M9 與 M9+ 分別
M9+ 與 M9 被 HTC 定義為「年度雙旗艦」，而型號多一個「+」，其實就係規格上面強化、加入了指紋解鎖功能和一些小改動，它在外型設計上基本上與 M9 非常相似，兩部機都採用了一體成型的金屬機殼，版主玩到嘅銀色版本，除了機背有髮絲紋以外，在側面還做了金邊，與 HTC One M9 的金色版本同樣。
HTC One M9+ 主要規格嘅 M9 相約，同樣採用 32GB ROM、3GB RAM，支援最大 2TB MicroSD 記憶卡。2840 mAH 電池是內置式設計。影相部份，M9+ 與 M9 都是採用東芝 Toshiba T4kA7 二千萬像素後置鏡頭，同樣是藍寶石外層，以防割花。前置鏡頭則是 400 萬像素 UltraPixel 相機。M9 與 M9+ 同樣有雙色温補光燈。HTC One M9+ 一樣內建前置 BoomSound 立體聲雙喇叭與 Dolby Audio 杜比音效技術。
HTC One M9+ 與 M9 不同地方，先講相機，就是多了如上年 M8 一樣嘅 Duo Camera 雙鏡頭，方便拍出景深、3D Diemension 等照片。此外。 M9+ 不是採用 Qualcomm 處理器，而係採用 MTK Helio X10 MT6795T 2.2GHz 八核心處理器。而 HTC One M9+ 的屏幕比起 M9 要大一點有 5.2 吋，而解像度也達到 WQHD / 2K（2560 x 1440）。M9+ 內建了 Home 鍵與指紋感應器的部份。HTC One M9+ 支援中港的 4G TD-LTE 與 FDD-LTE 、3G WCDMA 比起 HTC One M9 更加入了 3G TD-SCDMA ，頻段支援算是很完整，不過沒有雙卡設計。
▲ HTC One M9+ 與 M9 的設計方式基本上是一樣的， HTC 也號稱用了珠寶級的工藝去打造
機身設計
有人話「囧」樣下身太古怪，什麼條黑邊太粗，對於版主來說，由第一次上眼都唔覺係問題。至於 M9 機側「界」手問題，我用了 M9 與 M9+ 一段時間，只係第一次接觸會覺得唔係咁好，用落唔覺真係「界」，反而無 M8 與 One Mini 2 咁易滑手。而實實上，M9+ 跟 M9 有著同樣的金屬機身，而良好的造工，Detail 位做得好夠細緻。版主 Keith 個認為，除了 Apple，HTC 是掌握金屬機身最好的一個。大家可以睇睇圖片吧。嘩，呢個版主 Keith，又來讚 HTC 讚到上天！設計呢件事，各人有各人的喜好，你可以繼續說 M9 好「囧」，反正用機是我不是你，你已經用行動投票：不用，不買！我就用得好開心，係呀，我有得用測試機，仲有月薪！當然，六千左右呢個價錢，若果要真金白銀去買，係咪值得又係另一件事，版主覺得，基於總總因素，只有 iPhone 才能開出如此高價，無論部機手工人幾好。
屏幕感覺
究竟升級 2K 芒係咪咁大好處？其實 2K 芒嘅手機，對於版主來說，唔算特別新鮮，記得上年用得最多比較多嘅 Oppo Find 7 就係 2K 芒嘅代表，跟 Full HD 1080p 相比，睇相係特別細膩嘅。係 HTC One M9+ 裡面，我都感受到同一效果。咪以為都係用上 SLCD，HTC 嘅手機，每一款屏幕效果都有唔同。以 M9 與 M9+ 比較，先不說相片嘅細膩度比較，係顏色表達方面，M9+ 以比較 warm 嘅色調示人，而 M9 是比較冷色。個人是比較 Warm 嘅色調，但屏幕顏色呢家野，只要不是太過份偏色，其實各人喜好也不同。版主只可以講，大家用上同一夥二千萬像素相機，係 M9+ 展幕顯示 2K 兼 warm tone 相片，會比 M9 Full HD 冷色調相片，更令人討喜。手機影相，十居其九都用手機屏幕跟朋友分享式傳閱，先不談 M9+ 與 M9 影嘅相係咪都係咁差，但 M9+ 屏幕表達出來，的確好好多 「輸機不輪陣」。
