Nexus 6 外型：頂級的造工，體積稍嫌過大
今次開箱最令版主估唔到就係 Nexus 6 大拿拿成五千幾，六千蚊但跟機的配件就有點陽春，只係得充電器、 USB 線同附帶 SIM 卡針的說明書，連耳機都無。（雖然大家都未必會用返原廠耳機）但手機盒的外型就相當唔錯，簡潔的設計同中間一個 6 字令人一見到就知道呢部機就係 Nexus 6 ，版主就覺得比起上一代 Nexus 5 更好睇啦。
講到 Nexus 6 外型，同前幾代相比最明顯的分別就係屏幕比以往的親生仔都要大，用上左 5.96 吋的 1440 x 2560 AMOLED 屏幕（上一代 Nexus 5 都只係 4.9 吋咋）。而外型方面廷續一貫 Nexus 風格，四條邊較圓潤。版主留意到對於 Nexus 6 的外型係評價上可以話係好壞參半，而試用過之後都同意 Nexus 6 外型真係「有辣有唔辣」。
好果方面就係比起版主曾經用過的第三代親生仔 Galaxy Nexus ， Nexus 6 造工明顯好得多，拎上手時 Nexus 6 扎實的感覺實在唔係一般膠機可以相比的。而機背亦都用左同 HTC ONE 一樣的曲面設計，中間較厚而機身兩邊較薄，而機頂亦較機底薄，令手機拎上手時會比較輕鬆同手感較為舒服。而於早前有傳的 Nexus 6 出現底蓋分離同埋電池漲起問題，可能因為版主試用時間不算長，所以並未發現到。
但缺點方面， Nexus 6 的 6 吋大芒係某程度上真係過大，版主作為一個「手細之人」莫講話單手操作，連揸好部機都有困難，單係呢點已經叫人頭痛。當然，手掌大小個個不同，版主見唔少手掌較大的朋友對 Nexus 6 相當滿意，所以都係唔講咁多，比大家睇相仲實際。
▲ 盒雖然大但配件就只有呢兩件同埋一半說明書。 充電器同樣標榜可以快速充電，老實講快充基本上現時個個牌子的旗艦都有，唔算係獨家的功能。而同 Galaxy Note 4 的充電器相比版主覺得兩者都差唔多咁快，好難分出高下。
▲ Nexus 6 正面，同以往各代 Nexus 相比差別不算大，未算突出。
▲ 背面用上的塑膠材質對手掌大的人來講係舒服，對手掌細的人來講就係大伏。機背 Nexus 字樣非常搶眼。
▲ 同以往咁多代 Nexus 手機不同，今次 Nexus 6 相機的質素大大提升，雙 LED 閃光燈亦係亮點之一。
▲ 版主幾肯定 Nexus 6 的喇叭能夠帶比大家驚喜，雖然 Google 無刻意標榜一對喇叭用上甚麼特別的技術，但質素比一眾旗艦有過之而無不及。不過呢對出色的喇叭同時有個問題，就係喇叭旁邊的坑相當容易入塵，用家可能需要經常清理。
▲ 開機同音量按鍵都置於手機右邊，開機掣用上凹凸紋方便用家識別，呢一點相當貼心。 機頂係 Nexus 6 最厚的部份，約有 10.1 mm 厚。
▲ 同前代一樣， Nexus 6 的 Sim 卡孔相當細，大家千萬唔好唔見左原裝的 Sim 卡針啦。
外型對決 Samsung Galaxy Note 4
上文提到 Nexus 6 體積稍嫌過大，為左令大家具體地了解 Nexis 6 的外型大小，版主就搵來無論係屏幕尺吋、規格同埋價錢都同 Nexus 6 都可以一拼的 Samsung Galaxy Note 4 來比一比。簡單來講，如果閣下覺得 Note 4 並唔算好大部的話， Nexus 6 都唔會有問題，相反如果覺得 Note 4 已經超過可接受範圍的話，Nexus 6 對閣下來講都係太大部了。
▲ Nexus 6 整體而言係比 Note 4 大部，令人想唔到係雖然闊度上 Nexus 6 只係比 Note 4 闊 5mm（ Nexus 83mm 闊、 Note 4 78mm 闊）但無論係視覺上還是拎上手的感覺上都有頗大的分別。 Note 4 比人感覺係屏幕偏長而 Nexus 6 拎上手時就感覺相當大部。
