊戲等方面會相當順暢。
▲ Basemark ES 2.0 Taiji 是用來測試手機運行 3D 遊戲時的效能，60 分為滿分，得出 60.44 分呢個爆哂分的成績，表示用 G6 玩 3D 遊戲，完全沒有問題，相當順暢。
LG G6 雙主鏡頭極速試玩！
LG G6 配備了 1300 萬像素雙主鏡頭，最大光圈提高至 F1.8，在影相方面，特別是夜拍，相信會很不錯。可惜而家天又未黑，但時間緊促，版主今次就未能同大家實試夜拍表現，唯有先俾大家睇下，用 G6 拍攝有啲乜嘢地方需要注意，同埋睇下呢部機的實拍表現。
▲ 左圖可以見到，LG G6 內置啲乜嘢拍攝模式，例如「自動」、「超廣角」、「360 度全景拍攝」等等。另外要注意的是，LG G6 預設 18:9 拍攝模式，不過從右圖可以見到，18:9 拍攝模式只有 870 萬像素。想要用盡 1300 萬像素，就需要用 4:3 拍攝模式。
18:9 模式相機實拍
▲ 以上為用 18:9 一般相機拍攝的照片。
▲ 同 G5 一樣，G6 同樣具備廣角拍攝，左圖 (或手機版上圖) 為一般拍攝，而右圖 (或手機版下圖) 為廣角拍攝，可以見到，本來連「Starbucks Coffee」都影唔哂，但一開左廣角模式，就見到招牌 + 「Starbucks Coffee」字樣都睇得一清二楚。
▲ 同樣，左圖 (或手機版上圖) 為一般拍攝，而右圖 (或手機版下圖) 為廣角拍攝。
4:3 模式相機實拍
超廣角模式 vs 360 度拍攝模式
▲ 以前 LG G5 都有「超廣角模式」，咁到底而家加入左 360 拍攝模式，有啲乜嘢分別呢？其實兩個模式的拍攝方法都係一樣，都係拿住手機向住一個方向 (左 / 右) 移動，不同的是，「超廣角模式」還是可以讓你控制用邊個主鏡頭，而「360 拍攝模式」就無得自訂。而影完出黎，會見到「360 度拍攝模式」的成像會有點奇怪，好似影唔到上下的位置，咁都好正常，因為佢相機始終都只有 125 度廣角，所以總是會有部份地方係拍攝唔到的，形成了這個奇怪的現象。
就咁在手機度睇，你未必會明白兩個模式之間的分別，但如果你 upload 上社交網站如 Facebook，就會一目了然。「超廣角模式」無謂你影到幾廣角都好，up 到上 Facebook，都不過是一張平面相片; 而「360 度拍攝模式」影完出黎，係可以好似用 360 相機咁，可以左右撥動查看相片。下圖為示範:
Posted by Ah Kwan on Sunday, 12 March 2017
Posted by Ah Kwan on Sunday, 12 March 2017
小結
上手試玩呢部 LG G6 前後不夠一小時，可以試到的東西並不多，就上手感覺而言，版主對呢部 LG G6 挺滿意的，但就驚喜不算太大。而相機部份因為加入了「360 度拍攝模式」，增加了用手機影相的趣味，但始終受到硬件上的限制，相機只能拍攝 125 度照片，所以放到 Facebook 等社交網站上來看，就會稍嫌不足。不過，唔使特登買 360 相機，可以影到類似的 360 效果，都係一個不錯的突破點。網友又點睇呢？LG G6 在文章發表時，香港上市日期未定，按這裡有詳細規格及最新賣價。
鳴謝及查詢：三禾電氣23740618 （旺角） 23740718 （銅鑼灣）
