Moto Nexus 6 再減價清貨！係咪為左迎新機？
Moto 係三部新機的發佈會上雖然就未有講實推出的日期，但預計係 8，9 月都會正式係美國等地開賣。雖然近年 Moto 係香港推出新機往往都慢幾拍，仲要推出時個價錢「進取」到令人卻步，但係可能今次會有不同嘅。
講返係香港的情況先，上個月頭大鋪就開始將 Nexus 6 劈價促銷，係一個星期左右的時間劈足千六蚊，由 $5588 跌至 $3998 。其實以 $3998 呢個價位來講，買到 5.96 吋 AMOLED 2K 芒，無明顯發熱問題的 Qualcomm S805 CPU 配 3GB RAM 同埋 32GB 內置容量再加埋 Sony IMX214 感光元件 1300 萬像素光學防手震鏡頭，其實都算不錯。不過而家大鋪再將 Nexus 6 劈價，由 $3998 減到 $3198 。除左價錢之外，大家需要注意的地方係 Nexus 6 而家仲有多少貨才是重點，因為係上月 Nexus 6 減到 $3998 的時候，版主到旺角百老匯查詢時得到的回應已經係貨源只剩少量，顏色得返白色。今次減到 $3198 後，版主再次查詢得到的回應就係旺角區已無貨了！所以如果大家想入手的話，除左旺角之外可以去其他區問問。
Moto X 2nd 不再需要指信用卡，直接買都有平！
另一部同樣屬於 Moto ，而家唔減都唔知等幾時先好減的手機就係 Moto X 2nd 啦！有關呢部手機版主先前都有分享過，如果係大鋪用指定信用卡買機的話都算係一部 3 千樓下可以入手的 S801 系列手機。本身係定價上其實 Moto X 2nd 要成 $4998 真係唔抵玩，不過如果落到三千樓下，又可能會有不同的情況嘅。係規格上 Moto X 2nd 有 5.2 吋 FHD 芒， Qualcomm S801 2.5Ghz 處理器配 2GB RAM 以及 16GB 內置容量， 1300 萬像素主鏡頭以及 200 萬像素前鏡，內置電池為 2300mAh 。今次之所以再一次拎 Moto X 2nd 來講其實係因為版主係旺角百老匯問價時就發現，原來目前買 Moto X 2nd 唔需要用指定信用卡，都一樣可以用 $2998 呢個價錢入手。不過， Moto X 2nd 而家呢個規格賣 $2998 ，係 Nexus 6 都只係賣 $3198 的情況下，大家又覺得算唔算抵玩呢？
▲ 如果就性價比而言， Nexus 6 跌到落 $3198 其實就算係入手良機了，今次唔入都唔知仲有無貨⋯⋯
▲ Moto X 2nd 相信都係清緊貨，不過相對 Nexus 6 吸引力就真係差少少，唔知有無網友本身係想入手但未有匯豐卡所以遲疑緊呢？
在文章發佈時，Moto X 2nd 香港行貨賣價為 $2998 ，按此看詳細規格及最新賣價。
在文章發佈時， Moto Nexus 6 ( 32GB) 香港行貨賣價為 $3198，按此看詳細規格及最新賣價。
