外型是敗筆？Moto G5 Plus 真機圖賞！
要我評價呢部 Moto G5 Plus，我會認為以一部中階機來說，硬件規格可以話係滿意，算是合格。但外型設計上，卻是這部手機的敗筆，特別是機背的鏡頭部份，實在是...... G5 Plus 係無問題的，只是個人不懂欣賞。G5 Plus 採用了 5.2 吋 1080p 屏幕，並一改以往塑膠機身設計，改為鋁合金材質，有灰、金兩種顏色，如果真係要我揀的話，我會比較偏向灰色多點。
▲ Moto G5 Plus 配備了 5.2 吋 1080p 屏幕，並用上第三代康寧手機屏幕強化玻璃 (Corning Gorrila Glass 3)。
▲ 屏幕同聽筒之間，會見到 Moto 的字樣。可惜的是，從上圖中可以見到條邊幾粗下。
▲ 屏幕下方會有多功能指紋辨識器，預設向左撥是「返回」，向右撥是「多工鍵」，輕按則是「回首頁」。
▲ 機背部份，最睇唔慣的是，背後個相機鏡頭。鏡頭是 1200 萬像素，光圈值為 F1.7，同三星 S7 差不多級數，但用的並不是同一粒感光元件。S7 是用 Sony IMX260，而 Moto G5 Plus 則是用 Sony IMX362，即係 ASUS ZenFone 3 Zoom 果粒。
▲ 機底會見到有 USB 插槽，不過到 2017 居然仲係用 microUSB，而非 Type-C，確是少見。
▲ 至於右側會有音量鍵以及開關鍵，而右側是甚麼也沒有。
▲ 卡槽是設於機的頂部，成部機最大的特點，就是佢特別的卡槽設計，並非市面上普遍的三選二設計，而是真三卡，即係可以同時使用 2 張 SIM 卡以及 1 張 microSD 卡，並且支援 4G + 3G 雙卡雙待。
▲ 佢個卡槽有分正反兩面，正面可以插入兩張 SIM 卡，而反面則可以插入 microSD 卡，達至真三卡的效果。呢個設計係幾特別，不過就相比正常的厚。
▲ 拎上手其實都算係幾輕身，不過機背有點滑手。
Moto G5 Plus S625 處理器性能，拍唔拍得住正常標準呢？
在硬件上 Moto G5 Plus 配備了 S625 處理器，呢粒處理器最大的特點就是慳電，性能方面一般。另外，G5 Plus 亦都內置了 4GB RAM 以及 32GB ROM，32GB 其實都勉強夠用的，不過如果真係怕唔夠用，佢有得插 microSD 卡，咁就好輕易可以解決。用上 S625 的手機，包括三星 Galaxy C7、ASUS ZenFone 3 等等，唔知 G5 Plus 在性能方面，又係咪達到正常標準呢？版主就用安兔兔跑分軟件，測試一下呢部 G5 Plus 的成績如何。
▲ 安兔兔跑分結果為 63275 分，同當時三星 Galaxy C7 的分數不相伯仲。
相機是賣點？即睇 Moto G5 Plus 相機實拍
Moto G5 Plus 相機有 1200 萬像素，F1.7 光圈，好容易會令人誤會，以為佢係用緊三星 S7 的感光元件。直至尋日試完相之後，總係覺得哪兒怪怪的，於是再特地 check 清楚，到底實際上佢係用邊粒感光元件。原來係 Sony IMX362，即係 ZenFone 3 Zoom 果粒，而非 S7 上的 IMX260。但硬件數據上，兩粒感光元件都好相似咁，影出黎的成像會唔會都唔差呢？即刻俾大家睇下用呢部 G5 Plus 拍攝出來的試相吧！室外日拍表現
▲ 通常手機喺手機屏幕上看相片，理論上是會比較靚啲，但 G5 Plus 就不同，喺芒睇無咁靚，但反而去左電腦度睇，好似又唔算十分差。不過日拍靚係無用，因為大部份手機日拍表現都唔差，但到夜拍就出事，所以可以繼續睇埋落去。
室內 / 昏暗環境表現
▲ 始終都叫做有 F1.7 光圈，夜拍表現還算是可以接受，然而我會覺得，在細緻度方面亦有改善的空間。你又點睇呢？
小評
都係果句，硬件配置上十分令人滿意，用上 S625 處理器，理論上相當省電，而且仲要用上 Google 原生介面，是好多網友至愛。唯獨是外型上會稍為「與眾不同」，對外型有要求的網友來說，未必會考慮。不過如果講性價比，其實版主又覺得呢個規格賣 $2299，係可以接受。影相方面，如果你有機會試玩呢部 G5 Plus，你會發現在芒睇其實唔係好靚，不過當放番落電腦度睇，又顯得非常正常，並不是太差，唯獨是細緻度爭少少，但以呢個價位黎講，相當滿意。Moto G5 Plus 在文章發表時，將於 5 月 19 日上市，賣價 $2299，按這裡有詳細規格及最新賣價。