▲ 金鑽銀色系採用了雙色設計，在側邊加上金色，其餘部分為銀色，側邊的配置與 M9 也是一樣的，有 microSD 記憶卡插槽、音量鍵與電源鍵；左側為 nano SIM 卡槽。
▲ 底部有 micro USB 連接埠以及 3.5mm 耳機孔，頂端則有 IR 紅外線遙控器。
▲ HTC One M9+ 有銀與灰二種色系，銀即是 M9 個隻銀色有金邊，而灰即是上年 HTC One M8 個隻灰。
▲ 有人話 M9+ 相機部份的圓形太大， 用左一個星期嘅版主，見得多就習慣左，反而覺得比起 M9 四方形相機更好睇。
▲ 左至右：HTC One M9+、M9、E9+ 與令人好懷念嘅 One Max。由機身大細可見，採用 5.2 吋屏幕嘅 M9+ 唔算好巨型。
試用指紋解鎖
HTC One M9+ 加入了係 HTC 手機裡，被人遺忘嘅這指紋辨識器，有別於上作 HTC One Max 放係機背，今次放係機前面，令機底成了「囧」字樣，未談功能，先輸樣 (至少好多網友有咁嘅意見)。其實，指紋辨識器係唔錯嘅設計，而今次 HTC 亦不是單單把 One Max 個套，引進 M9+，新的辨認器是 360 度全角度，唔駛依照指定角度可用來解鎖手機，採用與 iPhone 6 / Galaxy S6 一樣的輕觸式設計，唔使再好似 HTC One Max 的指紋辨識器咁要用「掃」既方式解鎖。除左驗證指紋之下，輕觸一下感應器會有 Home 鍵的作用，可回到主畫面，雖然它有點凹槽，但它是感應式而不是按壓式按鍵。版主試用七日，使用率甚高，無論把手機放在枱上，或舉起手機時，也會用到。指紋解到銷成功機會率達 95%，不成功主要因為手指太污漕或有水影響。這個指紋解鎖方便功能，亦令版主肯會長用 M9+ 而不用 M9 嘅其中一個原因之一。
▲ HTC One M9+ 的指紋辨識器，並有 Home 鍵的功能 (當不唔用指紋解鎖，呢個掣支援 Home 鍵)。支援五隻手指註冊，指紋辨識作用為解鎖手機。
▲ 單手機解機鎖，用指頭安一按機面按鍵就可以，方便吧。
▲ 都係用 Video 示範，先睇到 M9+ 指紋解鎖準定唔準。
20MP 雙鏡頭景深相機！景深相片只能拍 408 萬像素！
HTC One M9+ 在相機部分規格大多與 M9 相同，主相機為 2000 萬像素背照式感光元件，具備 F2.2 光圈、27.8mm 廣角與 4K 錄影能力；前相機為 400 萬像素 UltraPixel 感光元件，具備 F2.0 光圈、26.8mm 廣角與 1080p 錄影能力。而 M9+ 與 M9 最大不同，是 M9 繼承了 M8 的景深雙鏡頭相機設計。不過 M9+ 的景深照片功能並不是隨時開啟，而是要在相機介面中切換到「雙鏡頭模式」，而且拍出來的景深相片只有 408 萬像素，並不是 2000 萬全像素，這跟之前 Butterfly 2 有點相似。M9+ 跟 M9 一樣，拍攝到 RAW 格式相片嗎？答案是否定的。版主問過 HTC，RAW 格式支援，暫時只可以用於 M9 裡面，其他用相同嘅東芝感光元件相機，也不會開發此功能。至於呢粒東芝 T4KA7 感光元件，不少報告都䛏認為是應該可以拍到不錯嘅相片，只係 HTC 不太識點樣 turn 好佢。以下版主嘗試用 XDA 論壇流傳嘅方法，包括將拍攝比例設定為 10:7、調至 1000 萬像素、將 Sharpness 調低一度，最重要限制最高 ISO 值不能高於 400，再看看 M9+ 拍攝效果如何？
