「摩蝙蝠」登場
第一代 Z Play 給我的感覺是試驗機： 背後直板玻璃（脆弱的工業設計方案）、正面方形指紋（跟機身格格不入），過大電池導致機身偏厚等。Z2 Play 與其說是第二代，到不如說是第一代的補完版，硬件上沒有升級，但設計細節上完全補足了前代的缺失！
▲ 其實讀「Z Two Play」係唔多正確。「Z Square Play」係咪印證我嘅講法：佢係第一代的補完版？
▲ 差點忘記講，Z 系列的 Moto 手機都可以共用 Moto Mods 任何組件，我最想要個電池 mod，暴增電量之餘又完美貼合機身。不過今次開箱就無 Mods 份，等下次啦！
▲ 開箱喇！ 隨機配件五寶：火牛、數據線、耳機、卡針、說明書。
▲ 其中值得留意係，Z2 Play 支持 TurboPower 快速充電技術，官方聲稱充電 15 分鐘可續航長達 7 小時！
▲ 規格上看到專用火牛有 5V - 3A、9V - 1.6A 和 12V - 1.2A 三種充電模式。
▲ 最後係真機登場！ 金色？ 傻的嗎？ 我心中的 Moto 得黑色先叫做 Moto 咋！ 官方主打功能都寫嗮係上面，但有部分我認為係正野卻無寫上去。。。（大量氣泡係因為我後期補翻貼上去～）
造工好、好、好！
N 年前 Moto 併入聯想後，成日擔心新出的手機造工會大幅度變差。正所謂「一分錢一分貨」，入門機 Moto G5 Plus 個造工雖然好過同期對手，但始終唔係熟悉的「堅強的摩記」，揸落去無感覺。但 Z2 Play 完全翻嗮黎，畢竟等級唔同，揸落去硬到喊，比到我一種堅實的手握感，而且毫無虛位。再敲敲個金屬背，「噗噗噗」呢種聲音，猶如你揸住一把寶劍係石洞內亂揮亂斬都唔會怕佢斷口一樣！ 宜家開始流行玻璃機身，部部旗艦都好似工藝品咁。。。咁容易自動爛，想要一部用料足、造工好的金屬機，本 YK 摸黎摸去都摸唔到幾多部，唉～
▲ 擁有 5.5 吋 OLED 1920 x 1080 解像度的顯示屏，並蓋上第三代康寧大猩猩強化玻璃。機身加入納米級防水塗層，但並非 IP 規格的防水，官方亦說明請勿放入水中。
▲ 機身厚度只有 5.99mm，握感非常好。雖然比上一代 6.99mm 更薄，但換來少 510mAh 電量。
▲ Z2 Play 擁有 85 度廣角前鏡頭，五百萬像素配以 f/2.2 光圈略嫌不足，所以亦加入雙色 LED 燈補光。
▲ 今代指紋改成橢圓形，美學上看比奇怪的方形好得多，指紋同樣是輕觸式並非按壓式，解鎖速度快速。但重點是 Z2 Play 針對話音質素，在正面面板上設有一個獨立收音孔。
▲ 呢排流行窄邊框，雖然本人對窄邊框毫無喜好，因為窄就等於機身脆弱，但因應部分網友訴求，我請來「一蚊大師」作為對比。
▲ 音量鍵和電源鍵手感清脆，電源鍵亦有做鋸齒形，增強觸感準確度。
▲ 機身頂部有另一個收音孔，以及三卡槽，在今天「三選二」的世界裡面，真三卡的手機很少，質素高的選擇更少！
▲ Z2 Play 採用「一卡架」方案，正面安裝一張 micro-SD，最高支持 2TB 容量；反面就是雙 nano-SIM 支持雙卡雙待。
▲ 機身底部保留了 3.5mm 耳機，因為有妙用（稍後會說）； 還有一個 USB 3.0 Type C 接口，以及印上一堆資料標籤。
▲ Z2 Play 機背並非金屬色塗料咁簡單，而係真正全金屬機背！ 邊框黑色的物料是訊號天線，底下就是連接 Moto Mods 的金屬接點。 最霸氣的莫過於一顆大眼睛鏡頭，採用的感光元件跟目前攝影最好的手機 HTC U11 相同。
性能普通、打機免問！
Moto Z2 Play 配備高通 Snapdragon 626 處理器，配合 4GB RAM 和 64GB ROM，內置電池達 3000mAh，就咁睇真係好入門。係呀，所以買手機剩係睇處理器、專用手機玩大作的朋友係唔需要考慮 Z2 Play。不過，作為中階定位 Z2 Play 已經足夠應付「聽歌、睇戲、碌FB」有餘，有餘，有好多餘喇～
