▲ 唔想睇字，可以睇睇 Hands On Video。
DNA : HTC + Apple
HTC One A9，相信都不是一個秘密，好多人都從網絡嘅圖片與傳聞，大約知道佢係一款跟 iPhone 6 嘅設計好相似嘅手機。事實上，版主上手試玩， HTC One A9 的確好有 iPhone 6 嘅 DNA，但質感大不同。 HTC 形容 A9 叫 Metalmorphics，中文我就唔係好知點譯，簡單來講，就是把 HTC 一直用開嘅一體成形金屬機 ，做到最極致（鋁美合金，AI6063)，觸感與視角，都係自 HTC One M8 以來最好。HTC One A9 看似 iPhone 6? 但其實好易分得到，今次取得嘅 Carbin Grey 版本，前面與側面就是黑色。機下長圓形嘅指紋認證，也是 Home Key，令你可以分得出佢係 iPhone 6 定係 A9。反轉睇機背，上下都有天線紋，與機身顏色是很配合，A9 是一條線不是 iPhone 6 的環狀，加上鏡頭位置上 A9 係中間、iPhone 6 係左側，兩款機其實又好唔同。不同之處，也係手感上面體會到。HTC One A9 與 iPhone 6 一樣，都採用了 2.5D 玻璃，側面圓圓的感覺，好 Smooth 好舒服，但背 A9 機背更加平滑，觸感比起 iPhone 6 都來得好，但缺點是比較容易沾汗及留指紋。至於跟 HTC 本身嘅旗艦比較，我地搵左同樣係五吋芒嘅 HTC One M9 做對比，感覺又是令一回事。HTC One A9，感覺好唔 HTC，或者呢個設計，先係 HTC 東山再起嘅元素嗎？版主不知道，但肯定嘅係，HTC One A9 嘅 143 克重量，加上 5 吋屏幕，真正做到很適合一手操作。先以外型、手機來評論，相信以往喜愛 M7 與 M8，也會喜愛 A9。
▲ 圖中有三款 HTC 手機，相信在年初時，大家也未必估到 HTC 最後會有部咁樣嘅 A9 出場，跟 HTC 手機好唔唔相似。
▲ 五吋屏幕嘅 HTC One A9 好渣手。重點跟 iPhone 6s 係一樣嘅重量，奇妙呀!
▲ 版主嘅 Carbin Grey 版本，感覺低調得來，好有型。
▲ 2.5D 屏幕，採用了 Gorilla Glass 4，代表屏幕堅而硬。靜靜雞跟大家講，我呢個粗人已把 A9 掉了兩次落地下，好采無花無爛，無爆芒。
▲ 不要輕看按鍵嘅編排，之前有人提及 M9 音量鍵與開關鍵實在太似。而在 A9 裡面，音量鍵改為一條線嘅設計而開關鍵變為條狀紋，由形狀與手感都唔一樣，唔會再攪錯。
▲ 機身左側是 microSD 位置及 nano SIM slot。
▲ htc logo 下面就係指紋認證，你唔用嘅話，就係 Home 鍵，唔駛按下的，點一點就可以。
▲ 左是 HTC One A9、右係 M9。可見 A9 用了係 HTC 角度來講嘅全新設計。版主就覺得好靚。
▲ A9 (左) 沒有曲曲的機身，感覺薄一點。
新八核處理器
講講功能：Qualcomm Snapdragon 617 八核心處理器，5 吋 AMOLED 屏幕，對，是 AMOLED 屏幕，再加上 2GB + 16GB ROM 或者 3GB + 32GB ROM，夠唔夠用就見仁見智，但初試幾日，沒有出現 S810、S615 嘅狂熱問題，大家可以放心嘅。2150mAH 細容量電池可能令大家嚇一跳，但因為它出機已採用 Android 6.0，連續使用時間係會跟電池再大一 D 嘅 M9、M9+ 相差無幾，甚至更好。關於電量部份，可以留意稍後版主嘅詳細試玩後感，可以透露少少，今天我是中低用量，上網不多，主要 check email、睇 WhatsApp 及回 FB Messenger，全部 Sync 功能也開著，有打電話，有影過相，連住 4G LTE 網絡，已連續用了超過十五小時。相機方面，今次用左 Sony IMX214 感光元件，佢支援 F2.0 大光圈，而 HTC 亦特別加入了最新嘅光學防手震，影到 1300 萬像素相片與 Full HD 短片。今次 HTC A9 係拍攝介面都改變左唔少，有方便一按即可調教 HDR，等大家係光線反差大嘅環境影相，亦把被 Apple 取用的 Life Photo …即係 HTC Zoe，即係拍三秒短片功能，補返去 A9。而 iPhone 無嘅 M Mode 專業模式，亦係 A9 出現。專業模式下，你可以調教 ISO 值、對焦、微距，亦可以選擇 RAW 或 JPEG 拍攝。
此外，HTC One A9 亦支援 24bit 192KHz 嘅 Hi-Res Audio 音樂播放。不單是播放，今次 A9 有全新嘅 DAC 去處理。我地用 24bit / 96khz 嘅歌曲測試，效果提升了不少。若果你無 Hi-Res Audio 歌曲，亦可以透過 Boomsound with Dolby Audio 去提升低音方面嘅效果。不過，今次 HTC One A9 係沒有雙揚聲器設計，機底單一 Speaker 一樣好大聲，跟 iPhone 6 嘅效果相約。
▲ A9 採用 Sony IMX214 感光元件，可拍攝千三萬像素相片。今次也有雙 LED 補光燈，也加入了 OIS 光學防震。
▲ A9 只有一個機底輸出嘅揚聲器，但效果亦好好。
▲ A9 用上全新拍攝介面，焦點係左面：加入了快速切換 HDR、前鏡拍攝與 Life Photos...是 HTC Zoe 才是。
▲ 相機功能也是好跟 iOS: 慢動作，縮時攝影也是 iOS 裡面比較多人用。
▲ Pro 影像模式，令你可以拍到 RAW、White Balance、ISO、快門、微距等調教。
▲ RAW 模式裡面，亦有光暗後掣調節。
▲ 因應採用 Android 6.0，HTC One A9 加入了電池最佳化，可以優化 Apps 嘅電池使用量，做到更加慳電效果。
HTC One A9 大約係十一月係香港推出，會係支援中港 4G，包括 TD-LTE 嘅單卡手機，但未有定價，參考美國版 unlock sim free USD$399.99 嘅賣價，等於 HK$3200 左右，但英國部份又有一個瘋狂價英磅 429.99，即係超過 港幣五千。台灣呢，就傳 16GB ROM 版本賣 NT$14900，都係 HK$3500 左右。所以，香港賣幾錢，真係無人知。若果最後真係三千二左右，呢個價，你又會唔會衝返部呢？
有興趣睇 HTC One A9 評測嘅網友，因為 HTC 嘅 Embargo 限制，稍後日子才能刊登，反正多幾日等我玩，等我試也不是壞事。網友們又有什麼想問，可以係會員回應，或者 FB reply 隨時發問。
HTC One A9 係文章發表時，香港上市時間未定。按這裡有詳細規格及最新賣價
![[圖集 + Hands On ] 三千中搶 iPhone? 錯! 係 HTC One A9](http://img.eprice.com.hk/img/news_hk/15116/large.jpg)