▲ HTC One M9+ 採用 2000 萬像素主相機，跟 M9 一樣，採用東芝 T4KA7 感光元件，並且具備之前 M8 的雙鏡頭景深相機與雙色溫補光燈。
▲ 雙鏡頭模式可調整的選項不多，而且只能拍攝 408 萬像素照片。
▲ 以上用了 XDA 論壇「Setting Mode」拍攝嘅相片。效果係點，我不評論了。
▲ 兩組用雙鏡頭拍攝嘅景深相片，效果好顯著。
MTK Helio X10八核心處理器
HTC One M9+ 採用一個 MTK Helio X10 2.2GHz 八核心處理器，除了支援 64 bit 外，也是 MT6795 系列處理器中最高階的，手機配備 3GB RAM / 32GB ROM，跑分方面安兔兔得出來接近五萬分，低過 E9+ 少許，大約是Qualcomm S810 八核 CPU 的八成功力，但其實比起上年嘅 S801 CPU 效果相約。
▲ AnTuTu 係GPU 分數為 9096 好多網友話唔滿意。
▲ 係 Vellamo 測試中，M9+ 係瀏覽器嘅排行，唔算高。反以用 CPU 作效能測試嘅多核及金屬分收，都係唔錯。
▲ 用來測試 3D 遊戲效能嘅 Basemark 2.0 ES 分數係 47.51fps，只能說是中上。之前測用 S615 CPU , Sony Xperia M4 Aqua，用 720p 芒，有五十幾分架。
▲ 好多人會懷疑，MTK 處理器，係咪好唔省電。版主用過，最長紀錄一日用到 12 小時，呢日我開了省電模式，屏幕調至 1/4 光度，開屏幕時間唔算多，但都有聽一小時 Spotify 打十五分鐘電話。亦試過只用七至八小時，呢日無開省電模式，屏幕調至最光，更有一小時用來做 Tethering 分享 4G 上網。事實說了，網友你自己評論係咪好食電。
▲ 版主用「狂野飆車8：極速凌雲」作測試，大家睇下有無 Lag 機 (當然，版主平時唔打機，撞死車唔好笑我)。版主調至最光玩了十五分鐘，大約用了 5% 電量。
版主小結：嘩，我無咁勇去讚 M9 系列
老實講，版主用過 M9 用過 M9+ 我會比較喜歡 M9+ 主要係 5.2 吋 2K 芒，表現出來的確唔錯，字體大隻，色彩都 OK。相機呀，經過 XDA 論壇 HTC 支持者教了如何遷就呢個 HTC Tune 得唔好嘅相機，又唔影二千萬像素相片，其實效果係有改善，我仲收左貨個種。效能呀，我好滿意了，而本來以為我唔唔會多用嘅指紋解鎖，亦因為改了在前方，真係會用。（HTC One Max, Oppo N3 等等我都唔會用）。你問我推唔推薦呢部機，我點敢去推呀！六千蚊，應該要有 iPhone 嘅質素，至少呢部機，相機部份唔得，iPhone 我用過，iPhone 5c 影相都仲得，同埋都肯定 LG G4 影得比 M9、M9+、E9+ 仲好。指紋部份又除了 Unlock 個 screen 無其他功能。六千蚊 S6 Edge / S6 更多野玩喎，再讚佢，我又變了 HTC 打手。我先無咁傻，死都唔會推介。
最後，你用上面嘅短片、相片、數據去想想吧。選擇咁多，無話一定要揀呢部個部。係咪先!
在文章發佈的時侯， HTC One M9+ 定價仍未公佈，按這裡知道更詳細規格及最新賣價。
