QHD 解像度 ＋ 5.96 吋芒！ Nexus 6 vs Galaxy Note 4
以屏幕規格而言， Nexus 6 係目前來講要揾對手其實都唔容易，目前來講有 2K 1440 x 2560 解像度的手機唔算多，而且有近 6 吋芒的手機就更少！而係屏幕規格方面 Galaxy Note 4 亦相當出色，除左一樣有 2K 解像度之外亦用上 5.7 吋 S-AMOLED 屏幕，大家就一齊睇下兩者的表現啦！
▲首先看看人像的顏色顯示，可以見到兩部機（Note 4 左、 Nexus 6 右）的分別係幾明顯的， Nexus 6 顏色偏紅但色彩較為豐富，而 Note 4 顏色比較淡而稍為偏黃，亮度方面兩者分別不算很大。
▲ 再用花草相片來看屏幕水準，跟人像顏色顯示一樣，Note 4 同 Nexus 6 在顏色上的分別都頗為明顯，同樣地 Nexus 6 色彩比較濃烈而偏紅、飽和度比較高，而 Note 4 的色彩則偏淡。
▲ 從低角度的情況下睇兩部機的屏幕，可以發現兩部機的亮度都沒有減少，而且都無反白的情況出現。可視角度兩部機都相當不錯。
▲ 再來睇下白色方面的顯示，相信大家都會發現兩部機其實細緻度、亮度分別都不算好大分別，反而顏色分別就頗為明顯。坦白講，用上 AMOLED 的 Nexus 6 其實係有偏色問題的，不過就唔係偏藍，而係偏紅。對比度兩部機亦差不多，至於兩部機的屏幕邊部比較好版主就覺得好睇個人喜好了。
Nexus 6 vs Note 4 日拍、夜拍相機實試！
係比較兩部機係相機方面表現之前，首先要介紹一下兩者的規格。 Nexus 6 係相機規格上同以往咁多代親生仔相比實在強左不止一個檔次。除左擁有 1300 萬像素之外，主鏡頭亦都擁有 f2.0 大光圈，感光元件大小為 1/3 吋而且具備光學防手震功能。與此同時 Galaxy Note 4 亦都毫不遜色，擁有比 Nexus 6 高的 1600 萬像素主鏡頭，f/2.2 光圈、而感光元件大小係 1/ 2.6 吋同埋 1.5 級光學防手震 O.I.S 功能。而今次測試入面將會以「最大像素」來做拍攝，要留意 Note 4 的成像比例會比較特別，因為 Note 4 的 1,600 萬最大像素只能選擇 16：9 的畫面。下面所有的排列都是左邊 Nexus 6；右邊 Samsung Galaxy Note 4 方便大家參考
（一）戶外場景：
▲ Nexus 6 1300 萬像素（左）、 Note 4 1600 萬像素（右）。首先講日拍方面，版主認為 Nexus 6 與 Galaxy Note 4 各有出色的地方。 Neuxs 6 因為感光元件比較小，像素亦比起 Galaxy Note 4 低 300 萬，所以講到細節和銳利度就肯定不及 Galaxy Note 4 啦。但 Nexus 6 的相片顏色則較鮮豔及討好。
▲ 從二組的微距相片去看，如果將相片放大仔細睇的情況下可見 Note 4 的相片亦比較清楚，不過大家會留意到 Nexus 6 的顏色比較真實，曝光亦比較貼近肉眼所看。有一要提點的是，係微距攝影方面Nexus 6 原生相機未有微距模式而 Note 4 則會自動切換，所以微距時的對焦速度會比較快。
（二）HDR 場景：
▲ 呢一組圖係兩者開啟左 HDR 模式下所拍攝的相片，係 HDR 模式下 Note 4 與 Nexus 6 兩者風格稍有不同。Note 4 雖然畫面比較亮，但不論係光暗層次或是細節上都不及 Nexus 6 ，效果上 Nexus 6 亦比較自然，對比度睇落係比較有立體感的。
（三）室內場景：
（四）夜拍場景：
