HTC One (M8) 、 Samsung Galxay S5 場價雙雙跌破 $5,000 ！
首先同大家講下 HTC One (M8) 同埋 Samsung Galaxy S5 呢兩部手機啦，無獨有偶佢地係同一日開賣，亦都同價$5,998 ，現時 HTC One (M8) 既大鋪價錢已經減到 $5,798 ，買機亦都會送 Dot Cover 啦，然而 Samsung Galaxy S5 仍然未有減價／優惠，如果係大鋪入手都係得記憶卡、屏幕貼等普通贈品，可能因為呢個原因令 Galaxy S5 係香港曝光率偏低啦，開賣兩個幾月版主出街都唔多覺有人用 GS5
。之前版主都同大家報過 Samsung Galaxy S5 既場價，如果係 3G 版水貨就 $4,000 有找，不過想要「細鋪行貨」價錢大約仍然在 $4,700 ~ $4,800 左右，同之前相比冇太大跌價，反而係 GS5 韓水價錢跌到 $4,100 ，已經平過唔少 S801 機款。另外 HTC One (M8) 在場內「細鋪行貨」都要 $4,800 ~ $4,900 ，同大鋪買機差接近 $1,000 ，可惜就唔送 Dot Cover ，計落其實唔算好吸引，畢竟個 Dot Cover 街價最平都要賣 $300 架！
▲ Samsung Galaxy S5 和 HTC One (M8) 場內價價都在 $5,000 樓下，考慮到大鋪買 M8 會有贈品，其實場內價錢係差幾百，暫時都未到一個吸引既價位。
Sony Xperia Z2 場價最平 $4,400 ！「細鋪行貨」保養你信唔信？
至於另一部旗艦 Sony Xperia Z2 ，版主問過大鋪價錢仍然賣 $5,998 ，現時入手會送原裝值 $298 的充電座，亦有記憶卡同埋屏幕保護貼等既贈品，可惜就未有任何價錢上面既優惠啦，係開賣初期會送既保護套問過幾間都話送晒，如果想入手既話衛訊會送多個外置電池，同價位的話比起百老匯、豐澤抵少少。至於場內價錢，係 Sony Xperia Z2 係開賣第一日價錢就已經賣 $5,280 ，講到場內價錢佢亦係咁多部旗艦機入面比較便宜的一部，版主行過一轉最平的「全新行貨」價錢 $4,400 就有交易，足足比起大鋪入手平 $1,600！當然大家要注意保養方面，細鋪買 Sony 機未必有保養應該唔少網友都知道，至於係電訊商／大鋪劏機出黎既「跟單行貨」價錢亦都比較貴，去到 $4,700 ~ $4,800 先有交易，係咪值得博就見仁見智啦。
▲大家記住 Sony Xperia Z2 「行貨」在細鋪買未必有保養，雖然價錢好平，博唔博都自己諗過先。
LG G3 場價未見有平！韓水價錢 $4,680 包兩電兩充！
講到規格夠高，應該唔少網友都會講到近日推出既 LG G3 ，佢係香港第一部採用 2560 x 1440 解像度屏幕既行貨手機，亦用上了 Qualcomm S801 2.5GHz 處理器，係顯示同埋效能各方面都相當唔錯。開賣初期版主都係場內問過，暫時未見有平價既「全新行貨」，問過相熟的細鋪他們暫時都跟官方定價賣機，似乎上台有大量贈品還是比較划算？如果想平價入手既話又會唔會考慮一下韓水呢？現時韓水 LG G3 (32GB) 賣價大約在 $4,680 ~ $4,780 左右，比起行貨便宜大約 $1,000 ，包兩電兩充。早兩日版主亦同大家講過電訊數碼上台出機，總支出都係比買淨機多 $40 而已，就有 13 個月的無限限速上網可以用，圍番起 $3 一個月有無限上網，真係儲值卡都冇咁平。（等傳聞 7 月推出 LG G3 Prime? 之前夠傳 Nexus 9 會出啦，版主挨眼訓睇左成個 Google I/O 都冇
。）
▲ LG G3 暫時未見有平價「全新行貨」，然而韓水賣價在 $4,680 起，與港行還是有一段距離。
HTC、 Sony、 Samsung 、 LG 旗艦手機你揀邊部？定係等下一輪新機？
呢個時代真係新機月月出，例如 Samsung 發佈完 GS5 過幾個月又有 Galaxy S5 LTE-A ，又傳出有 LG G3 Prime 既傳聞， Sony 亦都係 7 月 8 號發佈一部以自拍功能為主既手機，而性價比強勁既 HTC One E8 呢，亦都有機會係香港出，新機真係陸續有來。你又會唔會揀係呢個時侯入手旗艦機呢？如果真係揀你又會想入手邊部？投個票，留個言反映一下意見吧！在文章發佈的時侯， HTC One (M8) 定價 $5,798 ，按此看詳細規格和最新賣價。
在文章發佈的時侯， Samsung Galaxy S5 定價 $5,998 ，按此看詳細規格和最新賣價。
在文章發佈的時侯， Sony Xperia Z2 定價 $5,998 ，按此看詳細規格和最新賣價。
在文章發佈的時侯， LG G3 (16GB) 定價 $5,698 ，按此看詳細規格和最新賣價。
在文章發佈的時侯， LG G3 (32GB) 定價 $5,698 ，按此看詳細規格和最新賣價。
