超輕身！手感正！但......容易黐手指膜！
V30+，我會認為應該算是 LG 近年設計最靚的一款旗艦手機，從這點來看，算是好事；但如果問心講句，我會覺得沒有了 LG 自己的特色，特別是正面部份，以前 V20 都話有副屏幕，叫做可以認得出佢係 LG 旗艦，但而家...... 並沒有針對 LG 的意思，只是覺得今年大部份廠商的手機，正面都是同三星 S8 差不多樣，如果 LG 有返一點自己專屬的設計特色，應該能夠增加 V30+ 的吸引力。比較容易分辨出 V30+，是它的機背部份，中間橫向的雙鏡頭，配以圓形後置指紋辨識，加上其引以為傲 B&O 的標誌，還有玻璃材質的機背加持，重量僅有 158g，讓 V30+ 成為現時最輕的 6 吋手機之一。
▲ LG V30+ 採用了 6 吋 OLED 顯示屏，屏幕比例為 18:9，解像度為 2880 x 1440。
▲ V30+ 用上了高屏佔比設計，不過個人感覺左右兩邊邊框還是有點兒粗。
▲ 版主收到部 V30+ 果陣，已經沒有 App Drawer。不過，可以在設定內呼叫返佢出黎。
▲ 機背用上了玻璃材質，係靚嘅，但相比上代 V20，更容易黐手指膜。
▲ 具有 16MP 標準 + 13MP 廣角橫向雙鏡頭，鏡頭側面會有閃光燈，而下方則有圓形的指紋辨識鍵。另外，在指紋辨識鍵的下方，亦可以見到 B&O 的 Logo。
▲ 右側是 SIM / microSD 插槽。
▲ 左邊則是音量鍵。
▲ 喜見上方保留 3.5mm 耳機孔。
▲ 而底部則為 USB Type-C 插槽以及喇叭部份。
▲ LG V30+ 雖然有 6 吋屏幕，但重量僅有 158g，相當輕巧。對於手細的版主來說，雖然單手操作都係唔方便，但手感相當不錯。
S835 + 4GB / 128GB，LG V30+ 3D 跑分不如預期
循例都要 Download 返個安兔兔落黎，為呢部 V30+ 跑下分。不過在跑分之前，先講少少嘢，就係版主在下載安兔兔跑分的過程中，會發現下載時間雖短，但下載完之後機身已有少少熱，可能因為用上玻璃機背，令機身容易升溫，天氣漸涼，跑個分暖下對手，應該都不錯
。LG V30+ 配備了 Qualcomm S835 處理器，內置 4GB RAM 以及 128GB ROM，安兔兔得分結果為 157105 分，其實比一般 S835 旗艦成績較低，尤其是在 3D 效能部份，只有 57754 分，成績並不算十分高 (版主試過咁多部 S835 旗艦手機，大部份 3D 效能成績都有差不多 7 萬左右）。
取消了副屏幕，以 Floating Bar 取替，係咪真方便？
雖然舊代 LG V20 有副屏幕，但其實版主認為，根本發揮不到副屏幕真正的作用，更重要的是，開啟了副屏幕會令續航能力縮短，所以 LG 今次在 V30+ 取消副屏幕設計，個人並不覺得有甚麼可惜。不過，V30+ 今次加入了 Floating Bar 用來取替副屏幕，又是否真係方便呢？好老實，我會覺得 Floating Bar 功能並不是如想像中實用，感覺是為做而做，格硬加入一些「Gimmick」落去。真係方便？我又唔太覺。
▲ Floating Bar 功能收埋在設定中的「一般」，按進去可以自行設定捷徑、擷圖、音樂播放器以及快速聯絡人等功能。開啟了之後，你會見到在屏幕邊緣位置會有個箭咀，按進去就會出現「快速鍵」。但，我會覺得同 S8 / S8+ / Note8 的「側屏幕」功能一樣，理論上好，實際上實用性並不太大。你覺得呢？
F1.6 廣角相機才是最大賣點？韓廠大比拼，影相挑機三星 Note8
LG V30+ 的機背配備了雙主鏡頭，標準鏡頭有 1600 萬像素，光圈值為 F1.6，並支持 71 度視角；而另一個鏡頭則為廣角用途，有 1300 萬像素 + F1.9 光圈，並可拍攝 120 度的廣角照片。LG 表示，其 F1.6 特大光圈，能夠提升相機的進光量，在低光環境下拍攝，能夠有更好的效果，配合於智能手機首創的 Crystal Clear Lens 玻璃鏡片鏡頭，可以令到相片色彩還原度更高。
