▲而家百記有大量 Milestone 現貨，仲賣番正價 $4,680，可以入手！
趕到在聖誕前夕推出的 Motorola Milestone 行貨，唔只幫到 Mo 記翻身，仲為佢帶起近年難得一見的炒風。第一批貨由於數量少，所以旺角的百記同鐳記乘機炒貴，鐳記仲玩海鮮價，唔同時間、唔同分店個價都唔同，做過 $4,980（原價 $4,680），更試過炒到 $5,080 同 $5,380，但呢批貨都在幾日內俾人掃晒。
跟住全場 Milestone 玩預訂玩了幾日，呢段時間百記已經冇再炒，不過鐳記連叫人訂機都仲開緊炒價。最後，第二批貨趕得切在除夕前運到，貨量仲比預期中多，當堂冇晒搶手個勢，但係鐳記依然唔肯賣回原價，直到今日都仲賣 $4,980，唔知係想蝦人唔知價，定真係對部機有信心到咁呢？點都好，大家記住唔好幫襯佢就得喇！
先達方面，行貨推出消息一傳開，原本賣緊水貨的手機舖即刻冇再入貨，但首批行貨完全冇貨流入先達，於是出現了一段真空期，成堆手機舖想炒都冇得炒。直至第二批貨先達先有得賣，但照樣賣定價 $4,680，既然冇得平，都係幫襯大舖好過！
▲先達在除夕前一日先至有 Milestone 行貨賣，但一毫子都冇得平。
▲先達在除夕前一日先至有 Milestone 行貨賣，但一毫子都冇得平。
