舊代旗艦細鋪最平 $3,000 有交易！最唔抵係買貴價 Samsung 機？
要講番 2014 年初既幾部旗艦，應該就要數 HTC One M8 、Samsung Galxay S5 、LG G Pro 2 同埋 Sony Xperia Z2 啦，有冇網友當年又入手左一部呢？其實版主而家都仲係用緊 HTC One (M8) （同 Desire Eye 輪流用），以 S801 既處理速度黎講其實係足夠既，當新一代旗艦會係 3 月頭 MWC 發佈既時侯， 2014 年旗艦係大鋪同埋場內都開始清貨減價。首先同大家提提最平既一部，自然就係早出既LG G Pro 2 。雖然佢採用既處理器係再舊一代既 Qualcomm S800 2.6GHz 四核，不過因為有 3GB RAM 加持，所以流暢度都算唔錯，而佢亦係上年年初屏幕比較大的一部旗艦機，有 5.9 吋的 1920 x 1080 解像度屏幕，相機方面是 1300 萬像素主鏡頭配 200 萬像素前鏡頭，像素方面不算搶眼，不過主鏡頭有光學防手震與 O.I.S 功能，電池量都有 3200mAh 。現時大鋪價 32GB 賣 $3,598 正在清貨中，版主問過細鋪最後一水的「全新行貨」賣大約 $2,820 左右，比起初初賣的 $5,998 平一半以上，真係最平既一個選擇。
講到 4K 錄影，真係要提一提 Sony Xperia Z2，呢部機採用 5.2 吋 FHD 屏幕、 Qualcomm S801 2.3GHz 配 3GB RAM ，內置 16GB 容量並可以插卡，而佢採用既 2070 萬似素 G 鏡頭都係一大賣點，當然係呢部唔算大既手機入面有 3200mAh 電池某程度也確保了續航力。呢部手機官價已經跌到 $3,698 ，比起 Sony Xperia Z3 Compact 貴少少而已， 但已經係上代旗艦比較平既一部啦。其實 Sony Xperia Z2 可以係場內搵到大約 $3,000 ~ $3,100 既全新行貨，但係細鋪買到有冇保養都係一個問題啊！
而 HTC One M8 版主係早幾日同大家提過，佢既官價終於由 $4,198 減到 $3,880 ，有 5 吋 FHD 解像度 SLCD 屏幕、Qualcomm S801 2.5GHz 四核、 2GB RAM ，內置 16GB 容量並可以插卡， 400 萬像素 UltraPixel 鏡頭又有雙鏡頭 Duo Camera 設計、前鏡頭 500 萬像素，電池量 2600mAh。呢部機係場內搵到最平都要 $3,500 先買到「全新行貨」，相對之下就唔係平太多，不過都比起 HTC Desire Eye 更平，入唔入就真係睇太大家係咪真係金屬機身。
而減價最少，就係 Samsung Galaxy S5 ，開賣接近一年仍然定價 $4,498 ，係四部舊代旗艦入面唯一超過 $4,000 既機款，而先達的「全新行貨」都賣到去接近 $3,800，雖然水貨價錢同其他機差唔多，不過以同一時期的機款去睇真係比較唔划算既選擇
。上面幾部舊代旗艦，大家又覺得邊部入手價最抵玩呢？可以係最底用投票表態架！
▲先達場內 Sony Xperia Z2 賣 $2,600 咁平？呢個係水貨價，如果要買「全新行貨」就最少 $3,000 先買到，但係信唔信得過似乎係見仁見智
▲現時先達買 Samsung Galaxy S5 「全新行貨」都要 $4,080 ，仲過過大鋪買其他旗艦，究竟有冇人會買呢？
▲可以按上圖睇幾部機的詳細規格和大鋪最新賣價