▲ 系統預載幾乎是原生版的 Android 7.1.1，我看不到有任何大改的痕跡，只有幾個預載應用程式，爽快簡潔無窒機！
▲ 安兔兔跑分達到 67900 分，性能表現稍比 S625 好（平均是 62000 分），中階處理器當然跟旗艦 S835 有一段差距。
▲ CPU-Z 顯示 ROM 可用空間大概有 50GB，可用 RAM 有 1870MB；但令人吃驚的是：我已安裝最新版 CPU-Z，但處理器仍顯示為 S625 而非 S626，究竟係咪比人「狸貓換太監」（換左又閹左）呢？
根據高通官方網站資料，我整理一個表比大家睇 Snapdragon 625 和 Snapdragon 626 的重點差異：
| 高通移動方案 | Snapdragon 626 | Snapdragon 625 |
| 藍牙 | 4.2LE | 4.1LE |
| Qualcomm® TruSignal™ Antenna Boost | 有 | 無顯示 |
| CPU 最高時脈 | 2.2GHz | 2.0GHz |
| 部件編號 | 8953Pro | 8953 |
其他野一睇就明，S626 明顯同 S625 無太大分別，而我手上的 Moto Z2 Play 確實用 S626 處理器。咁到底 TruSignal Antenna Boost 係乜黎？ 呢項技術早應用在旗艦方案 S820 身上，官方聲稱技術針對手機訊號穩定性和質素：減少斷線、加快數據流量、增強話音質素。 最重要係官方文件寫住呢項技術可以提升 20% 續航力！
▲ Basemark ES2.0 Taiji 的圖像性能測試結果只有 47.15 fps，所以我話大作就唔好考慮，普通遊戲都可以玩得開心嘅。
▲ 順便比埋 AndroBench 結果大家參考下，詳情可以睇本 YK 之前寫過的文章。
貼近原生 Android、無多餘應用
買 Android 手機最重要睇乜？ 當然系統啦！ 一個系統寫得好唔好，主宰用戶使用體驗，包括界面流暢度、運行的穩定性、電力續航表現等等，統統與系統是否寫得好有關。 Moto Z2 Play 貼近原生，界面上看不到有明顯的修改痕跡，系統亦跟隨 Android 原有的風格，預載幾個實用的 Moto 自家 App 外，就無任何冗員嘅存在～
▲ 保留 Android 7.1.1 原有的上拉式 Launcher，清爽的界面風格；但同時又加入一些實用的小功能，補充原生系統功能上的不便。
▲ Moto 自家 App 只有幾個： 裝置說明（具備自帶測試硬體、軟件更新等工具）、檔案管理員、FM 收音機（保留 3.5mm 最大作用就係收音機！）、Moto（設定獨有手勢動作）和 Moto Mods（設定 Mods）。
▲ 最新的分割屏幕功能，Moto Z2 Play 自然跟埋；而且部分應用如電話，會跟隨屏幕大小自動切換排位。
相機界面好用、成像可挑戰旗艦？
早排睇版主坤哥文章先知道原來 Moto Z2 Play 用上同 HTC U11 一樣的感光元件，後者係目前市面上最好的攝影手機，令我對 Z2 Play 非常期待。要知道 Moto 相機歷史上都係比較差，主要是偏色問題。有段時間「室內變綠魔」成為本人生活常態。之後 Z 系列出現稍有改善，唔知今代會否更上一層樓、直通頂樓呢？
▲ Moto Z2 Play 擁有 1200萬像素 Dual Pixel 主鏡頭，相位對焦 + 雷射對焦配合 f/1.7 大光圈，就咁聽落已經覺得吸引。
▲ 有人話大眼鏡頭好醜樣，但本 YK 就覺得好型，係 Moto Z 系列的象徵！但鏡頭究竟有幾厚？ 實測係厚過一蚊。但呢個鏡頭厚係有原因，因為 Moto Mods 除了金屬磁力接點吸附外，亦需要突出的鏡頭作為一個固定的受力點。 如果安裝 Mods 後，反而希望鏡頭再厚少少唔會凹落去咁樣～