▲ LG V30+ 內置以上咁多模式，不過比較要特別留意的，是 Manual 手動模式部份。
▲ 在 Manual 手動模式內，暗藏着一個 LG 全新功能 Graphy，呢個功能有甚麼作用呢？原來 Graphy 網站及應用程式，提供左一系列由專業攝影師拍攝的相片連設定參數作參考，你可以將人哋攝影師用的參數，套用落你將要拍攝的相片上。例如我而家坐在 Cafe 內，你可以在 Graphy 內揀返類似的相片，得出上圖黃黃地果種效果。又例如當你影夜景果陣，你可以在 Graphy 內搵返類似的夜景相片，咁就可以毋需手動調校快門速度同 ISO，但都可以拍到堪比專業的相片。
不過，其實一般用家平時影相，可能直澄唔會用到手動模式，甚至可能本身根本就唔識 set ISO、快門果啲，通常就只係會直接用 Auto Mode 拍攝。所以，Auto Mode 影得好唔好，其實比起咁多專業級功能更重要。以下版主就拿來同樣韓國品牌的三星 Galaxy Note8 作個比拼，比較一下兩部手機拍出來，哪一部較好。
【左：LG V30+；右：三星 Galaxy Note8】
▲ 先用正常模式拍攝，稍後再試 V30+ 的廣角鏡頭。可以留意到，在正常模式下拍攝，三星 Galaxy Note8 可拍出相對更大角度的相片。
▲ 放大來看，始終都係三星 Galaxy Note8 細緻度高啲，Zoom 大啲字係清楚好多。
▲ 另外，可以看到 LG V30+ 拍出來的景深效果相比 Note8 (在沒有開啟「實時虛化預覽」的情況下）更深。
▲ 不過，LG V30+ 拍出來的照片，相比 Note8 有少許偏黃。
▲ 整體放大黎睇，Note8 成像會實在一點，沒有 LG V30+ 有種「鬆」的感覺。
▲ 雖然 LG V30+ 在相片成像質素方面，可能會稍比三星 Note8 遜色，但它不得不說是一部玩味手機，其 120 度廣角鏡頭，能夠將更多的景物攝進鏡頭內。
▲ 俾多一張 V30+ 廣角相片給大家看看。
專業級拍片人必備！支持 LG-Cine Log 格式
Cine-Log 模式收埋左喺 Manual 手動攝錄模式入面。進入「手動攝錄模式」，在設定裡可以見到「Save as LG-Cine Log」(儲存為 LG-Cine Log)。Save 做 Log 格式有甚麼作用呢？根據版主之前曾經的介紹，由於 LOG 的色彩空間很大，因此影片的動態範圍就能夠更寬廣，影像細節亦能夠更準確。而用 Log 拍攝出來的影片，由於具有「全動態範圍」記錄的特點，所以拍完出來你會發現，影片顏色看上去會很灰的樣子，但亮部同陰影的細節，就相當豐富。以上純為理論層面，在現實層面又如何呢？即時 Show 俾大家睇下，開左 LG-Cine Log 同無開有乜分別：
▲ 無開 Cine Log 拍出來的影片。
▲ 開啟左 Cine Log 之後，會變得相對灰黃一點。而儲存為 Log 檔後，你可以用一些影片編輯軟件，例如 Premiere Pro，自行調較你喜歡的色調。
小結
試玩了一小時多 V30+，我會覺得在外型設計上有了很大的進步，但還是稍嫌欠缺了一些自己獨有的特色。不過，Overall 黎講我係滿意嘅，而且夠輕身，是一件好事。但相機方面，質素表現還是有不少進步空間，尤其是在成像細緻度方面。另外，V30+ 亦加入左好多專業級數的功能，就好似 Cine Log 格式般，適合一些專業的，想拍出電影級數效果影片的高手們。其實，V30+ 賣點點止咁少，佢仲具備升級了的 Hi-Fi DAC，呢啲如有機會的話，再會同大家試下。網友又對呢部 V30+ 有無興趣呢？留言講下啦！LG V30+ 在文章發表時，大舖賣價為 $5998，按這裡有詳細規格及最新賣價。