▲ 兩部機的厚度其實不容易比較，只可以話 Nexus 最厚的部份比 Note 4 厚，但 Nexus 較為薄的部份好似機身底部就比 Note 4 薄。
效能跑分比一比！頂級旗艦表現，但 Vellamo 跑分成績略遜 G Flex 2
在 Nexus 6 推出後曾經有傳因為 Google 係 Android 5.0 上使用左 FDE 加密投術，令 Nexus 6 係讀寫速度上慢上一半，再加上 Android 5.0 同前幾代 Android 相比亦頗為不穩定，相信好多人都會擔心 Nexus 6 係效能方面會否受到以上的因素影響。試用過後版主就覺得以上問題大家都唔需要擔心啦！版主發現當 Nexus 6 軟件版本即使升上 5.0.1 之後無論係安兔兔、 Vellamo 還是 Basemark 2.0 表現上都無大影響。雖然同用上最新 Qualcomm S810 的 G Flex 2 相比， Nexus 6 都係差一點，但係平常使用方面，版主對 Nexus 6 係相當滿意的。以瀏覽電腦版網頁為例， Nexus 6 的順暢程度就比 Note 4 更好。簡單來講 Nexus 6 可以話係目前版主用過效能最強的手機，對手機效能要求過的朋友來講 Nexus 6 就適合不過。
▲ 係 Quadrant Standard 上面雖然只係得萬二分左右的成績，但版主以前都提及過 Quadrant Standard 已經有一段時間未有更新，所以參考價值已經比以往低。而 安兔兔方面雖然升級至 5.0.1 之後 Nexus 6 成績反而差左，只得 52,834 分（在 5.0.0 版本時最高約有 53,000 分），但同 LG G Flex 2 比亦不相伯仲，相信大家都會收貨吧。至於係 Vellamo 方面，雖然升上 5.0.1 之後係硬件同效能兩個項目上分數都比 5.0.0 版本時略低，但瀏覽器表現就大大提升，不過同用上 S810 的 G Flex 2 相比仍然有一段距離。
▲ 係 Basemark 2.0 方面， Nexus 6 無論係升級前還是升級後表現一樣無懈可擊， 59.66 呢個分數對應付 3D 遊戲來講不成問題，而版主日常使用 Nexus 6 時同樣亦未 Lag 過，表現實在不錯。
| Moto Nexus 6 | LG G Flex 2 | |
| 安兔兔 | 52,834 | 51,807 |
| Quadrant Standard | 12,499 | 26,898 |
| Vellamo 瀏覽器 | 3066 | 4095 |
| Vellamo 多核 | 1706 | 2175 |
| Vellamo 金屬 | 1587 | 2153 |
| Basemark 2.0 | 59.66 | 55.65 |
開賣消息
在文章刊登時，Nexus 6 香港行貨未推出，不過，大家都可以買到，網上店 Expansys 已有售，透過宅急便仲送貨去 OK 便利店。Nexus 6 32GB 係 Expansys 賣 $5898。香港行貨呢？版主就收到風 Nexus 6 會係 2 月 17 日上市， 32GB 定價約為 $5598 ！仲會連同 MOTO 360 智能手錶一齊推出，MOTO 360 會賣 $2198。大家會入手嗎?Nexus 6 評測集合：
版主開箱! Nexus 6 效能對決 LG G Flex 2Nexus 6 屏幕、相機全測試！對決 Galaxy Note 4
鳴謝 : Expansys HK
在文章發佈的時侯， Moto Nexus 6 ( 32GB) 香港行貨定價為 $5598，按此看詳細規格及最新賣價。