▲ 至於係夜拍方面，首先兩者有一個相當明顯分別要指出的，就係 Note 4 係夜拍模式下的曝光不算準確，通常會 EV+1（係比現實環境仲要光）而 Nexus 6 的相片就比較接近現實，所以大家都是見到頭兩張 Note 4 的相片光度十足但係暗位上就唔及 Nexus 6 扎實，而且色彩準確度都不及 Nexus 6 。
▲ 係低光環境下用閃光燈拍攝的比較而言，雖然 Nexus 6 閃光燈火力十足不過 Note 4 整體表現就比較好，因為 Nexus 6 相片偏紅。
總括來講，版主覺得兩者的相機可以話係各有所長，難分高下。
係解像度以及感光元件兩方面 Galaxy Note 4 相較 Nexus 6 都佔有優勢，所以大家可以從係日拍照片同微距相片可見到 Note 4 細節比較多，而且係微距方面 Note 4 的對焦速度亦比較快。係低光拍攝方面 Note 4 閃光燈雖然未夠 Nexus 6 猛，但效果仍優於 Nexus 6 。
同 Note 4 相比， Nexus 6 的優勢在夜拍及 HDR 方面。當使用 HDR 效果時，可見 Nexus 6 相片的層次及銳利度都較 Note 4 好，而效果亦較自然。由於 Note 4 在夜拍時會係自動模式下係會測光唔準，造成過曝， Nexus 6 係曝光準確度上係較 Note 4 高，更為真實。如果硬要從兩者中選其一，版主個人較傾向 Nexus 6 ，因為在顏色方面 Nexus 6 的相片是較討好的。
以下有更多 Nexus 6 及 Note 4 的實拍照片，大家可以參考一下效果：
總結：硬件對得住價錢，精粹在於 Android 5.0
試用過之後，版主覺得 Nexus 可以話係一部面面俱圓的手機，各方面都表現得幾好但又唔算係最好。坦白講，Nexus 6 屏幕雖大解像度又夠高但有偏色問題，而相機又未至於完勝 Note 4 ，處理器方面隨住 G Flex 2 的推出， Nexus 6 所用的 S805 而家已經不算係最強了，不過 Nexus 6 一對令人驚喜的喇叭版主就覺得暫時都幾難搵到對手啦！而以整體硬件規格而言，版主就覺得 Nexus 6 的價錢（有傳將於農曆新年前推出， 32GB 賣價 $5598 ）唔算抵不過定價亦唔算過份，需知同級的 Galaxy Note 4 定價都要六千多。如果喜歡用大屏幕又追求規格的朋友 Nexus 6 確實係值得考慮的。
不過相比起 Nexus 6 的硬件，版主覺得軟件上 Android 5.0 更令人愛不釋手啊！
雖然操作方法好似切換鍵盤等等都同以往的 Android 系統都唔同，要一段時間適應，但總括來講 Android 5.0 係 Nexus 6 上使用的感覺卻係相當好。（可能因為版主個人相當喜愛 Material Design 介面）果然想完美咁體驗 Android 5.0 都係要用最新一代的親生仔比較好的。
開賣消息
在文章刊登時，Nexus 6 香港行貨未推出，不過，大家都可以買到，網上店 Expansys 已有售，透過宅急便仲送貨去 OK 便利店。Nexus 6 32GB 係 Expansys 賣 $5898。香港行貨呢？版主就收到風 Nexus 6 會係 2 月 17 日上市， 32GB 定價約為 $5598 ！仲會連同 MOTO 360 智能手錶一齊推出，MOTO 360 會賣 $2198。大家會入手嗎?
Nexus 6 評測集合：
版主開箱! Nexus 6 效能對決 LG G Flex 2Nexus 6 屏幕、相機全測試！對決 Galaxy Note 4
鳴謝 : Expansys HK
在文章發佈的時侯， Moto Nexus 6 ( 32GB) 香港行貨定價為 $5598，按此看詳細規格及最新賣價。