▲ Moto 手機拍攝界面一向都是簡約風格，而且非常直觀。 相機應用有齊自動、手動、錄影、慢動作、全景五大功能外，仲有一個深度配合 Youtube 直播的即時串流功能！
相機越級挑戰 U11 實測
呢度我做一個簡單對比測試，用 Moto Z2 Play 嘗試越好多級挑戰號稱最高分 DxOMark 的 HTC U11，睇睇結果如何？ 測試條件依然是全自動模式，除了統一對焦點外，其他參數一律保持原狀。兩機均預設打開 AUTO HDR，設定 4：3 的 1200萬像素相片，不使用補光燈等。【擺放位置：Moto Z2 Play （左 / 上）；HTC U11 （右 / 下）】
▲ 照片色澤上 U11 接近肉眼和實物，Z2 Play 受到輕度逆光影響，妖怪貓輕微變橙。細膩度上， U11 放大後仍可清楚看到妖怪貓頭上的塵埃，Z2 Play 反而在「鼻」格線比 U11 更清楚，這是算法加強黑線條的痕跡所致。
▲ 籃球的顏色，看似 Z2 Play 更準確，但實際上現場室內陰暗無燈，肉眼看到的籃球其實係 U11 呢種稍微黯淡偏藍；撇開 Z2 Play 人工化的線條加強痕跡，據我的經驗和印象，這種拍攝表現已遠超過往對 Moto 相機的認知！
▲ 這組圖中，Z2 Play 顏色稍微偏暖，但細膩度才見真章：Z2 Play 放大看不能第一時間 100%判斷是假花，但 U11 表現出的細膩度，放大後一秒已經確認是假花無誤。
▲ 偏色唔再批評，U11 準確呈現出大陰天下的植物色彩。但值得留意係，兩者照片大小從 3MB 左右激增到 8MB、9MB，而整個測試過程都發現，Z2 Play 相片大小全部比 U11 更大，但奇怪的是，細膩度的呈現卻不及 U11 來得立體。
▲ 這張對比圖，色差和細膩度不是主角，重點是同樣 f/1.7 大光圈，Z2 Play 的光學表現遜色於 U11，出現不合理的「白光化邊沿」情況。
▲ 最後一組對比，Z2 Play 依然色調偏暖，但整體曝光準確、貼近肉眼。
▲ 我這裡特意做一個放大對比，給大家參考看看。
挑戰測試短評：細節與色準上 U11 確實毫無疑問勝出，保留更多細節，而且準確還原現場色彩。但作為一部定位中階的手機，輸給暫列第一的 U11 是正常不過的事。而且 Moto 過往不以拍照聞名， Z2 Play 能夠給出這樣的表現實在令人驚喜、驚嚇。這是屬於旗艦手機的拍攝表現，比市面上部分品牌的旗艦手機來的更優異。
咁，有乜不足之處？
我認為 Z2 Play 有兩個位唔係人人接受到，最起碼我本人不能短時間內適應：
▲ 配合 Moto 的 Active Display，Z2 Play 採用 OLED 屏幕，雖然實際顯示效果「唔太味精」，但色彩模式只得兩個選擇，無法獨立調控，而且有機質材的屏幕會有「烙印」的隱憂。
▲ 第二，Z2 Play 配備 One Button Nav 功能，可以關閉虛擬三天王，改用實體指紋感應器來操作：向左滑動 = 返回，向右滑動 = 多工。 我唔太習慣呢種操作，原理雖然跟魅族的 mBack 相同，但由於指紋感應器跟面板有高低差，所以手感上唔爽，會出現卡住卡住的情況。
結論
Moto 帶著一貫的優勢（系統與造工）推出 Z2 Play，補完了第一代的缺點和不足。而且擁有真三卡、相機表現又躋身旗艦之列，開價卻只是三千中。 有網友曾經提出處理器 626 並非旗艦處理器，效能無法負荷大食程式，事情確實如此，咁請你選擇其他旗艦 U 的手機。
或許 Z 系列換 Mods 是最核心的重點，但本人更看重機體本身是否可靠和實用：系統架構貼近原生 Android、長續航力、無垃圾軟件、清晰話音（呢個年代好似無乜需求～）、紮實的造工、真三卡、旗艦級拍攝表現。當然啦，我都想有埋高質音樂體驗、IP 級別防水性能，高像素自拍鏡頭、UFS ROM 之類，但請記住佢賣三千中嘅價錢，係一部中階機黎咋！
作為一名 Moto 愛好者，我樂於見到廠商繼續推出造工及品質優異的手機。題外話，請問有無人知道幾時會出 MOTO Z2 旗艦機？
