)。不過，其實話就話 98 分啫，個分數係咪買返黎，其實無人知，真係想知佢影相係咪咁勁，堅係要自己試玩比較過先知道。就在剛剛，版主就上手了英國水貨版的 Google Pixel 2，於是乎就同大家做個簡單的開箱，並且評測一下佢相機的威力。睇下文啦！
開箱！玻璃 + 金屬材質！Google Pixel 2 實機上手
版主上手了 Google Pixel 2，第一個感覺係：手感不錯！雖然知道呢部機係用玻璃 + 金屬材質，但真係上手後發現，原來佢金屬的部份摸落去係「諧諧地」的，幾舒服，並不如一般其他手機那麼平滑，但又容易令人接受到。不過，手感好其實還有一個原因，就是 Pixel 2 係細機，只有 5 吋屏幕，對於手細的版主來說，尤其喜歡。無上手過，係無可能感受到手感有幾好，光靠文字亦好難表達果種感覺，唯有就同大家做個開箱，俾大家睇下到底 Google Pixel 2 真機係點嘅樣！
▲ 呢個係 Google Pixel 2 的包裝盒。
▲ 包裝盒上清楚寫明，版主手上的 Pixel 2 是 64GB 版本的。
▲ 開箱！入面會有火牛一個、USB Type-C 線、Type-C to 3.5mm 轉換線等等。
▲ Google Pixel 2 配備 5 吋屏幕，並具有上下雙喇叭設計。
▲ 機背結合了玻璃與金屬材質，不過金屬部份摸落去同一般金屬手機的感覺不同，雖然係「諧諧地」，但摸落幾舒服。
▲ 傳說中 DxOMark 分數有 98 分的主鏡頭！鏡頭旁邊會有閃光燈，另外指紋辨識鍵設於機背位置。
▲ 機身右側會有開關鍵以及音量鍵。
▲ 左側則是 SIM 卡槽，並沒有雙卡雙待。
▲ 機底會有 USB Type-C 插槽。
▲ 上手！可能因為 5 吋芒，特別適合版主呢啲天生手細的人～
▲ 其實真機又唔係咁差嘅～不過個價錢貴啲又係事實。
安兔兔跑分出爐！整體操作流暢，但初步發現有少 Bug.......
睇完實機外型，循例上版主都會為大家跑下分，不過基本上 S835 大約係乜嘢分數，其實在跑分前版主都已心中有數，而實際得出的結果，亦跟我所想的差不多，安兔兔成績是 167038 分，當中 3D 部分的分數有 70929，在 3D 效能方面會相當不錯。而版主簡單試過呢部手機，整體操作的流暢度都很高，唯一遇到一個問題，就是當連上 Wi-Fi 的時候，Google Play 唔知點解 Download 唔到任何東西，本身以為只是我張 SIM 問題，但後來用第二張 SIM share Wi-Fi，情況都是一樣，而有行家試用的另一部 Google Pixel 2，亦都出樣同樣問題。但當直接插入 SIM 卡，用流動數據時，又好奇怪地 Download 得到。呢種情況真係第一次遇到，無法解釋到底是甚麼一回事......
▲ 安兔兔跑分結果同預期一樣，都是有 16 萬幾的分數，不算特別高。不過 3D 部份分數有 7 萬多，在 3D 效能上應該會很流暢。
98 分相機係咪真係咁屈機？即場極速挑機三星 Note8！
Google Pixel 2 具有號稱目前最強的相機，配備了 1220 萬像素 Dual Pixel 感光元件，支持 OIS 光學防震功能，並能夠在沒有雙鏡頭的情況下，拍出人像模式的景深效果，更成功在 DxOMark 上更得到了史無前例的 98 分。版主今次找來了在 DxOMark 有 94 分的三星 Galaxy Note8 來做比較，看看大家喜歡哪部拍出來的效果多一點。【左圖：Google Pixel 2；右圖：Samsung Galaxy Note8】
▲ 從球場地上的顏色可以看到，Note8 拍出來的照片會有少許偏暖的感覺。
▲ 兩張照片是同時按下快門的情況下拍出來的，放大來看紅衫球員背後的字，Google Pixel 2 拍出來可以清楚看到「開心之友」四隻字，但 Note8 則已經不太清楚了。
▲ 呢張會看到 Note8 明顯 Tune 高左 ISO，令到照片有少許偏黃偏綠的感覺。而 Pixel 2 雖然影出黎係暗啲，但色準方面相比 Note8 更出色。
▲ 不過如果比細緻度，個人就覺得 Note8 會比 Pixel 2 細緻一點，放大看「我要向高山舉目」果個廣告牌上的文字，Note 8 影出黎的文字更清晰。
▲ 同樣地，Note8 拍出來會比較偏暖，而 Pixel 2 相機在色準方面相對出色。
小結
其實版主由影開箱以至試相整個過程，只是用了大約 45 分鐘左右的時間，所以比較急，未能深入試玩這部手機。以上的評測純屬版主上手的第一印象，整體來說排除 Google Play 果個 bug 嘅問題外，Pixel 2 都可以說是一部不錯的手機，當中在相機部份雖然細緻度相比三星 Note8 較弱，但在色準部份卻比起 Note8 出色。不過平心而論，細機 64GB 賣到七千幾蚊，實在是太貴了，可惜香港又沒有行貨，所以水貨開價高，是可以理解，亦是預料得到的事。睇完以上的評測，不知網友點睇呢部手機呢？Google Pixel 2 在文章發表時，水貨賣價為 $7188，按這裡有詳細規格及最新賣價。
查詢及鳴謝：三禾電氣 23740618 （旺角） 23740718 （銅鑼灣）